واصفيروه صفر

[زهـراء]

اقروا وفاتي وحرقوا صفري ................. !!!


بعد غروب الشمس بسويعات ........... جاءتني زوجتي تحدثني وتقول لي :

حضرت امك الى البيت ... وتسلم عليك وتقول لك اطلعوا صفر من بيتكم


قلت لها
يعني شلون نطلع صفر من بيتنا

قالت :
يعني خلوا صفر يطلع من بيتكم ويطلع معاه الشر

قلت : ايه والله طلع صفر ، وانفرجت بطلوعه ازمة الاسهم
ايه بس كيف نطلع صفر من بيتنا ؟

قالت لي : اهي امك طلعته من البيت

يزاها الله خير

ما سألتني كيف طلعته ........

سألتك ما جاوبتيني

ابتسمت ابتسامة فرح وسرور ... ثم استرسلت بالكلام قائله
سألتني امك ما عندك شربة ؟ أو ايحلة ( يعني جحلة ) ؟ قلت لها لا ... من وين لنا ياعمة .

نظرت الى المطبخية .. وقالت كل هالصحون الصين والكاسات تستخدميهم ؟
قالت زين طلعي شي منهم...
.
قلت لها : والله ياعمة كلهم ابيهم واستخدمهم

خطر على بالي شي ......
قلت لها : عندنا شي يشبه القدو .... يصلح ياعمة
قالت : وشهو
فأتيت به اليها .... وقالت : زين ينفع ......
فأخذته وخرجت به خارج المنزل وكسرته ...

قلت لها : الحين طلع صفر من البيت ؟

قالت : ايه طلع صفر بشرته وشروره
يانا ربيع بفرحته وسروره

فأجبت زوجتي قائلا لها :
بس هذي كل السالفة ، حسبالي عندش سالفة مهمة

زين ماسألتني وشهو الشي اللي كسرته امك .

ايه ..جاوبي خلصينا مانا فاضي باسوي راس معسل الحين

أخاف تزعل .....

تعرفيني ... مافي شي يزعلني دام انه يتعوض

اللي كسرته امك ..... غرشة لمعسل

يعني ... هذا اللي انتي محترة منها لمعسله
مايخالف ... مادام انه صفر طلع من البيت



بعدها ذهبت الى والدتي لكي تخبرني المزيد عن سوالف صفر وهالطقوس والعادات اللي يسوها

وسألتها ....

اخذت والدتي الله يحفظها تسرد علي سوالف وعادات تقام في شهر صفر وغير شهر صفر

وتمنيت ان احد من اللي يقدروا يصيغوا الكلمات واللي عندهم قدرة على التعبير والكتابة كان وياي

من ضمن كلام الوالدة وسوالفها عن شهر صفر والعادات اللي يقوموا بها

انه في نهاية شهر صفر بعد وفاة النبي ( ص ) وبالتحديد بعد مايسمعون الوفاة العصر قبل سلوم الشمس بساعة تقريبا

يتيمعن كل نسوان الفريق ولبنيات في مكان يكون برح وسط الفريق

وكل وحده تطلع خمام بيتهم في ذاك المكان ويحرقونه ويصير يدوروا حول النار وهم يقولون بعض الاهازيج من ضمنها
واصفيروه صفر ... طلع من لحضار واعتفر
طلع صفر بــ شرته وشروره
يانا ربيع بــ فرحته وسروره

شرق وغرب ياصفر واركب على الشويلة
وان كان مانتى مشرق يعلك ضربة شيلة


واللي تطلع من بيتهم شربه ، ولا يحله ، ولا قدو
وترميه بالنار

يعني كل الموجودين نسوان وبنيات

قالت : ايه ياوليدي

ايصير فيه صبيان بس فريخات اعمارهم محاري عشر سنين
ويناططوا على النار


زين يايمه ..والرياييل

هاااا ....الله يرحم ابوك ....... الرياييل ياوليدي

ما يهتموا بهالشغلات ولا يسولفوا بسوالف الحريم

مو مثل الحين

الرياييل يتدخلوا في كل صغيرة وكبيرة من سوالف وشغلات الحريم

( ليش هذي بخنقها مزركش .... وليش هذي لابسة ماكسي .... وليش هذي بنطلونها شارلستون .........)


ايه ييمه وبعد ليش هذي عبايتها كتافي وهذي راسية

مشكل يوليدي
ذاك زمان وهذا زمان


على فكره
ترى الشخص الكبير في السن لما تسأله عن الماضي وتصطاخ اله وتتجاوب وياه يستانس وايد
ويرتاح الك

"مماقرأت وأعجبني فأحببت أن تشاركوني"

[أوراد الجُلنار]

وكل وحده تطلع خمام بيتهم في ذاك المكان ويحرقونه ويصير يدوروا حول النار وهم يقولون بعض الاهازيج من ضمنها
واصفيروه صفر ... طلع من لحضار واعتفر
طلع صفر بــ شرته وشروره
يانا ربيع بــ فرحته وسروره

شرق وغرب ياصفر واركب على الشويلة
وان كان مانتى مشرق يعلك ضربة شيلة


واللي تطلع من بيتهم شربه ، ولا يحله ، ولا قدو
وترميه بالنار

يعني كل الموجودين نسوان وبنيات




سويناها واحنا صغار
ودرنا على النار
رجعتي الذكريات


وسوالف كسر القداوة
المهم
عادات لازالت موجودة ولم تندثر

تشكرات زهراء

[كليله]

جميل رائع يازهراء
واصلي هذا الأبداع بهذا الأسلوب الذي افتقدناه منذ فترة , انه سرد جديد وتنوع آخر حول هذا الموضوع نعدك بالمشاركة واتمنى من الجميع ان يتفاعلوا هنا سواء بأنشيد او ذكريات وخلافها ..
شكرا لكم .

[العنكبوت]

موضوع جميل جدا جدا
ذكرتمونا بسوالف الجدات و حكايا الأجداد
جميل ان نتسمح لنفسك بالجلوس سويعات مع جدتك
ستدرك انك قد فوت الكثير على نفسك
وستتمنى لو انك فعلت هذا منذ زمن
احب الجلوس بقرب جدتي
لتحكي لي وانا اسمعها
ومثل حكايتك تلك جميل ان تبقى ولا تندثر
بوركت اخية

[ملاذ]

شكرا زهراء على مشاركتنا بهذا النقل

يا بو صفيرات صفر
طلع من لحظار طفر

[الولاء المحمدي]

اللهم صل على محمد و آل محمد

طرح موفق بالفعل
راق لي كثيراً
ذكرتني بالبارحة فقط
ما أن انتهينا من المجلس
قالت لي خالتي قومي و انزعي السواد من على الحيطان
قمت و نزعتهم بعدها قالت خالتي لأمي : خيوه ماطلعتي صفر
قالت ابنت خالتي : اماه داكو في قدو منكسر شوي بره
قامت ابنت خالتي و أتت به
دخلنا كلنا داخل الغرفة
و أختي (سوت ) بخورة " علوش "
وجلسنا بالغرفة و أمي تكسر القدو وخالتي ( خالة أبي ) تغني
و أمي تقول لنا : تصفقوا له
و صفقت معهم و لكن لم افهم ولا كلمة من الذي قيل
تبخرت ببخورة " العلوش " لأني احب ريحته
وبعدها طلعنا من الغرفة و البسمة تغمر الجميع صغيراً وكبيراً

أعتذر زهراء ع الهدرة :p

تحياااااااااتي لك ..
أختك :: الولاء المحمدي

نسألكم الدعاء

[زهـراء]

أوراد الجُلنار

http://www.arb-up.com/files/arb-up-2008-6/q7b62505.gif (http://www.arb-up.com/)

[زهـراء]

كليله

http://www.arb-up.com/files/arb-up-2008-6/A1G62790.gif (http://www.arb-up.com/)

[زهـراء]

العنكبوت

http://www.arb-up.com/files/arb-up-2008-6/G0Q62922.gif (http://www.arb-up.com/)

[زهـراء]

ملاذ

http://www.arb-up.com/files/arb-up-2008-6/jEV63064.gif (http://www.arb-up.com/)

[زهـراء]

الولاء المحمدي

http://www.arb-up.com/files/arb-up-2008-6/lRK63189.gif (http://www.arb-up.com/)