سواليف قديحيّه ..

[كليله]

http://334433.net/moz/Momayaz.gif


اعزّائي السلام عليكم ورحمة الله وبركاته
تعالوا بنا نحاول ولو بمجهود بسيط ان نرقى بمنتدانا هذا الى
التنوّع بعيداً عن محاولات التقليد , نحاول ولمَ لا ربّما في البداية
قد نخجل ولكن قد ننجح فيصبح هذا الموضوع او ذاك سبقاً لم يصل
قبلنا احدق اليه ... اخواني كلّنا نعرف انّ القديح بتاريخها وماضيها
الجميل لاتخلو من حكاية او قصّة او واقعة سواء في بيت او فريج او
نخيل وغير ذلك من المكانات , فكانت ولايزال معظمها مضرب امثال
وسواليف يتناقلها النّاس في مجالسهم حيناً بعد حين وجيلاً بعد
جيل , يفخر بها من ارتبطت تلك الحكاية بسلالته , ويستمع اليها
بكلّ انصات واجلال كلُ ذي لبّ ... اذن من منّا لم يسمع بحكايه او
سالفه او واقعة سواء ترتبط بانتماءه العائلي او القديحي على وجه
العموم , وهنا بودّي ان نسولف ايّ سالفه سمع بها احدكم من دون
تردّد او خجل او ملل , وسوف ابدأ انا بسرد بعض السّوالف عن حجّ
جواد رحمه الله , لن اتأخر عليكم ولكن بودّي ان اقرأ شيئا ما عن رأيكم ..
تقبّلوا تحياتي .

[كليله]

السلام عليكم
اصحوا يانايمين ....
حجّ جواد هذا الله يرحمه من رجالات الدّيره المشهود ليهم
بالشّجاعه والنّدى , وبالاضافة الى انّه كان شجاع كان جزّام
ومايخاف , قلبه قوي ومايهتزّ ... اوّل حكايه من حكايته في ذاك
الزمان وفي ليله من ليالي لشتا البارده والممطره , وتخيّلوا برد
وشتا ومطر قوي وليل مظلم ولوّل مافيثه كهربا ولانور , حجّ جواد
كان عنده اصحاب في التّوبي وفي ليله كان يعتم عنده ولمّا اراد
العوده الى الدّيره وقت الفجر وهو راجع على طريق مقبرة العابدات
شاف شي غريب يتنطّط بين لقبور ولانّه كان جزّام ومايخاف دخل
المقبره ولحق المخلوق اللّي قاعد يتنطّط وصاده اللّي هو دجاجه
وبعد ماصادها احضرها معاه البيت وحطّاها في قفص ونام , واصبح
الصّباح الاّ والدّجاجه بعدها تتنططّ في القفص , لفت انتباهه هو واهله
هالشّي وقال اكيد فيه سبب يخللّيها تسوّي كدا , مسك الدذجاجه بعد
ما اخرجها من القفص وقام يتفحّصها وشاف في راسها المسكينه مغروزه
اربع ابر في كل جهه ابره , ولمّاشالهم يقول ركدت الدّجاجه وارتاحت ...
عسى بس تكون السالفه عجبتكم واعتقد انّ لها مغازي وربّما تكونوا قد
فهمتم بعض الشي عنها ... بانتظار مروركم

[نعناع]

مراحب بك و بقصصك الممتعة يا كليله
وأنا من جد أندمجت مع السالفة
وأنا أنتظر التكمله

لكن خلينا نخمن على سالفة الدجاجة شوي

انا أقول أن الدجاجة محطوط فيها عمل إلى أحد الناس

يالله نصبر :)

[ورقة التوت]

قصة مرة حلوة
وبالخصوص وهي تتنطط هذي مرة عجبتني


سلمت يمناك

[قديحي]

الله يرحم حجي جواد
ويرحم الدجاجة ويرحم الشخص الا مسوين له العمل :a69:
الظاهر كلهم ماتوا

اليكم قصة طريفة من قصص ابوحسين طول الله في عمره
أبوحسين مشهور بخفة الدم وبروحه المرحه , يوم من الايام مر على بقالة عباس مرار وشاف عربية موقفه هناك يستخدمها عباس لاغراض البقالة , أبوحسين ما كذب خبر واخذ العربية ووداها وياه النخل حق يستعملها هناك ,
عربية وببلاش من يعيفها :)
المهم دارت الايام وصادف مرور عباس مرار على النخل وشاف عربيته هناك
فقال الى ابوحسين من وين لك هالعربية ؟
قال ابوحسين هذي عربيتي
عباس : كيف علربيتك ووهذاهو مكتوب عليها عباس مرار
قال ابوحسن لما شاف روحه تورط , انا ما ادري , جيت اشخبط عليها بالقلم وانكتب عباس مرار
:a05:

ملاحظة : ابوحسين امي لا يقرأ ولا يكتب

[كليله]

تسلم ياقديحي
دائماً تفهمني , وهاذي بداية حلوه لتشجيع وترغيب
باقي الاخوة الاعضاء حتّى يسردوا لنا حكايات يعرفونها
من التراث القديحي , بشرط من التّراث وليست ممّا
يحصل هالايّام , لانّي اخاف نعناعوووه كالعاده توّه قاعد
من النّوم ويجيب لينا سالفه عن التفحيط ..
شكرا قديحي مرّه فانيه على هالقصّه الطريفة متمنيّاً
استمراريتك بس لو تبعد ورى ورى شوي , اكيد جدّك
الله يرحمه مايخلى من السّوالف وان ماجبت سالفته
ترى انا عندي عنّه سالفتين ...

حجّي جواد والجنّي
الله يرحمه ومفل ماقلنا كان جزّام ومايخاف وهاذيك اللّيله
بعد معتم مع ربعه في التّوبي ويوم عزّم على الرجوع للدّيره
وفي وقت متأخّر واللّيل حندس ويخوّف لوّل , ماتسمع الاّ اصوات
يجيبها الهوى من هنا ومن هنا وبرد ومطر , وما قدر حجيّ جواد
يواصل للدّيره في هالجو , واثناء مروره على مسجد العابدات
فال ليش ما ادش واستريح لي اشوي لين يصبح الصّباح , دخل
المسجد وكان ظلممممممممممه لحدّه , وبينما هو يمشي
عثرت رجوله بواحد نايم , الاّ هو رافس حجّ جواد وهو يقول له
ماتشوف , قام حجّ جواد بعد ورفسه وقال له : وانت بعد ويش
مجيبنّك تنام هنا ... واخذ طوله في المسجد ونام , ولين اصبح الصّباح
قعد يصلّي وما شاف الشخص هاذاك , وواصل طريقه للديره ..
ويش رايكم احد عنده هالجزم اللّي عند حجّ جواد ..
وبعد في في عندي كذا قصّه عنه احلى من كده , بتقروها
قريب , اتركم على خير ومع السّلامه .

[قديحي]

الا ويش عنده حجي جواد هذا مطيح في التوبي
لا يكون ناوي يتزوج وحده منهم
اكيد روحاته وسهراته هناك الى غبشة الغباش مهي لله
شوف يا كليلة
انا بريوس شوي على ورى وبرجع الى مصادري الخاصه واجيب لك كم سالفه تشبه سوالف حجي جواد وسوالف جدي الحجي علي هذي عليك ومن ناحيتي بحاول اجيب كم سالفة عنه بعد

[ضوءُ شمعة]

يالله
سوالف جدددددددددددددددددداً شيقه ورائعه

الله يرحمنا00 إلي ماعندنا سوالف زي الناس
بس
مدام المشرف كليله موجود والأخ قديحي مع الباقي
اكيد بنستمتع بقراة سوالفكم القديحيه


موضوع جداً رائع
الله يعطيكم ألف عافيه

[فاطمة محمد]

وعليكم السلام والرحمه والبركه والمغفره والرضوان
أهلاً وسهلاً بك يا كليلة ..
بصراحه هذا الموضوع من مواضيعك الجميله التي تُشكر عليها
وسوالف حلوه .. و قديحيه مستانسه بالجلسه وياكم
يعطيكم ربي ألف ألف ألف عافيه

[كليله]

تصدّق ياقديحي رغم انّه مطيّح على قولتك
في التّوبي , الاّ انّه اخذ فنتين على مرته
لقديحيّه وحده من لخويلديه وجابت له حجّ
صالح ولايزال موجود , والثالثه من حلّة محيش.
وبعدين قديحي تراني ماخلّصت من سوالف حجّي
جواد الله يرحمه واوعدك انّي اسولف عن جدّك الله
يرحمه بس نخلّص من سوالف حجّ جواد ...
وقبل لاابدأ في السّالفه قبل الاخيره عن حجّ جواد
لازم ارحّب بالاخوات العزيزات ورقة التوت , ضوء شمعه
وقديحيه في هواها واقول ليهم على العين والراس
والرحب والسّعه , انتون داخل العشّه واحنا برّاها ..

فيه سالفه صغيرونه عن حجّي جواد الله يرحمه
قبل لا اجيب السّالفه المثيره واللّي بتعجبكم
واللّي بها بنختم سوالف حجي جواد وبتفتر لغيره.
طبعا مافينا واحد مايعرف الوادي ودكان اللّي صار اسمه
الحين مركز آل البيت (عليهم السلام) .. هذا الدّكان
كان مكان الجزّارين اللّي يبعوا اللّحم وداخل هالدّكان
في مجموعة دكاكين لناس من بيت عبيدان وطبعا حجّ
جواد كان عنده محل جزاره , وفي يوم جاب عجله عشان
يذبحها ولمّا سدحها على الارض وحط على رقبتها السكّين
قالت بصوت واضح (( امّاه)) ..اختلع حجّ جواد مسكين واتأثّر
واتراجع عن ذبحها ورجّعها الى مربطها , يقولوا ماذبحها هي
بالذّات لين فارق الحياه ...
ارجو ان تكون السّالفه عجبتكم وانتظروني في سالفه اخيره
وحليوه ومثيره وتاريخيّه تتحدّث عن شجاعة هالرجّال الله يرحمه
ومع السّلامه ..

[قديحي]

أمممممممممم
أنا متأكد ان الأمر مجرد وهم
فمجرد خوار البقره سمعه على انها كلمة اماه

اليكم قصة الحجي ابواحمد رحة الله عليه
يقال ولا ادري بصحة القصة أو عدم صحتها ان أبو احمد كان يسقي نخله في الليل
وكان هناك سنور اسود يدور حول المزرعه وحركاته ما كانت تعجب أبو احمد فما كان منه الى ان رماه بحجره وجت على راسه وانحاش السنور يخر بدمانه
بعدين لما رجع الحجي الى بيته العشيش ونام جاه مجموعة جن واخذوه الى باطن الارض لمحاكته لأنه ضرب ابن ملكهم الا كان متلبس على هيئة سنور اسود
ولأن الحاج ابو احمد ما كان يقصد ايداءه فتم الاتفاق بينه وبين الجن على ان لا يتعرض لأي سنور اسود والا سيكون عقابه الموت
بعد هذه القصة مرض ابو احمد لمدة اسبوع من روع الا شافه من الجن
القصة حدثت في مزرعة اسمها لمعامره في غرب الديره ,
نفس المكان الموجود فيه المأتم النسائي المركزي الحين
هذا والعهدة على الراوي

[ضوءُ شمعة]

يالله
مي طبيعيه الأقصوصات الي تذكرونها
رغم قصرها إلا أنها مفعمة بالتشويق والحماس

الله يعطيكم العافيه

[كليله]

قديحي
يمكن يكون وهم ليش لا
والعهده بعد على الرّاوي ..
وشكرا لضوء شمعه على تواصلها معنا وان كنت
اتوقّع انّها وقريناتها سيتحمّسن في آخر المطاف
وسيأتين بقصص من هذا النّوع عن طريق جدّاتهن
او امّهاتن .

[كليله]

آخراً وليس اخيرً (( حجّ جواد وعبد البدو ))
وكما اخبرتكم عن حجّ جواد وقلت ليكم انّه جزّام وشجاع ويعدّ من رجالات
الدّيره الشّجعان ولكن رغم انّه يمتاز بضعف البنيه الاّ انّه عليه اعصاب تفلّ
حتّى الحجر حتّى يقال انّه يضرب عروة الجرّه خربوق ويطيحه ..
مااطوّل عليكم , ايّام عموديّة السيّد حسن ابوالرحي ابوسيد رضي رحمهما
الله واللذي صار عمده فيما بعد , وبعد ما هدأت النّعرات مع البدو واصبحت
العلاقات وان كانت زينه الاّ انّها لاتخلو من الحذر , طبعاً البدو ملكوا نخيل اللّي
اسمه الهمال والّذي يقع جنوب الدّيره وفي يوم وجّهوا دعوة للعشاء للسّيد حسن
واللّي قبل الدّعوه وحضر مع حاشيته ومن ضمنهم حجّ جواد , واثناء ما كانوا جالسين
بانتظار العشا كان العمده السيد حسن جالس والى جواره حج جواد وباقي الرّبع
وكان عند البدو عبد يتباهوا به وببنيته الجسمانيّه يعني نخريت وصار هالعبد زيّ اللّي
يستفزّ السيّد وجماعته , رايح جاي جاي رايح يستعرض عضلاته يمكن طبعا بأيعازمن البدو نفسهم , السيّد ماتحمّل هالاستفزراز وقال لحجّ جواد : جواد قوم له , قال جواد : انا ياسيّد
قل : ايه انت , قال جواد : اناما اقدر عليه تبغاه يقتلني , قال : العمده اقول لك قوم له يعني
قوم له تقدر عليه , دانا باخذ لك الامان من اسياده وتقوم له ...
قال السيّد لشيخهم : ياطويل لعمر حوش عنّا عبدك هذا عاد والاّ باخللّي واحد من ربعي
يقوم له ويأدبه , قال شيخ البدو: وعندك من يأدبه , قال: السّيد نعم بس تعطونا الامان
قال شيخ البدو : لكم الامان ...
جواد قوم له يقول العمده , قام جواد وصار وجها لوجه والعبد , قال جواد للعبد : من وين تبي
تمسكني , قال له من الرّقبه , وانت من وين قال جواد : من الظّهر ...
بس مسكه من ظهره وقرطعه له ديك القرطعه كان يفلته الاّ هو ذاك العبد طايح يتعفرت ..
البدو صاروا في حالة ذهول ماهم مصدقين , واحد منهم ما تمالك اعصابه بيرفع سلاحه
جماعة السّيد حسن بعد ماراحوا الاّ باسلاحهم لانّه رغم الصّلح الثّقه معدومه من الطّرفين
قال السيّد : ياشيخ هاه مو عطيتنا الامان , قال نعم .
ورجع السيّد وجماعته وحجّ جواد واللّي صار مضرب مثل في الشّجاعه , لكن ياجماعه مو
شجاعة الحمق والغرور , الشّجاعه القديحيّه الاصيله ..
عسى بس عجبتكم .. نراكم على خير ومع سواليف قديحيّه جديده ان شاء الله .

[زوزو الحلوه]

وااااااااااو
قصص روعه وحماس
بس أني ماعندي سوالف
ننتظر سوالفكم
الله اوفقكم....

[نعناع]

كليله قصص جميلة
وخصوصاً القصة الي مع البدو
وأتمنى منك أن تكمل لنا
لينا نشوف لنا شايب نتنركش به
ويعلمنا كم قصة

تابع أحنا معاك

[مخفوقة بالزبدة]

يعطيك العافيه كليله
عالقصص المشوقه
وتسلم القديح و أمجادها
ورحم الله أبطالها القدامه..:)
وبأنتظار المزيد.
..
.

[كليله]

(( جد قديحي وابن عجيّان ))
وبما انّ قديحي مستمل يكتب عن جدّه واعطاني زمام المبادره فأنا لي الشرف
العظيم ان ااكتب ولو شيئ قليل ممّا اعرف عن هذا الرّجل المؤمن والذي له
فضل كبير على اولاد فريقنا حيث كان والد للجميع , ولا انسى ديك لايّام واحنا
جالسين داخل البيت ومن يمرّ نسمع فرقعة نعله رحمه الله , نقوم نفزّ واحنا قال جا
حجّ علي , جا حجّ علي , نلحقه ونسلّم عليه فيقابلنا بذاك الوجه المليئ بالحلم والمشرق
بالنور , وهو يقول هلا اولادي هلا اولادي ... اسأل خالي الله يحفظه وهو من الناس اللي
صاحبوه وجالسوه وهو جاره طبعا , ليش حجّ علي اذا مشى نسمع قرطعة نعله قال
من قوّته واذا مشى مايرفع راسه ابد وبشته لسود كلّا في ايده رحمه الله .. من الاشغال اللي اشتغلها حج علي الله يرحمه مثل مايقولوا ريّس على صبيان او عمّال في
نخل في حلّة محيش , ولوّل كل بين فتره والثانيه تصير غارات ليليّه من البدو على اهل
لنخيل لسرقة تمورهم , وحج علي الله يرحمه ومثل ما قال عنه خالي رتعي شيمه ونخوه
وشجاع , وفي ليلة كان هو والصبيان نايمين في النخل اللي يشتغلوا يه سمعوا استغاثة حرمه
ورجلها عل مقربة منهم ففزعوا لهم وانقذوهم وخلّصوهم هم وحلالهم من البدو السرّاق ..
لكن مع الاسف ما ندري ويش الّي صار الحرمه الله هداها بدل ما تشكر حج علي وجماعته
عل صنيعه تهمت انّه جاي بيعتدي عليهم , وحضّروهم عند بن عجيّان , لكن بن عجيّان يعرف
حجّ علي زين وما هو حق هالمشاكل , فأمر لفداويته انهم يجيبوا المره وزوجها ويخليهم
يعترفوا بالحق , طبعا خافوا من بن عجيّان بمجرد ان سألهم والذي عرف بهيبته , فاعترفوا
بذنبهم , لكن بن عجيّان ماتركهم وحط فيهم دست لين اتشفّع فيهم حجّ علي وخللّاهم يروحوا ..
والى قصّة اخرى عن حجّ علي وهي عن البدويه والدّيك تقبلوا مني كل التحايا .

[قديحي]

ما يصير هالكلام يا جماعه
لا تعليق ولا حتى كلمه عن بطولات حجي علي
ما هقينا منكم يا اخواننا
واصل يا كليلة واصل ونحن لك متابعين

[كليله]

من وسائل العلاج لوّل ان لم يكن من اهمّه وانجعه
هو الكي , بس هاه , مو اي واحد يقول انا اعرف اكوي (ج)
يعني بالعربي تسمعوا مثلا في ارامكوا يمدحوا كذا موظف
ما فيه مثلهم وماينعدّوا على الاصابع فيقولوا عنهم (هذا
يلحم البيب) والبيب في مفهوم ارامكو هو بيب البترول وهو
اهم شي فيها لانذ البيب لو ما انلحم عدل بيسبّب مخاطر
مي زينه ..
حجّ علي الله يرحمه كان من الناس اللّي يكوي , وخصوصا
عن داء لجليجل وهذا الدّاء اذا صاب واحد يبوسره (حلوه يبوسره)
يخلّيه ما يقدر يتحرّك ولا يشتهي ياكل اويشرب يعني بالعربي
يخصّف ( وحلوه دي بعد يخصّف) واخطر شي اذا صاب الجهال ..
فثيه وحده بدويّه ايّست من ولدها اللّي صابه لجليجل وماخلّت به
طبيب او مستشفع (على قولة الشيّاب) حتّى ناس اجاويد
حدّوها على حجّ علي الله يرحمه , وراحت له , والولد ياعيني
رايح فيها بيموت , والام مئيسه منه , وحج علي يقول ليها انتين
توكلي على الله واجزمي والحين بيصير زين ...
حط حج علي صيخ الحديد في سجرة الضّو (هههه حلو بعد سجرة
الضّو) والاّ ذاك الصيخ احمر , وقال مسكوه زين وبرزوا لييّ رقبته
(حلوه برزو رقبته قديمه واجد) يبغى ليها جزم ودقّّه من الكوّاي ..
حط حج علي الصيخ في رقبة الجاهل (تشششششش) يقول
الصّيخ , اغمي على الولد صاحت امّه , قال حج علي مافيه الا
العافيه , جب عليه شوّية ماي , والاّ ذاك الولد قام زي الحصان
يسأل عن الاكل , الام من فرحتها ما عرفت ويش تقول لحج علي
الله يرحمه وبويش تجازيه , عطته فلوس وديك , حجّ علي مابغى
لفلوس , اخذ الدّيك بس قالت له ليش , قال عشان انّه يأذّن ..
والى سالفة اخرى

[قديحي]

حلوة كلمة ( تشششش ) كليله
الله يكفينا عذاب التششششات
سالفة التش هذي ذكرتني بصديق كان يعاني من مرض ابوصفار
والمعروف ان ابو صفار علاجه الكي فرحت معه الى المعالج الشعبي المشهدي في عنك قبل حوالي عشر سنوات
المشهدي كان معروف على مستوى القطيف كما الحجي علي مشهور على مستوى الديره ولأن المرضى الا يزوروه عددهم كبير فكان يخلي الحوي الخارجي للجلوس والانتظار والعلاج يكون في المجلس , شخص المشهدي حالة صاحبنا المرضية وقال له ان علاجه الوحيد الكي فوافق لأن ما كنا عنده خيار ثاني
شغل الشمهدي ديك الدافور الا صوتها يوصل الى سابع جار وحط الصيخ عليها وفي هالفتره كنا ننتظر في الحوي
صاحبنا يسمع صوت الدافور وهو يبالع لكنه كان يشجع نفسه ويقول ما فيه شي الاهم ان ابوصفار يروح
لما جاء دوره ودخل وشاف الصيخ تغير لونه من الاسود الى الاحمر هون وقال ما ابغى العلاج
بلاوي ابو صفار ولا حرقة هالصيخ وبلا تششش وبلا خرابيط

سالفة جديده حلوة عن الحجي علي , والحجي علي كان مرّاخ ولما كنا اطفال كنا نشوفه اكثر من مره يسوي جباير الى المكسورين اياديهم ورجايلهم , جباير جمع جبيره وهي عبارة عن قطع اخشاب صغيره مع حبال تربط وتقوم مقام الجبس في الوقت الحالي

بخصوص الأذان فالحجي علي كان يأذن في برندة البيت ( البلكونه ) قبل وفاته بعدة سنوات والمعروف ان الأذان ايضاً ارتبطت بعادات معينة حيث كان يرفع صوت الأذان لوداع الحجاج والمعتمرين والزائرين حتى الله يوفقهم وتحل البركه ويتقبل الله منهم اعمالهم وزياراتهم

لي عوده
وشكرا كليله مرة اخرى
وياليت تتكلم وتقول لنا كم قصة عن عمك الملا لأني اعتقد ان عندك الكثير عن هذا الرجل المؤمن

[كليله]

اهلا قديحي ..واهلا بقيّة الاخوه والاخوات
....((حجّ سلمان يتيم والجراده والعصفور))

يمكن اي واحد يمر بهالقصّة ويقراها يفكّر انها اسطورة او مجرّد
تخريف من تخاريف كليله , لكن هاذي قصّة صحيحه وسبحان
الله القادر على كل شئ الذي يرزق الطير في الهوى والنمل في
الصخر , حجّ سلمان يتيم الله يرحمه ابوعبدالكريم يصير جد الاخ
سامي يتيم رئيس النادي حاليًّا من جهة الاب , كان من ضمن
النّاس اللّي ينظفو عين الصدريّه بين كل فتره واخرى , وتعرفوا عين
الصدريه واهميتها وانها كانت تغدّي مزارع لقديح لوّل فكانوا اهل
الدّيره ينظفوها كل فتره .
حجّ سلمان واثناء كل مره يجي ينظّف العين لفت انتباهه جراده
تجي وتدخل في دهاليز العين وتغب تغبّ ولا ترجع واستمر الوضع
على هالمنوال , كل مرّه تجي جراده وتروح في ظلام العين ولاترجع
وفي مرّه اومرّتين شاف الحجّي ان الجراده انقطعت , قال لازم اعرف
السالفه وين تروح وليش , ومشى حجّينا الله يرحمه في نفس المسار
اللي كانت تسلكه الجراده ووصل الى صخره ولقى عليها عصفور ميّت
ولأنّه كان من لرجال المؤمنين واللّي عنده معرفة بأن الله عزّ وجل ما
يترك دابّه مايرزقها , عرف انّ هالعصفور المسكين كان اعمى ولجا سواء
من طريق الصدفه اوغيرها الى هالمكان ولكن الله ماتركه وصار يرسل كل
يوم جراده يقتات عليها , ولمّا مات العصفور انقطعت الجراده ..
سأل امير المؤمنين عليه السلام .. اذا سدّت الابواب عن رجل فمن اين
يأتيه رزقه قال عليه السلام ( يأتيه رزقه كما يأتيه اجله )

[حروف مبعثرة]

ليس ذلك بغريب على الله اخي كليله
فهو يرزق الحي من حيث يحتسب ومن حيث لا يحتسب
هذه القصه ذكرتني بقصه مشابهه سمعتها في احد محطات الراديو حدثت في اليابان قبل عدة أشهر
بعض البيوت في اليابان تصنع من الخشب ويكون فيه فراغات بين جدار الغرفة والغرفة الاخرى , غرز احد اصحاب البيوت مسمار في جدار احدى الغرف الخشبيه قبل عشر سنوات وبعد هذه المده اكتشف انه غرز المسمار في رجل سحليه وظلت هذه السحلية حية لمدة عشر سنوات محبوسه بين خشب الغرفتين وهذا الغريب في الأمر
استغرب صاحب البيت كيف عاشت السحلية لمدى عشر سنوات فأخذ يراقبها لمدة اسبوع فاكتشف ان خنفساء تأتي بشكل يومي للسحلية لتأكلها وتتغذى بها
وهذا يتوافق مع قصة الحاج سلمان يتيم وليس بغريب ذلك على الله
موضوع جميل آخر منك كما تعودنا وسنتواصل معك متى سنحت الفرصه

تحياتي لك

[نعناع]

يعطيك العافية كليله على هالسواليف

ومن ضمن السواليف القديحية
أنه هناك رجال من أهالي القديحي كان يعرف بالقوة البدنية
كان يحمل ثلاث قليل تمر
وحدة في يده اليمين وحدة في يده اليسرى والثلاثة كان يحملها
ببوزه هذا الرجل توفي قبل سنة تقريباً ويعرف بحجي حسن

[فاطمة محمد]

عليكم السلام والرحمه والبركه والمغفره والرضوان

ربي يعطيكم العافيه على هالسوالف الحلوه
ويرحم جميع المؤمنين والمؤمنات
ولايحرمنا من سوالفكم

[نعناع]

كليله خلصت السوالف
شوف لنا كم سالفة
خلينا نستانس فيها