سوق الاربعاء متعة حقيقية

[أميرة الجنة]

مرحبا بنات
بصراحة الله رزقنا في الديرة بسوق السبت والاربعاء واحلى ما فيه انه ما نحتاج سيارات لا ودونا ولا جيبونا
اتوقع ما فيه مره في الديرة ما تروح السوق وحتى لو ما تبغى شي تروح بس تشتري أكل وترجع :)
والا يجذب الى هالسوق ان اسعارها رخيصه تناسب الجميع وفيها بضاعة احيانا تكون احلى من الموجوده في المجمعات وبضاعتها متنوعة من ملابس واداوت منزلية واحدية وعطورات واكسسوارات ومستحيل نروح مره ما نشوف تنزيلات عند واحد من البياعين

يالله يا بنات خلونا نسولف عن علاقتنا بسوق الاربعاء والسبت ونجاوب على هالاسئلة
ويش تفضلي سوق السبت لو الاربعاء
وليش تفضلي الاربعاء
والا جوابها السبت ليش تفضل السبت على الاربعاء
ويش تشتروا بالعاده من السوق
وويش اكثر شي يعجبكم في السوق

والشي الا يضحك في السوق والا ابغى نركز عليه واجد هو الزحمة على محلات الأكل
وزي ما تعرفوا ما فيه وحدة تروح ما تشتري نخج او ذرة او فطاير
ويش السبب ما ادري

يالله الحين خلونا نسولف عن علاقتنا بالسوق وعن مواقفنا الطريفة في السوق
ولا تنسوا تجاوبوا على الأسئلة
ولا تنسوا بعد تعلقوا على شراي الاكل :)

ورجال المنتدى مثل ما ان سوق السبت وللربعاء مهو ليكم
فهذا الموضوع بعد مهو ليكم
يعني كل شي فيه سوق سبت واربعاء للحريم بس :)

[أنيقة]

اليوم الاربعاء والكل متجهز للسوق
غبار ما غبار
مطر مو مطر
رايحين رايحين لأنه زي ما قلتي يا مشرفتنا متعة حقيقية
واحنا راجعين بنجيب ويانا شوي نخج على شوي فلافل خخخخخ

-- أنيقة --

[فاطمة محمد]

هلا والله بــ أميرة الجنة

ليش من البداية طريده للرجال ؟؟
حرام

صدقتي لما قلتي ..سوق الأربعاء متعه حقيقية ..
مع إني ماأروح كل سبوع بس أجواءه حليوه نااااسه حليوه تتسوقي وأنتين في قمة الراحه النفسية .. أحسن من المجمعات بألف مره

أفضل سوق الأربعاء .... وذلك لأني مارحت سوق السبت خخخخخخخ
أتوقع لأن السوق في نهاية الإسبوع أحلى من بدايته

ويش نشتري ويش نشتري ؟؟ ويش نشتري ؟
آخر مره رحت فيها شريت كم سمكه للحوض اللي عندي

أكثر شي يعجبني فيه ....... أصلاً كله على بعضه حليو
كل شي موجود يزيد حلاوة الشي الثاني

وإن كان على محلات الأكل ... فأكل السوق ريحته غييييييييير
طعمه غيييييير .. نكهته غيييييييير

نقول الحمد لله ،، الله يدومها من نعمه ،، ويحفظها من الزوال
ويرزقنا ويرزقكم كل خير وبركه وصحه وسلامه

[أميرة الجنة]

هلا بأنيقة
إن شاء الله ما نسيتي النخج والفلافل خخخخخخخ

قديحية ياسلام عليك إجاباتك نموذجية
مشكورين على المشاركة بس وين باقي البنات لاتقولوا ماتروحوا السوق ؟؟

[الميمون]

دخول بالعرض ...
احنا في صفوى السوق عندنا يوم السبت بس
و طبعاً المدام عندها إلا يفوته سوق السبت فاته نصف قطار العمر هههههه
احنا في صفوى التسوق فقط للحريم و زوجتي راسها و ألف سيف أنزل معاها أو اروح اشتري منه شي ...

لأنها تقول لي بعدين تصير سيرتك على كل لسان أن فلان زوج فلانة رايح سوق السبت ...! إلا ما يستحي !!!

و اصلاً أنا لا يمكن أنزل لسوق لأن ما ترفع صبع إلا يمكن ألف وحدة جنبك ...!!!

بس يبدوا أن في السنتين الأخيرتين صار الوضع عادي أن الرجال يروح مع أهله السوق ..
بس لازال يأخذ الطابع النسائي ...

اوّل كانت زوجتي تضرب به المثل في الرخص ، بس بعدين قاموا البيّاعة يتضيربوا على الناس ... لكن الناس ما همهم ... أهم شي يشتروا ...!!

و بالنسبة للأكل
فمع التمشية و الأجواء الحلوة و الراحة النفسية
أكيد الواحد أو الوحدة بتنفتح نفسها للأكل ...

بس وايد عليي هدرة الحين

تشكرات أميرة الجنّة

و إسمحي لينا على اللقافة رغم الطردة خخخخخخ

[أمير الحب]

انا اقول ان السوق زين ونافع الجميع
لكن بلشتنا ان يوم الاربعاء ما نقدر نروح الملعب مشي
انا اقترح يسووا لينا نفق تحت الأرض
او يبنوا كبري فوق السوق يوصل الى الملعب المضري
وتفكونا من الزحمة
وتفتكوا منا في السوق وفي الموضوع بعد

[قديحي]

بما ان الحريم ممتنعين عن الموضوع
وبما ان الرجال طبوا هنا
فقلنا نشرف وياكم لأن حشر مع الناس عيد
هذا المثل ينطبق على كل شيء الا على سوق الاربعاء وسوق السبت لأنه مكان غير مخصص للرجال الا البياعين
انا اقترح ان البياعين يصيروا حريم ونفتك بعد
يعني يسووا كبري او نفق زي ما قال امير الحب
ويخلوا الحريم يبيعوا زي ما قلت انا
وتصير مدينه خاصه للحريم - وخلهم يسووا فيها مدينتهم الفاضلة

سوق الاربعاء صحيح متعه حقيقية
لكنها لكم بس يالحريم اما احنا فمطلوب منا قبل كل سوق اننا نخرخش مخابينا
ونعطيكم المكتوب سواء كان اول الشهر لما الجيب مليان او آخره لما الجيب فاضي
يعني احنا دافعين دافعين
والحريم مستمتعين مستمتعين

طيب ليش ما نغير السالفة
ونسوي سوق يوم الجمعه للرجال فقط ونخلي حريمنا يدفعوا لينا فلوس
من منطلق المساواة بين الرجل والمرأة فقط لا اقل ولا اكثر
يومها انا اجزم انهم بيحتلوا السوق وبيصير عندهم ثلاثة اسواق
ويومها لازم تقرقش مخباك ثلاثة ايام
اقول خلونا على السبت والاربعاء احسن وبلا اقتراحات وبلا فتح ابواب

[فاطمة محمد]

يا هلا ويا مرحبا بصفوى وأهلها

إذا ماسمحت ليكم نسوانكم تروحوا السوق فأكيد
أميرة الجنة بتسمح ليكم تشرفونا في موضوعها

ولا لقافه ولا شي .. قلنا حيّاكم الله يالميمون


أميروووووووه .. هذي مشكلتكم مالينا شغل :p
ويش هالإقتراح ياولدي
لا يسوو نفق ولا كبري ولا شي ... ناويين تخربوا الديره أنتون
وبعدين حتى لو بيسوو يبغى ليهم دهر لين يخلصوا
وفي هالدهر من وين لينا بالسوق ؟؟

وفي النهايه قاعدين على راسك مابتفتك منا :p

حيّاك الله يا قديحي

إفتراح مو حليو أبداً أبداً أبداً
ولا بتفتك أبد << ألحين تسمعك مرتك بتوررريك شغلك
ألحين إذا البياعين صاروا حريم .. !!
هم بعد يبغوا يتسوقوا
ويش فيها يعني لو البياعين صاروا رجال و شالوا النسوان على روسهم


أما مدينة خاصة للحريم فــ هذا شي ثااااااني
إذا ماخرخشتوا مخابيكم لنسوانكم بتخرخشوها لمن ؟؟

والحمد لله رب العالمين

سوق الجمعة مو حليو لأن كله رجال :p

هههههه:D هههههههههههاي

[أميرة الجنة]

مرحبا
الظاهر الموضوع صار للرجال فسنسلم امرنا لله ونرضى بالواقع . أمزح لاتصدقون
اهلا بكم جميعا في سوقنا وأرجو أن تجدوا فيه المتعة ..
الاخ الميمون
تشرفنا بوجودك في بيتك الثاني . وأشكرك على مشاركتك الرائعة
الاخ أمير الحب
الله يعينك لكن مادام السوق موجودة فما ليك ألا رياضة المشي يوم الاربعاء
قديحي
ضحكتني على المدينة الفاضلة وين أفلاطون عنك ..
قديحية
طبعا ما يحتاج نرحب بك لان البيت بيتك والموضوع موضوعك , شاكرة لك لاثرائك الموضوع ..