علاج الناس على النيات

[نعناع]

سلام

احببت ان استذكر بعض انواع العلاج في الماضي والذي يصح بعضها وبعضها لا يصح
سوف استرجع بعض الذكريات

وانا صنو اتذكر اخونا كليله كان دايس على صواب ( زجاج ) تألم الرجال لكن هو سبع
ما ينخاف عليه شفناه مصفت على جنب و مأخذ لوح وضل يشدخ على رجوله في مكان الصواب
ويقول هذا علاجي .

هذا نوع علمنا وياه كليله نجي نشوف شاطي ويش عنده

شاطي سنة من لسنين مرض مرض خفيف وراح الى احد الشياب ونصح بماء القدو على طريقتين
وطريق العلاج صعبه بس شاطي يا جبل مايهزك ريح الطريقة هي
1- شرب كوب ماي قدو من أكثر وحدة تشرب روس قدو في البلد
2- اذا كان المرض على الجلد يمسح بماء القدو

هذا بعض انواع العلاج لكن هناك نواع غريب من العلاج وهو العلاج بطريقة ( الدفن )
بعض الاشخاص الذين اعرفهم حصلت معه قصة في وقت الدبيحة حيث كان ابوشباب
ماسك لعجل عشان يدبحوه لكن لعجل رفسه رفسه خلاه يشوف الواحد عشرة
الرجال صار يصيح باموت باموت رجال الديرة مسكوه ودفنوه في ضلع وخلو راسه بس طالع
وباقي جسمه مدفون في ضلع مال مجرى الماي ...

يقولو له لازم ندفنك فترة عشان تبرى

سلام

[كليله]

الله يغربل ابليسك يانعناع
فّكرتك تقول علاج الناس على النبات , افاريها على النيّات .
مو الواحد كل ماصارت نيته طيبه ويقينه سليم على العلاج وعلى المصدر اللّي
بياخذ منه العلاج , يطيب .. كيف الله العالم ..
اعذرني نعناع حبيت اسجل مرور على عجاله بسبب (.......) واعدك بالعوده وذكر مواقف مررنا بها او سمعنا عنها .

[محمد الفرج]

.
.
.

قواك الله يابو النعانع ..

نسيت ذيك السنة يوم يجيك ابو صفار ؟!

والعلاج الرسمي لأبو صفار ويشو ؟!

عليك نور تجيب لك كم حرسون وتقعد تناظر فيهم لين يروح عنك لصفار ..!

لا والمشكلة يقول لك ناس بعد ما تقعد تطلع لك شوي يصيروا الحراسين صفران لأنهم ياخذوا صفارتك ..

ترى كل هالعلاجات مصدرها : " اربط صبعك والكل ينعت لك دوا "

على فكرة ذكرني اجيب لك قصة الشيخ فرج العمران ويا علاج النيات

موفقين

[الحبابة بنت الزهراء]

عاد أني فكرت يانعناع أن الموضوع علاج الناس على البنات
كليلة حمدا لله على السلامة
وإذا تصوب الواحد لول
ياحطوا على الصواب معجون أٍسنان
ياطفو ( الظاهر الطفو إلا من سيد الغواري )
ياصلصل
حتى يوقف الدم

عاد شوفوا السالفة
كنت صغيرة في المدرسة أو وحدة من زميلاتي أو هيه ماتدري طزّتني بالقلم في عيوني رجعت البيت شافت أمي عيوني حمرة سألتني أعطيتها السالفة
قالت تانيني باسوي لش دواء لأن عيونش داكيه مرة حمرة
راحت جابت دبس أو حطت وياه شوية ملح و أصرت إلا تقطر عيوني فيه
سلمت أمري لله
هيه حطته منا
أني بغيت أموت مناك
خمس دقايق إلا الحمرة راحت

لي عودة

تحية ولائية

[نعناع]

يبغى لينا نكبر الكلمة على النيات

شكله لول في ناس تفلسف واجد والكل يقول فاهم

في واحد طالعة لها ( حبة الرياح ) في جسمه
نصحوه ان يشلخ له راس بصل و يلزق نصها
على الحبة .....يقول عشان تخمر بسرعة

راجعين

[كليله]

لا نعناع .. المشكله مو في انّك تكبّر الكلمه .
أنا اشوف مع احترامي لك لو يتغيّر العنوان .. الموضوع جميل جداً ومسلّي
وسيأخذ حقّه من التفاعل .

ترى ياجماعة الخير اهلنا لوّل على بساطتهم , الله سبحانه وتعالى عاطنهم على نيّاتهم فمتى ماكانت النية سليمه , اعطاه الله على نيّته وأسعده .

يعني بالله عليكم مرّة طلعت لي ( أم سليج) في رجولي ودخت منها قال الوالد روح عند لحماره وخلّيها عزكم الله تبول عليها وتبرى .
وسوّيت اللّي قاله لي وبريت .. لايكون تفكروني أمزح .. ترى صحيح وفي لوّل اغرب علاجات على النيات من كده ..

حبّابتنا عندش شكّ في أن طفو سيّد الغواري يداوي القروح ولاجروح والأسقام
والعلل ..أن ماعندي شك وتحية لكِ حامضيّه .

انتظرونا بعد الافاصل (رشفة من سيد الغواري العظيم ونعود لكم ) ..

[نعناع]

يعني بالله عليكم مرّة طلعت لي ( أم سليج) في رجولي ودخت منها قال الوالد روح عند لحماره وخلّيها عزكم الله تبول عليها وتبرى


نيتك زينة

اسم الموضوع هذا مثل يقال
وانت لك الحرية في التغيير الموضوع يا ابو محمد
خذ راحتك

[الهاشمي]

مويضيع حليو زيك يا نعناع.. :D

ذيك السنة يوم كنت أنا وواحد من الشلة مسويين شركة بيع سندويشات فلافل و نخج و بطاطس.. عاد خلص النخج حق الفلافل و قال شريكي أركب إيايي على السيكل و أنت على المقلصة و خلنا نروح دكان (سيد علي الشرفاء) - رحمه الله- و نشتري نخج.. يوم قريب نوصل و أنا مقلوص مرينا على الحوطة و في زاويتها جدار (جينكو) و تجي قدمي في وين؟ في زاوية الجينكو و يجيك الدم بحر :b3e8638df8: و شاطئ يصرخ باموت يا رجولي..

قريب من المكان كان فيه عمال بني عربي يبنوا بيت و فزعوا و واحد منهم جاب (لقمة) إسمنت و غطى الجرح و صرخت أعظم من الصرخة الأولية.. بس في الأخير وقف الدم و مشى الحال.. و للآن أثر الجرح موجود (تقريباً 2 سم) .. رغم مرور 30 سنة على الحادثة..

نعناع قواك الله.. و كل يوم تعال.

[الهاشمي]

موضوعك يا نعناع ذكرنا بأمور كثيرة ما لقيت ليها تفسير و أكيد أحد الشياب و العجايز هنا يعرفوا الأسرار وراء ذلك.. :goofy-smiley-20:

مثلاً الأول لمن واحد يطلع له ضبضوب (كيس دهني) في عينه يقولوا له (عاشق بدوية) .. بس ليش يعني ويش معن بدوية؟

أيضاً أول واحنا صناوة إذا واحد طاح ضرسه يقولوا له الكبار أرمه في عين الشمس و قول ليها: يا شمس أخذي ضرس لحمار (مو لحمار في هالحالة يصير صاحب الضرس؟! :goofy-smiley-20:) و اعطيني ضرس غزال..

سالمين و سلمو.. يا أجاويد..

[الحبابة بنت الزهراء]

عاد في شهر محرم بسبب كثرة القراءات يبيح الحس ( الصوت )
الملالي يشربوا حليب بقر مفوّر وياه نبات وشوية زعفران أو بيضة
جربوا إلا صوته بايح يطلع صوته يطلع

تحية ولائية

[كليله]

يعطيكم العافيه جميعا .

شكراً لنعناع والذي يعود له الفضل في هذا الموضوع الجميل ..
والذي اعتبره أنا بمثابة الأستراحه بعد العناء والأستماع لسوالف الحبابة وبعد أن يعتصر المخ شعراً لسيد الغواري , نأتي هنا ونسولف عن مواقف مرّت علينا تتعلق
بتداوي الناس لوّل على نياتهم ..

ياجاعةالخير باذكر ليكم قصّة هي صحيحه , حتّى لو مضحكه ولكن قد يتفق البعض معي انّ للنيّة السليمة مهما كانت (الطبخة السريّه ) للعلاج دور في الأستفادة منه ..

واعذروني لن اذكر اسماء , احتراماً لمشاعر اهل اصحاب هذه القصّة ..
فقد توفّي الجميع , الطبيب والمريض ..

الطبيب كان مجرّد بيّاع في دكيكين من اهل لوّل والناس من اهل الفريق يجوا ويجلسوا معاه , ومرّة واحد من جلّاسه اصيب بمرض شديد في اذونه وماخلّى مكان الاّ راح يتعالج , حتّى يُقال انه راح لندن ولم يستفد ..

وحين يأس من حالته وحكاها لصديقه صاحب الدّكان , قال له بس ..علاجك عندي وانا ابوهندي , ماخلّيت مكان في الدنيا وتعالجت وخسرت المخاسير , أنا باعطيك علاج وببلاش وان شاء الله بتطيب .

يقول ..كتب لي كلام في ورقه ولفّاها وقال اربطها على ادونك ..
الرجال اخذ الورقه وربطها على ادونه , ويوم ثاني وين داك الألم وذاك الوجع , كلّه راح (اللهم صلي على محمد وآل محمد) .. جا له وهو مدهوش ومو مصدّق , فرحان الدنيا ماهي شالتنّه , ويوقل له قول بس اللّي تبغى أنا حاضر , لايردّك الاّ لسانك ..

هاذاك يبغى يضحك بس ماسك نفسه , ويقول له .. طبت , قال ايه ..
قال .. ويش كتبت ليّي حتّى طبت وأنا علاجات الدنيا مافادت ويّاي ..
قال له .. افتح الورقه ..
فتحها ولقى مكتوب فيها ... ( لا لا يالخيزرانه في الهوى ميّلوني ) ..!!!

[نعناع]

فتحها ولقى مكتوب فيها ... ( لا لا يالخيزرانه في الهوى ميّلوني ) ..!!!


بصراحة جبتها يا ابومحمد
طيرت النوم عدل من سالفتك

راجعين

[كليله]

نعناع ..
تعرف عمّي الملاّ الله يرحمه ويرحم المؤمنين والمؤمنات اجمعين ..
رجل غني عن التعرف ومايحتاج اعرفك عليه ..

كان من خيار مؤمنين الديره وكان كثيرا ماينتخوا به الأجاويد سواءً لقراءة
حلّال المشاكل في بيوتهم او الرقيّه للأستشفاء من الأمراض ..

عمّي الملاّ رحمه الله آخر حياته صار يشتغل في الفلاحه , وكان عنده جار عنده فرس بتولد وتعسّرت في ولادته , وتعرف الحيوان مسكين لو ويش مو مفل البني آدم بيدبّ عن نفسه , جاه جاره ركيض .. الحق علي ياملاّ الرفس بتولد وداكيه بتموت ..

جاها واخذ شويّة ماي وهو يبسبس بكلام ماسمعنا ويش قال , وصب عليها طاسة الماي , شوي والاّ ديك الفرس ولدت وقامت سالمه مافيها شي ..ً

[نعناع]

كليله

ماسمعت الي يقول راحو الي يقرو

رحمهم الله

[كليله]

حطّه في الأمثال ..يصلح

[جنة الزهراء]

مشكورياالاخوعلى هاالموضوع صحيح كل شي على النيات ولدي الصغيرعزكم الله جاه اسهال وترجيع متواصل اسبوع طبعا رحنا مستشفيات
ولافاد قالوالي النسوان اعطيه كداوكدا ولاتغير ومايرضى ياكل الاالروب قمت خلطت اليه ملعقه كبيره نشاوياروب تقول جبس وقف في حينته
خوش دوه سريع المفعول حاضربحاضر :hands:

[خادمة العتره]

اني طبعا مااعرف اشياء واجد لكن اللي اذكره ان ولدي المت اذونه وقالت ليي عمته لازم تعطيه حليب من عند اي وحده ترضع وطبعا جبت ليه حليب وقطرت اذونه به

[متيمة القديح]

اللهم صل على محمد وآل محمد
موضوع رائع
صدقتوا العلاج على النيات
بس إذا شكينا مايفيد

يوم أني صغيرة دست على مسمار في خشبة وعمي
قال احرقوا خيشة وحطوها مكانة الصواب

وأذكر نوبة صاير ريقي كلا ماصخ وزيلة جبدي
قالوا ليي نامي وحطي على جبهتش سعفة نخلة وبتروح زولة الجبد

وإذا وحدة فيها ضبضوب يحطوا عليه قطيرة ماي قدو من العزية ويروح

وإذا الأذون منطمة يحطوا في الأذون الثانية خلقة فيها عيش لين صاخن
علشان البخار يطلع من الأذون المنطمة وتنفتح

والجاهل إذا كلا يراري يشووه في رقبته ويوقف الريري

هذا غير سوالف عيون الدبيحة
وحدة طلع ليها حب في راسها وسيلوا عليه عيون الدبيحة وبريت

[مجرد حلم]

هههههههههههههههه صحيح على نياتهم
اني ادكر يوم كنت صغيره دخل في رجولي مسمار قامت امي نيمتني على حطنها وغطتني بمشر ورجل اختي حرق الجرح بسكاره ويلي بغيت انتفهم فنينهم بس مادكر راح الوجع او لالالالالالا بس ادكر انهم تعاونو علي !!!!!!

[محراب العشق]

سوالفكم روعة...
لو نتبع الحين دواء أهالينا كان كنا بخير وفرنا صحة وفلوس
أذكر أختي كانت تشتكي من ألم في أذنها ..راحت أمي إلى حسينية النسوان وأخذت طفو من المنقلة وهو صاخن (حار) ولفته في خلقة(خرقة) وحطته على أذنها إلا وهي ما كأنه فيها شي
لكاتب الموضوع وكاتبي السوالف جزيل الشكر ..للموضوع نكهة منها علاج ومنها فرفشة :)
مع خالص التحايا

[أوراد الجُلنار]

ياحطوا على الصواب معجون أٍسنان
حتى يوقف الدم



هذا سليم من ناحية علمية
حسب علمي يحتوي على مادة قابضة للاوعية الدموية توقف النزف

سوالفكم حليوة
وبعضها لو رجعناها علميا ليها اساس كبير من الصحة


الاول لما ابويي يخلع ضرس احد فينا..كانت امي تقول...حطوا على محل الضرس قهوة
وبعض الناس تقول حطوا ملح

كان شي يطفر الروح

:a8d42daa02:

اعجبني موضوعكم :eeb398af00:

[أنين الأنتظار]

واكو علاج للاذن البخور خلي الاذون يشم الرائحة ويطيب
جربتها زبطت معاااي

[جنة الزهراء]

الاول حق تشقق الرجايل يخلطوافازلين وفكس ويروح جربتهم زبط معاي اوه لاانسى الى اغلب انواع الحبوب برهمة عيون:d170:

[جنة الزهراء]

والله شي عجيب هاالدوه اختي جسمها تورم كله قلواليها خدي ماي قدووخلطيه ويه ملح وتمسحي به سوت الوصفة العجيبه والحمدولله راح عنها والله يعطيها العافيه وياكم يعني طلعت بعدللقدوفوائدلذالك انصحكم بستخدامه خخخخخخخخخخخخ:bad_smile:يمكن يطلع لدخان علاج زي ماطلع للماي

[ابو طيف]

يسلمووووووووووووووو
الله لا يحرمنا من جديدك

[رسايل شوق]

سلام
اني اذكر ان يوم احنا صغار
اد الواحد دخل فيهشظايه يحطو ربيانه في قطعة قماش ويحطوه ع الجرح ليله كامله
وبعدين تطلع ولكنها صاير شي


(اسل مجرب ولا تسل طبيب)

[كليله]

رسايل شوق
مشكورين على هالمعلومه اللطيفه
والمشاركة الخفيفه ..
تحياتي .,