في اي مرحلة تدرس؟؟؟؟؟؟

[*دمعة شوق*]

كل واحد يكتب في اي مرحلة يدرس؟
ووين يدرس؟
ادري فضولية بس حابة أعرف
اتمنى من الجميع التفاعل والمشاركة:a30:

[ابو السلمhs-159]

لا اله الا الله يعنووو ضروووري؟؟
هذا الشي؟؟؟.
ادرس في الروضة
السنه الثانية ليي فيها كلا راسب؟؟
بس ممشي الحال يعنوو مزبط المعلمه وقالت بتعطيني درجات وبتنجحني

ههههههههههههههههههههههههههه
<<<<<<<<<<حسباله اساتذة الثنوي
بس السنه ماينفع تزبيط
ثالث ثنوي في المشاري بعد تمبي اي مدرسة واسمي واسم المدير
وجدول الحصص واسامي الاساتذة
لان يتراول ليي ان الفضول بيسحبك الى هذه النقطة لان فضوول الانسان لاينتهي عند اي حد
من الحدوود
انا الاحظ على روحي من وصلت ثالث وقمت اسوي روحي اداكر وحركات صرت فيلسووف بزيادة
خخخخخخخخخخخخخخخخخخخخخخخخخ
تحياتيـ

[khaled2500]

<<< مايدرس

ريحتكم من الاسئلة

خخخخ

[آنَآ آنْتَظرْ ..!]

<p>ادرس في خامس ابتدائي</p>

[**بقايــــــــا روح**]

أني أدرس في صف ثاني ثانوي (علمي)
في المدرسه الأولى بالقطيف

[حنين]

أني أدرس في صف ثاني ثانوي (علمي)
في المدرسه الثانويه الثانيه بالقديح
الله يوفقناأنشاء الله

[شموع ذائبه]

اما اني ادرس في صف ثاني ثانوي (علمي)
في الثانويه الاولى بالقطيف

ليش بتسوي احصائيه الى عدد المدارس ؟؟؟

بس انتين ماقلتي الينا ويش عم تدرسي




شمووووووووووووووووع ذاااااااااااااااااائبه

[*دمعة شوق*]

مشكورين كلكم على مروركم الحلو
الله يوفقكم ويوفقكم جميعا
وباين اني اكبر وحدة فيكم
اني في سنة اولى في كلية العلوم بالدمام

[ملاذ]

كانت حياة
كانت تضم الذكريات
كانت تغني
كل ماضٍ
كانت تراقصُ..
كل آتْ
كانت حياة!

[كليله]

كانت من احلى ايّام العمر
مرّة ضعت في ذرّاعتي
اتدرون لم ؟
لأنّها ذرّاعة اخي الكبير ..
ايه سلام عليك ياسلمان المحمّدي
مدرسته هي شيخة المدارس .

[قديحي]

كليله تذكر ايم البرد؟
الوالده تربط وجهك بغترة او لفاف واذا فيك خير بطلها

ايه والله كانت ايام
ايام استاد محكل
والاستاذ ابوشرشف
والاستاد الخراط علي لولو , وعلي لولو هذا بروحه حكاية
يقول مره راح من الإردن الى فلسطين على تيس :a40:
ومرة من المرات احد الجنود الإسرائيليين اطلق عليه رصاصه وضربت الرصاصه في عضلة ايده ورجعت قتلت ثلاثة اسرائيليين :001:

كليله
ويش رايك نخرب الموضوع ونتكلم عن مدرسين لول

[دفء الاحساس]

اني سنة ثانية كلية تخصص حاسب:104: :a37:

[Hussein]

<p>أنا في ثالث طبيعي </p>
<p>أدرس في مدرسة دار السلام</p>

[كليله]

لعيناك ياقديحي
نخرّب ليش لا
نسيت اويمكن مادرّسك صاحب هالاسم
صبري ابوجلاده , وهذا يشبه ابو العناتر ناقص يكتب
على كتفه (باطل) شوارب مفتوله وعواين وساع ويخلع
واحنا ذاك الوقت جهال مبهبهين جرافله , نلبس اللي نشوفه قدّامنا
ونستحي اذا ضربنا مانقول لاهلنا , امّا انا اكلت منه علقات خللتني
اكفر , يعلقني من رجايلي تقول بفلكه وضرب , لين يطلّع روحي
كان دايما كثير الاعتداد بالنفس واذكر يقول لينا ..ترى انا اقرا الشّفه
واحس بالواحد ويش يقول قبل لايتكلّم , واحنامساكين نصدقه ونعيش
حالة رعب في حصّته ..
تذكر استاذ حسن البكّور ...في درس (امّك) واحد من الطلاّب كتب
الدّرس ولمّا جا يصحّحه قال له (يافلان حط شدّه على امّك) طبعا
احنا ضحكنا بس هو مايدري ليش ..
قديحي
لايزال للتخريب نصيب

[محمد الفرج]

سلام من الله عليكم

قواكم الله ياوجوه الخير

أما لو ارجع ادرس كان اخرب الدنيا .. راحت ايام الدراسة و احنا مؤدبين ..!!

لا وسنة من لسنين اخذت الطالب المثالي !! مع إني ناجح على الحفة !!

وعلى الاساتذة ..
جا لنا استاذ ينقال له ابو عواين البقر " عاد مافي استاذ ينقال له باسمه كل واحد له بدعة ، على سالفة كل استاذ له بدعة ذيك السنة جا المدير الفصل و سألنا من المدرس اللي عندكم الحصة الجاية فنطق واحد قال استاذ صايع !! ضحكنا كلنا لأن صاحبنا من كثر ما سمع الجميع يسموه كذا افتكره اسمه الحقيقي .. مو كنها طولت ؟! " المهم ابو عواين البقر بث الرعب ذيك السنة فينا .. على سالفة على كتفه ( باطل ) هذا ابو عواين البقر كل نتفة من ايده فيها دق .. هذا اللي ظاهر و ماخفي فالله اعلم ..!

الظاهر إن مدرسين كل جيل يكونوا افضل في اسلوب الدراسة من الجيل اللي يجي بعده ، وأفضل في ...

الحين يا عيني على المدرسين صاروا هم اللي ينضربوا ، كل بين كم يوم تلاقي خبر في الجريدة طالب ضرب مدرس !!

آخر سنة في الجامعة عطانا دكتور الخلطة السحرية للدراسة يمكن لو عرفتها من قبل كان سويت الهوايل ..
" الدراسة هي إنك تتفوق بأقل جهد وليس أن تنجح بأقل جهد .. ! "
للأسف إحنا كنا نبي ننجح بأقل جهد .. لما كنت اكتفي من المذاكرة و اقول إن اللي ذاكرته ينجحني افلها فل واترك المذاكرة ..!

وفيني اقرا سوالف عن المدرسين ياقديحي و ياكليله .. لا تقطعوا

دمتم بخير

[كليله]

من ذكريات المذاكره على السدّ, وآه على السد وايّامه
كان ذاك الهوى العليل اللي يشرح القلب ويرد الروح
ويفتح النفس على الذاكره ..
انا كنت مو من الناس اللي تمشي واجد , اشوف لي نخله
اوكناره واقعد تحتها واذاكر لين اخلّص ..
واحد من الشباب كنت اروح اذاكر معاه وهو خفيف دم
الله يذكره بالخير , وكانت طريقته في المذاكره عجيبه ومضحكه
مثلا اليوم نذاكر نصوص فيقرا الصفحه وبمجرد من يخلّص منها
يمشقها ويرميها في السد ... والسبب جوابه متروك ليكم ..
مدرسة سلمان الفارسي كانت تحمل تحت خباياها وجدرانها الشامخه
العتيده والقديمه مدرسين وطلاب وذكريات لاتنسى , بصراحه هالمدرسه
وان جدّد بناءها ولكن تبقى النسخة القديمه هي الاعز وهي التي لاتزال
مرسومة في الذاكره بكل خباياها ..
حتّى الفراّشين الله يرحم الماضين ويحفظ الباقين كانوا من خيرة الناس
وكانت تربطنا بهم مواقف حلوه , ومازلت اتذكر صورة ابوسلمان تركي
الله يرحمه وهو يجي الصباح يوزّع طباشير على مدرسي الفصل , واذا
قلت له ابغى طبشور عطاني ديك الزّقره وجمّدني ..

[قديحي]

طالما الحجي حرف حاب يقرأ عن سوالف المدرسة والمدرسين فما نقدر نرفض طلبه هذا
كليله كأن اسمه سلمان تركي على ما اعتقد او أبو سلمان ؟
عموما مهما كان اسمه فهذا الشخص من المقربين جدا للعائلة ويكفي العيدية الا كنت استلمها منه ايام طفولتي , ولكن رغم طيبة هذا الرجل المؤمن رحمة الله عليه الا انه كان قاسي على فئران مدرسة سلمان الفارسي ( الكبيرة )
المدرسة كان يجيها فيران كثيرة من نخل الشاعر بحكم ان الجدار من جهة نخل الشاعر كان فيه الكثير من الفتحات ويا ويل الفار الا يطيح في بروش سلمان التركي , مرة من المرات طرح فار داخل كرتون ورصعه بغطاء الكرتون نفسه ولك ان تتخيل الموقف
وعلى طاري الكراتين فأكيد يا كليله تتذكر شكل الكراتين الا كانوا يحطوا فيها الشباب سندويش الفلافل وهو يبيعوا فوق طوف المدرسه , هنا تتجلى يا كليله روح الكفاح فأما تكون قوي وتدخل بين جموع الناس وتحصل على سندويشتين فلافل او تبقى في جوعك لغاية آخر النهار
لا ادري ليش كانوا كل البياعين يستخدموا كرتون حليب ابوعلم بالذات ولا اديس ليش يغطوا الفلافل بفوطه , يمكن ما كان فيه غير هالكرتون
السؤال الغريب يا كليله
ليش ما كان فيه مقصف في المدرسة ايام الإبتدائية في المدرسة الكبيره على الرغم ان كان فيها غرفة كبيرة مكتوب عليها لوحة فوق الباب انها المقصف
اتذكر من البائعين كان عبدالعزيز شويهين (دابو ) طبعا هالكلام قبل ما يفتح له بوفيه ويصير بهالشهره الا هو عليها هالايام
ايضا كان السيد امان ابوالرحي ينافس دابو في بيع الفلافل , السيد أمان كان يطلب مساعد له في كل يوم انه يحط صاص في السندويش والمقابل فطور مجاني ( فكرة حلوة صح ؟)
دابو استمرت معه شغلة بيع الفلافل الى ايام المتوسطه ومدرسة ابن كثير حيث كان يبيع الفلافل برة المدرسه ومن المواقف الطريفه ان كان عندنا مدرس مصري اسمه عبدالسميع وكان يدرسنا الحصه الرابعه وهي الحصة الا تجي بعد الفسحه مباشرة لهذا كان دابو يعدل لفلوس ويعدهم في حصته
فكان كل يوم يجيه الإستاذ عبدالسميع ويساله
بكم بعت النهارده يا دابو ؟
ويكون رد دابو : خسران اليوم يا استاد
يرد الاستاد : انت كل يوم خسران ؟ امال تبيع ليه؟

ما يدري المسكين ان دابو طلع ملايين من هالفلافل الله يرزقه ويرزق جميع المؤمنين والمؤمنات

وقبل لا انسى ايضاً وعلى طاري الفراش سلمان العلوان فكان فيه فراش ثاني ( الباكوني )
وسمعت قصة لطيفه عنه ما ادري ان كانت صدق او لا
يقول لك كان الباكوني عنده مفاتيح المدرسه وبمجرد خروج الطلاب كان يقفل جميع لفصول وغرف المدرسين والحمامات ومرة من المرات قفل باب غرفة المدير وطلع بدون ما ينتبه ان الأستاذ عبدالكريم الحليلي حفظه الله كان موجود بالغرفه

[كليله]

تسألني ياقديحي ليش ماكان مقصف ايّام الابتدائيه , اصلاً فكرة
المقصف ماجت الاّ من ورى هالاجاويد اللّي يبيعوا من فوق
طوف المدرسه , ومسكين القصير ما ينوبه من السندويش شي .
قديحي كلّ اللّي نافسوا دابو في الفقلافل ما استمرّوا واتجهوا الى
اعمال اخرى , بينما صمد دابو لوحده في وجه الفلافل والذي عرف
ولايزال بعرف به , بل انّه مهنته التي يسترزق منها والى الآن .
لاتنسى اخي العزيز ان طوف المدرسة هذا كان قنطرة للهروب
على البيت , بل مضمار سباق ايضا !! صدذق اولاتصدّق

[شذا الورد]

<p>ادرس في صف ثالث ثانوي</p>
<p>في الثانوية السابعة في الناصرة ....</p>

[كليله]

كنّا نركب على سور مدرسة سلمان الفارسي , والسباق يتم بين متسابقين
ومن نقطتين متباعدتين , شريطة ان نلتقي على نقطة واحده من على السور
فأيّنا يصل اسرع ... يعدّ الليّ عيّن نفسه حكم وننطلق كلاّ من نقطته والليّ
يصل قبل الثاني , ووووول حماس وبلاسه نزيهه بريئه مافيه خوف من السقوط
متعودين , كانت ايّام حلوه

[قديحي]

لا تنسى ايضاً كليلة
ان سور مدرسة سلمان الفارسي كان يقوم مقام المدرجات للملعب الخاص بالمدرسه
واتذكر جيداً الدورات التي يقيمها مدرسة الرياضة الأستاذ سعيد القديحي
مباريات خماسية في فترة الفسحه بين الفصول تتجلى فيها المتعه والقوة والحماس

[كليله]

عدل كلامك بس انا بصراحة ماكنت فالح بهاللعبه في البداية
عشان كده اتذكر انّي كنت مجرّد مشجّع للفصل الخايب اللّي
انا فيه واللّي كان دايما يجيب الاخير , مع انّي اتذكر انّه كان
معانا لاعبين افذاذ من امثال علي عيسى عبدالنبي وعبدالرؤف
الدشيشي والكابتن عبدالله آل ناصر وغيرهم , فمن المواقف
الطّريفه لفصلي اتذكر وفي احدى المباريات الدّوريه وعندما
نزلنا للملعب اتضّح انّ الفريقان يرتديان نفس الشّعار فتنازلنا
نحن للفريق الخصم بأن يلعب المباراة بالفانيله بينما لعب فريق
فصلي مفاصيخ , يمكن مابتصدّق , يعني بس بالشورتات
هم بغوها كده لانّه الجو كان ذاك اليوم حار ..
المهم لازلت اتذكر اننّا هزمنا بالسبعه , يعني كرّمونا عدل
بعد ماتنازلنا ليهم بالفنايل .

[*دمعة شوق*]

حرف
كليله
قديحي
حلووووووه سوالفكم:a12:
وسوالف المدرسه
والله ذكريات
وأحلى ذكريات بعد

شكرا لجميع من نور صفحتي

[كليله]

يادمعة شوق
نشكر سعة صدرك وتحمّلك لنا رغم تخريب صفحتك
ربّما شطحنا بعيدا عن الموضوع , ولكن صدّقينا
لروعته وجماليته ولاننا واثقون من حلمك علينا
رأينا انا وبقيّة الاخوة ان نبثّ ذكرياتنا فيه وان نستبيح
عنوانه الصغير ونشتتّه الى مساحات من عناوين كثيره
من الذّكريات الحلوه .

[زوزو الحلوه]

أني خريجة ثالث ثانوي العام الماضي
وقاعده في البيت أقرأ سوالفكم...........
هههههههههههههههههه

[*دمعة شوق*]

بلعكس ياكليله صحيح ان الموضوع غيرتوه شوي...
الى** ذكريات ايام المدرسه**
بس بصراحه اني احسه انه صار احلى واحلى...
ننتظر المزيد من سوالفكم الحلوه...
زوزو الحلوه الله يوفقش انشاء الله ...
وتنقبلي في الفصل الدراسي الثاني...
وتدخلي اللي تتمنيه...

[قديحي]

وبما ان الجماعه عجبهم تغيير الموضوع فخلونا نفضفض شوي

في اول ابتدائي كان أستاذ الرسم اسمه احمد فتحي ( ابولعلوش ) وكانوا يسموه ابولعلوش لأنه طول الدوام العلك في بوزه
هذا على انه فنان محترف الى ان تعامله من الطلاب جاف جداً
كنت في اول ابتدائي ولأني غبي كنت اعتقد ان ما عندي دفتر رسم لأني ما اعرف ويشهو دفتر الرسم ,, طيب انا طفل في اول ابتدائي فالمفروض يعاملني على هذا الاساس
تصرفه كان شدخ بهالعصا على الراس ,, صحيح ضربات خفيفه لكنها كفيله تخلي الصغير يصيح
طبعا انا صرت احسن فنان في الفصل لما عرفت دفتر الرسم

والدليل مره رسمت رسمه في ثالث ابتدائي وكان فيها درم زباله
ولأني فنان كتب على لدرام كلمة ( برميل زباله )
لما شافها احمد فتحي قال انا لما اكتب هالكمله على لدرام معناها ان انا غبي
صحيح الا يكتب هالكلمه على لردام غبي؟

استاذ الرسم السوداني في متوسطه ابن كثير شافني خايب ومو فالح في الرسم
ما لقى لي شغله الا انه يعطيني شيته خشب ويقول لي اصبغها بصبغ ازرق
فأخذت لبروش وعلية الصبغ وصبغتها في عشر دقايق
لما شافها لستاذ السوداني
قال الله وبابتسامه تبين اعجابه بهاللوحة الفنيه الا سويتها ,, مع العلم انها صبغ بس
طبعا صحكته كانت فقط مجامله لطيفه بغسلوب حضاري لا يتمتع به الاستاذ محمد فتحي
على الرغم من الفارق الفني والمهاري في الرسم والخط بين كل من محمد فتحي والاستاذ السوداني الا انا ما اذكر اسمه

يمكن اكثركم تعامل مع أستاذ الرسم صلاح الا كان في مدرسة ابن كثير ومتوسطة لقديح
هذا كان جنتلمان ووسيم ويهمه مظهره وشياكته قبل كل شيء ,, ولأنه يستخدم المعجون في الرسم فكان يخلي ضوافر صبع الخنصر طويله حق يشيل بها زوائد المعجون
كان اكثر الطلاب ما يعرفوا سبب تطويل الظوافر ولأنه وسيم وجنتلمان ويلبس على آخر موضه فكان بعض الطلاب يقلدوه في طريقة اللبس والتصرفات لدرجة انه صار تطويل ظفر الخنصر موضه

[كليله]

على طاري الاناقه قديحي تتذكر اولاد المدرسين الفلسطينيين والاردنيين
ويمكن بعدين المصريين , كيف كانوا انيقين وكيف كنّا احنا بينهم جرافله
الله يخلف عليي هذا وانا رايح بدرّاعة اخويي تزحف في الارض , ولابس
غترته ووجهي ضايع يدوروه الطلاّب مايشوفوه من كبارة الغترة .
ما ادري في ويش هم احسن منّا , او يمكن فهموا الحياة قبلنا ...
بصراحة كانوا انيقين وخنينين ريحة العطر تبخ منهم , امّا احنا ريحة قضوب
اللّوز والتشبلك على الطيفان هي اللي تفوح منّا , قديحي لاتنكر ديك لايّام كنّا
نتحوحك كليهم ونحاول نتقرّب منهم , عل وعسى نعرف منهم كيف يذاكروا
كانوا دائما يجيبوا الاوّل , او على الاقل نحظى بشئفة بسبوسه او صبعبلي
اتذكر مرّه نهبت واحد منهم ولد استاذ فلسطيني عصاة صبعبلي وحط فييّ
ابوه استاذ سيف الدّين دست ما انساه (زفت الطّين) مو سيف الدّين ..
ايه ليش يضربني .

[قديحي]

كليله انت الا تتحوحش انا ما ليي شغل :a73:
لأن انا كنت كشخه حتى كنت البس فوب تفصيل
اما باقي الفصل ففيابهم سوقيين الا فيهم علاقة ورى الرقبه :b002:

هم ما يفهموا احسن منا يا كليله ,, هم بس عندهم امهم تذاكر ليهم
وابوهم يحل ليهم الواجب
ويقعدوا في السيد الأولي في الصف ,,, ويرفعوا اصابيعهم لما يسأل الاستاذ

احنا نقعد في الصف الأخير ,,, ونهرب من لدريشه والاستاذ يشرح الدرس
وشغلتنا نرمي الطباشير على الطلاب الا قاعدين قدامنا ونص الحصه ضحك ولعب

الحصة الوحيدة الا كنا شطار فيها هي حصة الرياضه ,, تلاقينا اول ناس رايحين حصة الرياضه
نجيب الكوره وتحصلنا اول ناس في القسمه واذا طارت الكوره نخل الشاعر تلاقينا اول ناس متعبلقين على الطوف حق نجيبها

شفت الفرق بينا وبينهم الحين
والا هم ما كانوا اشطر

اتذكر طالب اسمه رائد وابوه كان يدرس صف ثاني ابتدائي اسمه الاستاذ غازي
رائد وغازي احنا ويش يعرفنا بهالاسامي لول
حدنا علوانوه وحسنوه وسلمانوه
رائد كان هذا اشطر واحد في الفصل ومن يحط ابوه سؤال تلاقيه اول واحد يجاوب
شكله كان يعلمه بالاسئلة قبل الحصه ويقول له انا بسالك كذا وكذا
وعلشان يبين انه ما يفرق بين ولده والطلاب مره سال سؤال صعب والا ما يعرفه يطلعه يوقف
على السبوره ومن ضمن الا ما جاوبوا ولده رائد
لما طلعه جنب السبوره قام يصيح ,,, واحنا السالفه عندنا عااااااااااااااااادي لأننا كل يوم يوقفونا
اما رائد فكان هذا شي جديد عليه

كليله انا معك في ان طلاب الإبتدائي العرب كانوا من اشطر الناس
لكن بعد المرحلة المتوسطه صار حالهم حالنا لأنهم اخذوا من اطباعنا واول هالاطباع الكسل

وبقول ليكم شي قبل لا اخلص الرد هذا
ترى انا ما كنت شيطان مره ولا شاطر مره ولا بليد مره فلا تاخذوني عني فكره غير

[أميرة الجنة]

متخرجة من سنه من كلبة الآداب بالدمام

[كليله]

هالموضوع يخللّي الواحد مثل لمصفّع ويصير عنده فضول وودّه يقول
كل شي عن الدراسة قبل , صحيح كانت ايّام جميلة من عمرنا موبالسهل
ننساها , مدرسين قبل كانوا قاسيين والكل لوّل يعرف انّه مابعد تصير
ظوابط وحدود توضّح للمدرسين ماينبغي عمله تجاه اي عمل اوردّة فعل
او اهمال او مشاغبه لطالب ...
ماسمعنا لوّل ابداً واحد قال الضرب ممنوع , كان يجينا استاذ اسمه صبري
ابوجلاده فلسطيني , ماادري ويش سالفة هالفلسطينيين ويّا الضرب خصوصا معانا
وكأنّهم يبغوايفشّوا خلقهم فينا , هذا لستاد شغلته يمر على الفصول واثناء الحصص
ويسأل ايّ مدرس , هاه عندك احد مشاغب تبغاه ينضرب , وياويله ياسواد ليله اللّي
يطيح تحت رحمة مسطرته , كنت لوّل بعد ما اجي من المدرسة اودّي غدا ابويي النخل
وفي يوم اتذكّر ماقدرت اروح اودّيه وراحت وحده من الحريم تودّيه تدرون ليش
لاني جيت مشلّخ على رجايلي ...
قديحي تصدّق من الحاجات الجميله والتي اتذكرها ويجب ان لا ننساها ونعطيها ما تستحق من
الذكرى , اذ لها فضل علينا الا وهو (السّير) اللّي كنّا نربط به الكتب .

[قديحي]

صبري ابوجلاده هذا يا كليله يعتبر نفسه مربي فاضل
واعتقد ان المدرسين في الماضي كانوا يعتبروا الضرب اسلوب تربوي يجب اتباعه
وكأنهم لا يعرفوا انهم يتعاملوا مع أطفال لا يتحملوا حتى اصغر ضربه
كان مدرسنا في ثاني ابتدائي اسمه علي الغامدي وفي عز البرد كان يحط قلم البنسل بين اصابيعنا ويضرب بشكل يخليك طول اليوم ما نشعر بهم .. هذا ما كان فلسطيني ولا شامي ولكنه سعودي وامثاله الكثير والكثير الا ورونا العين الحمره في الدراسه ... هذا واحنا ربع مشاغبين مقارنة بباقي الطلاب

السير كليله الظاهر معظم الموجدين الحين ما يعرفوه ... ولا ادري ان موجود في المكتبات او لا .. لكن في فترة زمنيه كان هو الموضعه لدرجة ان استخدام الشنطة اصبح عيب كبير واستخدامك لها يخليك تصير مسخرة امام زملائك
ايضاً كانت موضة السير مناسبة للأهل لأن السير بريال والشنطه كانت في حدود عشرين ريال ولكم الحكم

في احد السنوات اخذونا في رحلة الى مدينة الجبيل الصناعه والهيئة الملكية .. طبعا هالرحلة كانت للطلاب المتفوقين فقط ( الا انا منهم ) ولما وصلنا ركب معانا موظف تابع لشركة سابك وفي ايده شنطة وبدل ان ننتبه للشرح الا يتكلم فيه عن نشأة سابك وبداياتها والثورة الصناعية القادمه في مدينة الجبيل الصناعية كان الطلاب يتغاموزن ويتلامزون على الشنطه ... الا يقول محسّن ولا يقول الظاهر ما عرف اختراع اسمه سير
وكأننا كلنا صح وحمله للشنطه هو الغلط
قبل الغذاء اخذونا الى مسرح في مبنى الهيئة الملكية لمشاهدة شريط سينمائي عن الهيئة وفكرة تكوينها .. المسرح به انارة خفيفة جدا جدا وجدرانه الداخليه مغطية بالزاجاج العاكس ( مرايات ) وكان صغير جدا لدرجة انه ما يكفي 100 طالب ولأني وصلت متأخر فكل الكراسي خلصت وبسرعه لمحت كرسي فاضي ولأن الا يدوروا كراسي اكثر من شخص فرحت اسرع لأنه الكرسي الوحيد
وما اشوف الا طااااااااااااااخ ووجهي صاقع في لمراية
اتاري انا اشوف الكرسي الفاضي في لمرايه وانا افتكره قدامي
والنتيجة انا جبهتي تعورني
والكرسي صار من نصيب واحد ثاني كان يشوف عدل مو مثلي انا اعتقد لمرايه طريق مفتوح
طبعا الطلاب سكتوا عن سالفة شنطة اموظف سابك الا معانا في الباص وصار محور الحديث ولمدة اسبوع في الفصل لمراية الا صدمها قديحي


لي عوده

[كليله]

حتّى في ذلك الوقت كنّا وان نحن من ديرة وحده او حارة واحده الاّ انّه
كان هناك تمايز بين طالب وآخر , كنت اشعر بالتحسّر نوعا ما عندما ارى
الطالب الفلاني انيقا في ثوبه ومنظره وحتّى في خرجيّته ...
السّير ياقديحي ليس ميزته فقط في رخصه وفرق السعر بينه وبين الشنطه
بل انّه كان العلامة الفارقة بين طالب يستطيع ان يشتري شنطه وآخر لا
يستطيع يعني (مد رجولك على قد لحافك) ...
من اصدقاء الطفولة المدللين واللذين يعتبرون من ابناء الرفاهية ذلك الوقت
وكان زميل دراستي الابتدائيه في مدرسة سلمان , بابل السشخ ابواحمد حفظه
الله ورعاه , فكان اضافة الى انّه من ابناء ذلك الجيل المرفّه كان والده يملك
نخيلا فيه خلايا نحل , وكان دائما ما يهدي الاستاذ الشرس صبري ابوجلاده
قنّينة من العسل فكان هو الوحيد من بيننا الذي يسلم من بطش ذلك الاستاذ وقسوته ..
وبابل مسكين كان دائما يخبرني ان هذا الاستاذ لايستحق ولكن ماذا بوسعه ان يفعل
حتّى يتقي شرّه .

[محمد الفرج]

سلام من الله عليكم

قواكم الله جميعا

على سالفة استاذ سعيد القديحي و الرياضة !

ذكرتونا باستاذ سعيد العمران " إبنو لشيخ فرج واخو للشيخ حسين " ..

كان يدرسنا رياضة بس ايام الأختبارات يسبب لينا الرعب ..!!

كان يهددنا إنه بيجي كل يوم بسيارة و بيدور في شوارع لقديح و اللي يشوفه بره ما يذاكر بيكسره تكسير ..!

واحنا مساكين مصدقين إنه يلف و يدور وحتى لما ناخذ ريال لحلاوة نخاف نروح الدكان نشتري !!

ودام في الرياضة معظمكم درسه استاذ فايز المحيصي مادري البعيصي !!
عاد يبي يلزمنا نلبس فياب رياضة .. عاد انا وكم واحد من الشباب مو مال لعب بس صرنا نجيب لنا ذيك الفانيلة و الصروال و نلبسهم وبعدين مانلعب .. المهم مشى علينا التهديد ..!

كنت اكلم قديحي مرة من المرات عنه فيقول لي هذا قام يتأمر ؟؟!
يقول قديحي : " احنا في ايامنا كان نخليه يجيب لينا فطور من برة المدرسة ونخليه يشتري له فطور على حسابنا و ساعات نغالطه في الحساب و نخليه يدفع http://www.qudaih.com/music/new2/pics/smile/08.gif "

و إن كنت تعني باستاذ الرسم السوداني استاذ فريد فهذا ليه مواقف ، نخليها للرد الجاي إن شاء الله ..!

وعلى فكرة استاذ الرسم عبدالله اللباد كلما اشوفه يسلم عليك ياقديحي .!



هذا لستاد شغلته يمر على الفصول واثناء الحصص
ويسأل ايّ مدرس , هاه عندك احد مشاغب تبغاه ينضرب , وياويله ياسواد ليله اللّي
يطيح تحت رحمة مسطرته



غربلك الله كليلوه
وذكرتني باستاذ ساق الله على قولتهم مع إنه مادرسني بس الكل يشهد له بالإجرام !
أويلي على الاساتذ الحين كل يوم تقرا بالجريدة طالب كافخ استاذ ومادري شو !!

ذيك السنة طلع استاذ من اهالي الضرب و لقى سيارته داير مدارها اعواد شخّاط مدخلينه بين الزيگ !! http://www.qudaih.com/music/new2/pics/smile/06.gif خوش تهديد هاه ؟!

وياكليلة بالنسبة للسير بعد ما انتهت موضته كنا نشيل الكتب على ماهي بدون شي .. بعد فترة الله يغربلهم منعوا هالشي بعد وصار لازم تجيب شنطة !! فمالنا إلا شنطات دبلوماسية ..!
صار شغل الناس الشاغل ارقام الشنط .. !

المهم وقتها كانوا كم واحد من الشباب مايبوا يجيبوا شنط ..!
مصخت وياهم مع الادارة .. آخرها جو أخذوهم من الفصل و بعد نص ساعة جوا كل واحد بشنطته .. قالوا للمدير إن احنا ماعندنا فلوس و ما نقدر نشتري شنطة فتبرع المدير مشكورا على الشراي ليهم http://www.qudaih.com/music/new2/pics/smile/06.gif


ودمتم بخير

[قديحي]

مرحبا حرف
بما انك ذكرت أستاذ فاير وسالفة السندويش فخلني اقول السالفه بشيء من التفصيل
في ثانوية القديح كانوا يلزمونا بشراء السندويش من المدرسة .. وطلعه من المدرسة وقت الفسحه ما فيه ... ممنوع
واحنا فطور المدرسة ما يعجبنا ... ما يعجبنا الا هات كيك وكبدة وشوربة مطعم حي البستان ... مطعم حي البستان لمن لا يعرفه كان مكانه مقابل مخبز ابوالسعود
المهم تعب معانا المدير والمدرسين .. ولأننا اكبر الطلاب في المدرسه فكانت حجتنا اننا نستحي نصف ويا الطلاب في صف علشان نشتري سندويش
والصراحه كلامنا كان صحيح لأنه اطول طالب فيهم كان يوصلنا الى نص بطنا
الاستاذ فاير وبصفته المسئول عن المقصف اقترح انه يشيل لنا طلبنا كل يوم ونروح نستلمه من غرفة الوكيل ... يعني نطلع من الفصل على غرفة الوكيل وكأن فطورنا خمسة نجوم .. الاستاذ فاير يكون مشغول بالمقصف علشان كذا نحاسبه بعد الفسحه
استملينا نحاسبه كل يوم واتفقنا ان الحساب يصير نهاية كل اسبوع يعني يوم الاربعاء
وتاالي تغير الامر الى ان لحساب يندفع كل شهر
واحنا استغلينا الفرصة احسن استغلال ... ناكل بعشرين ونقول اليوم اكلنا بس بعشره
ومره نقول ما فطرنا
وفي نهاية السنه ما حصل منا لا حق ولا باطل ... نص فطورنا كان ببلاش
والحقيقة كنا نمون على الاستاذ فايز لاننا قدمنا له بعض الخدمات الخاصة وغير كذا كان يعتمد علينا اعتماد كلي في المباريات بين المدارس لأن ما احد يجيب له الفوز غيرنا
فهو كان مستفيد بنا واحنا مستفيدين بالفطور

[كليله]

استاذ عبدالله لبّاد واستاذ انور ابوسلطان لازالا يحتفظان بالكثير
من نظارتهما وابتسامتهما التي كانت ولاتزال هي هي , لم تتغيّر
رغم تقدّم السن , يبدو انهما ورغم المهنة المتعبه , لم يبتليا بطلّاب
يشيّبوا الراس , كما انّ للمادة التي كانا يدرّسانها وربّما يكون كلامي
صحيحا اثره الواضح في اراحة النفسيه التي لازالا يتمتعا بها الى اليوم
نسأل الله ان يديم عليهما هذه النعمة .
استاذ سعيد العمران الله يحفظه نظامي الى وشديد الى ابعد الحدود , قدم
من بيت لم يعرف الحرمان وجاء مدرّسا في قرية معظم طلاّبها على قدّ
الحال ذالك الوقت فصار يملي علينا طلبات وشروط لم تكن لنا طاقة عليها ..
منع الحضور بنعال الزنّوبه منعا باتّا , فكان كالمارشال الله يذكره بالخير
يحوم علينا بعصاته وقت الطابور الصباحي يفتّش عن اصحاب الاظافر
الطويله ونعلة الزنّوبه , وياويله من يراه وقتها واقعا في احدى اثنتين ..
(طراقاته على الرّقبه توجّع) , في احدى الطّوابير الصباحيه وقبل ان
يبدا تفتيشه المعتاد انتبهت بسرعة الى اننّي نسيت نعالي الجلد ولبست
الزنوبه , ويش اسوي مو وجه نعمه , وطوّالي استأذنت منه قائلا استاذ
نسيت نعالي باروح اجيبه .. وطلعت من الطابور ركيض على البيت
وانا افكّر انّي باجي وادخل الصف على طول وانتهى الامر , اثاريه كان
ينتظرني في باحة المدرسه , والباقي عليكم ...