الشيبان وأنتهاك حقوق الفئران

[نعناع]

اللهم صل على محمد وآل محمد

نرجو أن لا نتسبب في حالة الاغماء وإزالة شبد الكثير منكم
لاننا سوف نتذكر بعض الجرائم الحقيقة التي كانت ترتكب في
مزارع النخيل من قبل المزارعين القداماء حيثو عمدو على قتل
الفيران بطريقة عجيبة .

وبصراحة أنا وباقي الأخوة الاعضاء نريد أن نستعلم كيف كانت
طريقة القتل في الفئران و أنا قدسمعت عن طريقة كانو يعملونها
وهي طريقة عجيبة في عملها وفي كيفية أكتشافة من قبل المزارعين

الغريب في الامر أن طريق القتل لاتحتاج إلى وقت كبير بل كل مافي الامر
ثانية وحدة أو ثنتين وهنا تكون الغرابة والاستعجاب من هذة الطريقة النخلاوية

والامر الاكثر أستعجاب هو ركوب النخلاوي النخلة وعندما يصل إلى رأس النخلة
يكون هناك في العادة عش الفئران ويقوم هو بقتلهم وتساقطهم من النخلة بطريقة
سريعة وعجيبة

لن أتكلم أنا عنها سوف أضع هذا الموضوع إلى شياب المنتدى
وهم كثر وخصوصا ً المدقدقين الاثنين الذين عاشو وحضرو جرائم الفئران
في النخيل سو ننتظر مشاركاتهم حتى يخبرونا

سلام

[فاطمة محمد]

ياعلي ... صفحه بالصراحه ماتنطب

فيران ... وفوق النخل

[كليله]

السلام عليكم
ويش هالنّت اللّي يبطّ الجبد
ودّي احكي سوالف عجيبه وشفتها بعيني لنخلاويين يكتلوا الفيران
اصحاب نعناعوه بطرق فظيعه , بس لا تعتبوا علي ولاتعجلوا بارجع قريب
واعتذر مرّة اخرى .. والله لايسامح اعطال النّت اللي دايما تبعدني عنكم
واسألكم الدّعا .

[ضوءُ شمعة]

ياساتر

ننتظر بفارغ الصبر الأجرام على الفئران

وقصص الأقتحام على بيوتهم

[كليله]

اكيد نعناع ما غلط يوم حط هالموضوع هنا طالما السالفه فيها
عشّه , فشئنا ام ابينا انّ الفئران لهم علاقه حميميّه بالعشيش
ياما قضّضوا الخوص وحفّروا تحت السّاس , والنخلاوي مسكين
ماله شغله الاّ يجدّد في الحضران , ترى الفار عزكم الله مخلوق
بقدر ماهو رزيل وقذر , ايضا مخرّب ومزعج وعدو للفلاح وغير الفلاح
من يقول انّه مايخاف من الفار , ومن يقول انّ الفار رؤيته ما تبعث
على الاشمئزاز لدى الواحد , بل وتدخل الرهبه في النّفس ..
واحد من الشّباب مسكين رايح يتسبّح في نخلهم في اللّيل وهو
جالي في الجصّه ويدندن جاه فار وقرض رجوله , يقول ومسكه من
راسه ومن شدّة الخوف ضربته بقوّه بجدار الجصّه ومات , لكن كلّفته
هالعضّه اكثر من عشرين ابره ...
لو قلت ليكم بتصدقوني ليش لا ما في شي عجب , بعيوني شفت
فلاّحين ايّام تحدير النّخله يركب ويربط ثوبه على بطنه , وهو يحدّر وينظّف
النخله يطلعوا له فيران يقوم يصيدهم وهو يضحك ويحطهم في عبّ الثوب
واذا نزل يقرطعهم واحد واحد ..
عبدالله القايد الله يحفظه وهذا معروف بشجاعته وجزام والله عاطيه الصحه
والعافيه وعليه ايادي الوحده كانها زرّاديّه , وقولوا موصحيح , لكن شوف عين
مو قول قولوه , مرّه في نخيل اسمه البردوي , جاي يشيل سماد وشاف فار
دخل جحره وشفناه لحقه , قلنا احنا ويش بسوّي هذا لاحق فار , الاّ هو مدخّل
صبعه داخل الدّحل اللّي انخش فيه الفار , قام الفار وعض صبع عبدالله اللّي سحب
الفار ومسكه باليد الثانيه ويقرطعه ويموت , يمكن الحين تطوّرت وسائل القضاء على
الفيران , بس لوّل لاتستغربوا اذا سمعتوا عن هالشجاعات لان ماكان فيه وسائل زي
الحين فهم يقضوا على الفيران بهالطّريقه ..
طبعا قديحي ونعناع يعرفوا زين حسينيتنا قبل لاتصير حسينيّه , يوم ماكانت مربّعه
اتذكر جا الوالد واصحابه رحم الله الماضين وحفظ الباقين , واشتغلوا اشغل في الحسينيّه
يبغوا ينظفوها وصارت مقتله عظيمه , والله ما انساها للحين , صادوا وقتلوا فيران لاتعد
ولاتحصى , والصخّين طبعا كان ليهادور داك اليوم ..

[اوليفر]

موضوع لطيف وحلو كعادة مواضيع نعناع
لكن شكل الفئران المقتولة موجودة فيه
ولن هذا لا يعني ان الموضوع ما ينطب كما ذكرت قديحية
فافئران معنا ويسكنوا معنا في البيوت قديماً ولا هروب من ذكر السوالف المتلعقة بهم
اعجبني بكل صراحة مصطلح يقرطعهم الذي قاله المشرف كليلة
وعلى حسب ما اسمع فالطريقة التي يقوم بها كل أكثر ركّاب النخيل هي مسك الفار وقرطعته اي تكسير عظامه بواسطة اليدين وهذه الطريقة كفيلة بقتل اكبر واضخم واشجع واقوى فار

[نجمة ليل]

مساكين الفيران يكسروا بالخاطر :105:

[كليله]

اوليفر تخيل نفسك ماسك فار وتقرطعه تقدر
اكيد بتقزز , يعني تخيّل كيف اهل لوّل يصخوا
يسوّوا هالشّي .
نجمة ليل من جدّك والاّ تمزحين .

[محمد الفرج]

سلام من الله عليكم ..!

قواكم الله كلكم

لول يجيني سؤال ليش فيرانا سودان امكحلفين وفيران امريكا بيضان " مال المختبرات " ؟! سؤال حيرني ايامها !!

بس على سالفة الفار نجيب لكم سالفة جديدة مي قديمة .. اشي عشر سنين ..

كنت جاي من المدرسة في أمان الله ..

إلا واحد من جيرانا الله يرحمه و يحسن عليه ماسك بروش بيد وخيشة عيش بيد ..!!

من شافني جاي استانس ..

عطاني الخيشة و قال لي ذانا باخوش ورا لفريز و انت افتحها و اتلقى الفار !! أنا قلت ليه مالي شغل جيب البروش وخل الخيشة عندك ..

فلت الكتب وعلى طول عطاني لبروش وقال لي خوش ورا لفريز اللي بمحله و هو من جهة ثانية بيفتح الخيشة و بيتلقى الفار ..!!

قمت اخوش بذيك لبروش ولا طلع شي .. !!

قعدت اضرب بعصاة لبروش على لفريز لين طلع و مسك عليه جارنا بالخيشة ..!

جارنا الله ايهداه قام يعصر في الخيشة من فوق لتحت يبي يصيده و يعصره ..!

طلعت الخيشة مشقوقة من تحت و الفار نزل و انحاش و جارنا بعهد يهوبش في ذيك الخيشة و مستغرب إنه مو شايف هالفار ..

أنا من الضحك رميت لبروش وشلت كتبي ورحت البيت ..!

يعني لو رصعه في الخيشة ممكن اتعذا يومها لو الأعظم ممكن ..... ؟!

الله يرحمه برحمته و المؤمنين و المؤمنات

و دمتم في اللطف

[ملاذ]

هههههههههههههههههه
الفيران
مقززيييييييين
وملاعين
قرطعوهم وصيدوهم
بس
تكفووووون
بعدوني عنهم

[سحر رباني]

سلامٌ عليكم

صحيح موضوع يزول الشبد ، لكن له ذكريات جميلة ..

اتذكر الاول جدي الله يرحمه يحط لزاق في ورقة علشان الفيران ببيتهم، واذ لزق الفار نسوي حفلة واحنا خايفين كلنا نطالع كيف بيقتله ، ولان جدي مايحب الفيران فكان مايمسكهم بأيده ابداً كان يمسك الفار بمنقاشين كل منقاش بأيد ويطلع برى البيت ويقرطعه ويرميه ويرجع وكأن شيئاً لم يكن.

لكن للان في شخص في الديرة ، عادي يمسك الفار بأيده ويقرطعه ويرميه،وعادي عنه لو يمر عليه اي رجال ويمد ايده يسلم عليه ايد بأيد ...<< تخيلوا نفسكم بهالموقف ؛

مودتي؛
زينب

[نجمة ليل]

أكيد من جد أتكلم يا كليله
ما أتخيل روح بلحم ودم تنقتل بهالطريقة
صحيح أنهم يقززوا و يخوفوا
لكن طريقة قتلهم قاسيه شوي

[كليله]

لا هي قاسيه ولا شي انتي الظاهر
قلبك ارهيّف , مخلوق مسخ زي الفار
يستحق ان يقتل بأبشع قتله حتى
يصير عبرة لغيره من الفئران ..
وانتون اشغلتوا بقرطعة الفيران فما بالكم
باللّي بيركب نخله وهو محزّم ثوبه على
بطنه وبيحط الفيران في عبّه , يتجوّلوا داخل
جسمه , يدلدغوه ما فيه فايده , يخلّص
تحدير النخله وبعدين يشوف شغله وايّاهم ..

[ملاذ]

ولنا ذكريات في ذلك ياكليلة مع اشخاص عرفناهم وسمعنا حكاياتهم من اولادهم واحفادهم
ايييييييه ذكريات رحم الله الجميع بواسع رحمته

[كليله]

اخويي ياملاذ للحين , فلاّح طيّب بس شرس ويّا الفيران
جرئ وما عنده اي رهبه من الفيران , همّه انه ينظّف النخله
لانها مصدر رزقه ولو خلّه الفار يرعى فيها على كيفه ما بيصفى
على رطبه , فمن هذا المنطلق تكوّنت لديه الشجاعه ان
يواجه الفيران ويعتبر التحدّي بينه وبينها طبيعي , فهو يركب النخله
وليزمك ويحزذم بطنه وان شاف فار في الفكر يشيله وهو يضحك
صدق او لاتصدّق ويحطه في بطنه المحزّم ولمّا ينزل يشوف
شغله ويّاهم ..

[نعناع]

قوة شباب ........ معذرة عن التأخير

أشكر الجميع على دخوله والمشاركة في الموضوع
شي طبيعي أن النخلاوية يكون قاسيين مع الفئران
وذلك بسبب محاربتهم في رزقهم وما يخلو شي الي
يقرضوه والوضع والضروف الي كانو فيها الناس هي الي
جعلتهم يحاربون كل شي من اجل رزقهم

وربما بعضكم سمع سالفة النخلاوي الذي كان يبيع الدبس
ولما وجد فار في دبسه ماذا فعل لن أتكلم عن باقي السالفة
لاني اعرف بعضكم بيقفل النت وبينحاش بس هذا الواقع كان

والله ويش قولك يا كليله

وين ذاك التعبان قديحي

[أمير الحب]

وهذي حالتنا وياكم
يوم فيران ويوم فشاغد ويوم جعانوا
صاير منتدى قديحيات ما ينطب من الريحة الخيسة
والسبب فيرانكم الا تقرطعوا ظهوركم
ترى قديحي ما جاء لانه يخاف من الفيران خخخخخخخخخ
ولان الموضوع كلع عفان في عفان
فأنا اكره شي عليي في الدنيا اشوف فار مرصوع
مره جارنا النخلاوي شاف فيران صغار في كرتون قام ورصعهم في ايده
ومن عشر سنوات الى الحين المنظر قدامي كنه توه صاير من شوي
الله يرحمهم شيابنا لا خلوا فار ولا جريدي ولا عريس
لو يشوفوهم جماعة الحياة الفطرية كان قاموا عليهم بدعوة عند الجهات المختصة
:a41:
ما يدروا ان النخلة تسوى مليون فار
وما يدروا ان الفار لا يخلي زين ولا شين الا يقروضه :b001:
زالت جبدي بصراحه
خلوني اتلطم وارجع لأن ريحة الفيران زادت خخخخخخخخخخخخ

[كليله]

نعناع خللّينا منها السّالفه ماتشوف امير الحبّ هالنّاعم زايله جبده
من هالموضوع الحلو , وخلنا بالعقل الحين فلاّح مسكين ينتظر وقت
الدّبس بفارغ الصّبر والدّبس يعتبر اثمن محصول للفلاح في الموسم
بل ويعتبر عصارة جهده , وفجأة وهو جاي على المسحه يعبّي لبيابه
يتفاجأ بفار فيها يلتفت يمين يسار ماحد شافه الاّ ربّ العالمين طبعا
هو بيحاسبه , بس ويش بيسوّي , بينخل الدّبس والفار في المنخل
او بيخفي الفار ... خللّينا نترك الحكم في هالظّرف وهالحاله اللّي ما
كانت على بال الفلاحالمسكين وذلك للاخوة الكرام ..

[نعناع]

آيه كل هذا عشان توفير لقمة العيش في ذاك الزمن المر

المهم أحنا ننتظرك ياقديحي
لو شطارتك بس على الفشاغد

[فاطمة محمد]

قواكم الله

الفار مستانس يسبح في الدبس والمساكين الناس اللي بياكلوه

[كليله]

لا تخافي ياقديحيه في هواها , بغيت اخللّيكم على اعصابكم ..
الفلاّح يخاف الله ويش سوّى انتين وانت يانعناع ولايهونوا البقيّه
هو مالقى الفار في المسحه , لقاه في الجفره اللّي تصب فيها
المسحه , قام ولغاها وطمرها بالرجم وفتح جفره فانيه يصب فيها
الدّبس , يعني ما غرف من الجفره اللّي مات فيها الفار .

[فاطمة محمد]

الحمد لله رب العالمين

[ميثم توفيق]

هههههههههههههههههههههههههههههههههههههههه ه




غربلكم الله أجمعين
والله هالموضوع مالحقنا عليه
بس زين انتبهت ليه
هههههههههههههههههههههههههه


والله وطلع اسم الخال بعد

عبدالله القايد الله يحفظه وهذا معروف بشجاعته وجزام والله عاطيه الصحه
والعافيه وعليه ايادي الوحده كانها زرّاديّه


هاه كليلة ترى عندي ذكريات ويا الخال وتجاااااااااااارب ماشاء الله في هالمجال ويش ...أقوووووول ...؟؟؟؟؟

[نعناع]

هاه كليلة ترى عندي ذكريات ويا الخال وتجاااااااااااارب ماشاء الله في هالمجال ويش ...أقوووووول ...؟؟؟؟؟

أقول ميثم كان عندك سوالف الله يخليك لا تقصر

ننتظرك

[كليله]

التجارب ويّا الفيران مع انّها مقزّزه الاّ
انّها لانخلو من الطرافه .
يالله ياميثم لا تستحي وخلّك عند وعدك
وبانتظار اوّل فار خخخخخخخخخخخخخخخخخخخخه

[حروف مبعثرة]

أي طرافة تلك ايها العزيز كليلة التي تأتي ومعها قذارة هذا المخلوق الكريه المسمى فار

لننتظر حكايات ميثم

[ميثم توفيق]

حي الله الربع
ويش أحوالكم






عاد البطولات مع الفيران ماتخلص سوينا معاهم معارك وملاحم في النخيل
أكيد كليلة ونعناع يعرفوا مكانه، اللي على طريق الطف ألحين انكسح خلاص مامن إلا الهويات تلعب فيه

والله كنت مع الخال في الصف الأول في المعركة وساعده الأيمن والله ذكريات وحماااااااااااس ماينوصفوا والله هههههه

عاد أقول ليكم اليوم استراتيجية من استراتيجيات الحرب اللي خضناها وياهم والباقي وقت فاني :D
ياطويلين العمر هذي الإستراتيجية مستحيل العدو يفلت منها أبدا لأنها محكمة زين مازين
وهذي نستعملها مع الأعداء اللي متحصنين في المغارات (لجحور) نجيب شبك مثل اللي نستعمله حق صندقة الحمام ونسد به (الغار)
وبعدين نجيب صطل ماي كبير ونطمطم داك الغار اتطمطم من لمياهة خوب الفار هالحزة غصبا عنه يطلع :D
إذا طلع الخال ويش ايسوي ديك الحزة يحط لمحش تحت الشبك هههه علشان مايمديه يوطوط راسه إلا لمحش في حنشه :D

والله ويش أقول ليكم حمااااااااااااااااااااااااس ماينوصف حركات والله هذي الإستراتيجة دائما حليفة الفوز
وخسي من أمه الفار ينحاش منها ههههه
.
.
.
.
.
.
ان شاء الله أكمل ليكم باقي لستراتيجيات وقت فاني

[كليله]

في الصفّ الاوّل , لا ومسمّيها معركة بعد
ضحكتني ياميثم , اتخيّلك بعد لابس خودة حرب
وحامل رمح طويل , ومن يمر بك فار تبعجه ..
امرنا للّه , كمّل .. في انتظار بقيّة تفاصيل هالمعركه .
بس هاه .. لا زم ليها اسم هالمعركه .

[ميثم توفيق]

ههههههه
ويش نسوي بعد ياكليلة
هذي نسميها معكة (الغار)

:cool:

[نعناع]

بما أن الجميع ينتظرك يا ميثم
خذ هذا الاستراتيجية مبتكرة جديدة وتواكب
الحياة العصرية الحديثة

شوف لك قاري ومافي نخل يخلى من قاري
وتحط في القاري سلندر غاز وتشبك معاه هوز
وتجلس الدور في النخل على خبوق الفئران
وتوقف القاري وتحط الهوز في خبق الفار
والمهم في ذلك تشوف لك تليل نص يابس ونص أخضر
وتمسكه بيدك اليمن هذا إذا مو أنت عسوامي عاد

المهم تفتح الغاز وتخليه يضخ في الغار
ثواني بس وماتشوف الا الفار فاطس يبغى
يتنفس أنت على طول وبحامي قوتك تخمد أبو الي جابه
بضربة وحدة

وتستمر تدور عاد على باقي المغارات

[ميثم توفيق]

هههههههههههههههههههههههههههههههههههههههه ههههه


الله يغربلك يانعناعوه والله مت من الضحك....قتلتني الله يغربلك ...ويلي ..ويلي
بطني عورني غربلك الله هههههههههههههههههههههه





هذي الإستراتيجية ماكانت موجودة داك الزمن ياخوك كنَّا نسوي وحدة نفس فكرتها بس هذي نستحدمها لمرحلة الإعدام :D

شوف هالإستراتيجية حلوة ومسلِّية





(الإستراتيجية الجنوريَّة )

:cool:


هذي طريقة عادية جِداً لكن الممتع فيها طريقة الإعدام، حركات حركات
طبعا نجيب قفص مخصص لصيد الفيران نحط داخله داك الشمَّام اللي تشم ريحته من بعيد
أو نحط ليهم سمك مشوي، واويلاه جنوووووون والله جنون ديك الأيام
المهم هذا القفص أكيد تعرفوه، ليه باب صقَّاطي إذا يدوس عليه الفار يفتح وإذا فتح ودخل يتسكر ومايقدر يفتحه أبد

طبعا اللممتع بعد في هالأقفاص انهيه اتصيد بالمجموعات، يعني تجيك أيام بالأربعة بالخمسة داخل القفص... ومتربيين عاد العكاريت مو ألحين فيران هالزمن مخصفين مافيهم جوف

المهم عاد، بعد ما نصيدهم بهالطريقة يبدأ الحماس الفعلي والمرح :D

تدري عاد ويش انسوي فيهم هههههههههههههههههههههههههه
الله يرحم أيام (الجنور)
نحطهم هم بالقفص في خيشة اشوار أو خيشة شعير فاضية، اونربط الخيشة بكنداسة الجنور ههههههههههههههههههههه هههه - وادعس ريس قال ادعس- ماتجي 5 دقايق بس إلا هم مسدَّحين تسديح



وبعض الأحيان مانخليهم يموتوا عدل، يعني إذا باقي علهم ثواني على الموتة نفتح الكيس ونهدهم هههههه اتقول طالعين من بار هههههههههههههههههههههه
يتدوفعوا يمين ويسار ولا السكرانين يسوو زيهم
لحظات بس وهم مخمدة أنفاسهم بداك التليل على الضهر، على الراس، وين ماجى داك التليل جى ;)






انتظروني في الإستراتيجية الجاية

[ملاذ]

هههههههههههههههههههههههههههههههههههههههه ههههه


والله موتوني من ال ض ح ك
ههه ههه هههههههههههه

نتابع ولا زلنا

[كليله]

قبل لاتكمّل ميثم
هل تعلم انّ الفأر انتقامي
وهذه قصّة حصلت فعلا لشخص زميلنا من المدينه
كان عنده مكتب اراد ان ينظّفه ولقى فيه فاره بأولادها
وقتلها هي والاولاد , وفي يوم دخل الحمّام وانتون بكرامه
يقضي حاجته فانقضّ عليه الفار ابوهم وقروضه وبقى
في العناية فترة طويله وزين مامات ..

[ملاذ]

يا ساتر يكليلة
اكره الفئران
لدرجة القيء

سبحان الله

[قديحي]

ما نبغي نخليكم تتقززوا
لكن سنة من السنوات وفي البيت القديم كنت جالس بأمان الله في الحمام
الله يكرمكم ويكرم جميع من يقرأ هالرد
مساحة هالحمام متر في متر
وفجأة طلع فار من المرحاض وقام يلف ويدور في الحمام , مو عارف يرجع الخبق ولا عارف يطلع بره وتخيلوا قديحي ساعتها ويش كان موقفه
قاعد يتنطنط حق لا يصيبه الفار وهو مو عارف يتصرف


كليله ما قلت لينا الفار قروضه في وين ؟ خخخخ
ميثموه حرام عليك الا تسويه في الفيران
ترى يوم القيامه بيشهدوا عليك ويمكن الفيران يحطوك في خيشة ويغووك

[نعناع]

سلام

أظهار بيحقدو علينا الجنس الآخر بسبت
هالموضوع خليكم في القتل العشوائي

قديحي يا خراب هالمدن
سنع وزارتك

توني واصل العمل بشرب واحد قهوة
بنزبط هالراس وبنرجع

[ميثم توفيق]

سلام ياحلوين
ويش أحوالكم










اليوم جايب ليكم استراتيجية متتتتتتتتتتتتتتتتعة وااااااو، حلوة حلوة
بسيطة ومسلية






الإستراتيجية(العقبية)

عاد هالإستراتيجية بعد الحلو فيها والمميز طريقة الإعدام :D والله ويش أقول ليكم حماااااااااااااااااااااااااااااااس
طبعا بعد مانصيد الأعداء بالقفص اللي ذكرناه في الإستراتيجية (الجنورية):cool: ويش نسوي ههههههه
نحط القفص في وسطة العريش ونجيب لينا (عقب)ياااابس ونقعد عاد نقضي ديك العصرية نتسلى وياهم
ضرب تخبيق فيهم بالعقب وين ماجت جت بعد - بعض من الناس بيصير وجههم كدا ألحين :eek:
:rolleyes: عادي عادي
المهم عاد ديك العقبة بعض الأحيان تجي في لعيون هههه وبعض الأحيان البطن، الأذاين، الرجايل، البووووووز
هههههههههههههههههههههههههههههههههههههههه ه
بعض الأحيان يعني أنا أقول بعض الأحيان تطلع العقبة من الجهة الثانية خخخخخخخخخخخخخخخخخ




حركات هاه
أعتقد هالإستراتيجية ماحد سواها
هاه نعناع ويش رايك بهالإستراتيحية
تعجبك ;)

[كليله]

يعني انمت بهالشّكل تتلذّذ وانت تشوف الفار يموت ببطئ
بس تبي الحق ياميثم هاذي طريقة الخوّافين
ويش رايك باللّي ياخذ الفار ويمسكه من نصّه ويقرطعه ..
او اللّي يلحق فار الى دحله ويدخّل صبعه ويقوم الفار يعضّه
فيقوم هو يخرج الفار وهو عاضنّه ويمسكه ديك المسكه ويضربه
على ايده الثانيه سمّيها , الاستراتيجيّه (الزنّيديّه) ..
او انا شفت بعيوني اللّي يركب النخله يحدّر العدوق ويحزّم ثوبه
اسفل البطن وكلّ فار يصيده يحطّه داخل بطنه وهو حيّ واذا نزل
مسكهم واحد ورى الثاني وورّاهم صنع اللّه .
عسى بس مازالت جبودكم .

[ميثم توفيق]

هذي الإستراتيجية ياكليلة كنت أشوفها
وكنت خاشنها لآخر شي
بس انت ألحين قلتها
نعم شفت الواحد يمسك الفار من راسه ومن دنبته
ويمغطه ديك المغطة المحترمة، ومنها مايقوم
وشفت بعد الحركات اللي فيوق النخلة :D