الطبخ ومواقفه الطريفة

[أميرة الجنة]

مرحبا جميعا ..
بحكم عملنا المتواصل في المطبخ لابد أننا حصلت لنا مواقف طريفة مع الطبخ , فحبيت إنكم تشاركوني في مواقفكم الطريفة ونخلي الموضوع مساحة للترويح عن النفس ورسم الأبتسامة على الشفاه ..
أول موقف حصل لي لما أمي جابت لنا أختي الصغيرة , فبما أني أكبر خواتي قلت لأمي اليوم فطورك أحنا بنسويه وأكيد بنسوي خبيصة أو عصيدة , طبعا أني أعرف الخطوات والمقادير بس ما أعرف أن الطحين لما يتحمص يظل فترة يبرد قبل ما يضيفوا ليه الماء والسكر وباقي المقادير , فقمت على طول حطيت الماي وتكتل عندي ولاعرفت ويش السبب , وأقوم أقول لخواتي يالله خلينا مره ثانيه نسويه وكل وحدة تخترع ليها سبب يمكن من الطحين ويمكن من كذا , على العموم غيرنا الطحين وطبقنا نفس الطريقة وأختربت مرة ثانية ياربي تفشلنا وأمي تستنى الفطور , بعدين فلنا ليها وعلمتنا الخطا , وأخرتها سوينا ليه بيض وأحنا متفشلين حاسبين روحنا طباخات ,,
كثيرة هي المواقف ولكن سأترك لكم المجال لتتحفونا بمواقفكم ..

[كليله]

يحسبوا روحهم بس هم طباخين
مدام فيها بس (مرحبا بنات ) اقلب وجهي حتى لايقولوا ملقوف
على العموم انتون الخسرانين ترى لي مواقف تضحك .

[أميرة الجنة]

أهلا وسهلا بك أخ كليلة
بالعكس البيت بيتك والموضوع موضوعك وياليت تكتب لنا مواقفك في الطبخ
طلعوا حتى الرجال عندهم مواقف في الطبخ موبس أحنا
في انتظار فضائح كليلة ومواقفه المضحكة ..

[ضوءُ شمعة]

مرحبا بليون بكِ
قبل ما نبدا قصتنا سوو تعديل في الموضوع بل مايكون (مرحبا بنات)
يكون -مرحبا جميعاً - علشان مايكون احد زعلان
ومنها نستمع للقصص الغريبه الي تصير للشبان في المطبخ


قصتي مع رحلة امي عندما ذهبت لأيران الله يرزقنا واياكم يارب
راحت الوالده والوالد
وظلت المسؤليه علينا فبما انها مسافرة الوالده بنصير نسوي غذاء لعدة اشخاص يعني تكبر المسؤليه

فمع المسؤليه الي فوق ظهرنا والتوتر لما حطيت الرز في الصفريه نسيته ولاتذكرته إلى لما صار لاحال له
صار مثل الهريسه وهذي اول مرة واخرها إن شاء الله كما ذكرنا في موضوع مع ضوءُ شمعة مش حتقدر تغمض عنيك 00 ومن ذاك اليوم وخواتي يذكروني بها ولما اطبخ لهم شيء سنع يذكروني بها ويقولو شوفوا الفرق ماكنها يد وحده الي سوت هالطبخات
هههههه مواقف طريفه وجميله

نتمنى قرأة مذكرات الطبخات والطباخين لنتفادى ونستفيد من الذي عملوه

الله يعطيكِ العافيه اختي أميرة الجنه على هالموضوع الحلو

[أميرة الجنة]

تم التعديل ضوء شمعة ..
نورتي الموضوع بقصتك الممتعة والشيقة , وأني ياما صار ليي الرز زي الهريسة ألا أن صرت فنانة فيه الحين بحكم ممارستي للطبخ ..
لك أرق وأعذب التحايا ..

[محمد الفرج]

.
.
.

سلام من الله عليكم ..

تعال يا كليلة تعال خلنا نقرا كم موقف ..

خذ لك هذا لكن :

قبل شي خمس سنين الساعة فنتين فلاف نص الليل ، و عصافير البطن تصوصو ..!!

أحسن طبخة يسووها الشباب ويش ؟! البطاطس مافي غيرها ..

قشرنا البطاطس و زبطنا الوضع و حطينا الزيت يصخن .. وعلى ما يصخن مريت المجلس ..

مدري أنا اشيك ايميل لو اكلم واحد مسنجر أو شي ثاني .. المهم الشغلة ليها بالنت ..!

شوي إلا اسمع شي يتقرطع ..!! مشيت الحال ..

شوي إلا زادت الأصوات .. قمت اشوف ويش صاير ..

مافتحت الباب إلا يدخلني على الصالة إلا من جهت المطبخ ذيك الدخانة السودا و شكل الضو تلهب ..

على ما شفت إلا برسلان المطبخ يتكسر و يتفالت من كل جهة ..!!

أيست إني أسوي شي وحدي .. فركيض طقيت باب غرفة الوالد الله يرحمة و طلع وشاف الدنيا منعفسة .. شوي إلا حجي قديحي بعد سمع ناس في الطريق تصارخ حريقة حريقة و نزل بيشوف ..!

المهم تليمنا على ذاك المطبخ و بعد ما دخلوا لينا كم واحد من الجيران و انطفت ولله الحمد .. بعد ما أكلت جهة من المطبخ ..!!

الزهق لما ضحضحت الدنيا شوي و أحنا نطلع الاغراض اللي احترقت و البلاوي لقيت سلة البطاطس ذايبة شوي و البطاطس اسود من الدخانة ..!

طبعا ماقلت للأهل إن السبب هالنت الله يغربله ..!!

وهذي سالفة أحد الطبخات اللي ما تتنسي ..

والله يسلم الجميع من كل سوء

ودمتم في اللطف

[قديحي]

ما قصرت فينا ديك السنه
كانت ليلة خميس
على الاقل اذا بتحرق البيت احرقه وسط ليالي الاسبوع على الاقل نلقاها فرصة ونغيب عن العمل بحجة تنظيف المطبخ
اما تحرقة ليلة الخميس وتصحينا اذان الفجر فهذي كلا والف كلا
طبعا الا ما يعرفه ان محمد ما حرق بس المطبخ
لكنه ما خلى زولية في البيت قديمه او جديده الا حرقها والسبب لمعسله
الى من جاء يوم وحرموه من التعسيل في البيت
اعتقد انه صار يعسل فوق السطح
والا انا غلطان

في المره الجايه نحكي ليكم عن مواقف الطبخ
لكن في الرحلات مو في البيت
شفتي الموضوع كيف صار احلى يا اميرة الجنه لما خليتيه عام للجميع
بعدما كان للنساء فقط
هذا درس حق تتعلموا ولا تخصصوا مواضيعكم للحريم بس
والا نسيتي موضوع سوق الاربعاء ؟

[ملاذ]

يقطع سوالفكم
ههههههه
اخخخخخ
يا قديحي اتاريه لك فضايح بس طريفة مررررة
وياكم نتابع
"كلولة صار له فترة منحاش"

[أميرة الجنة]

نورت صفحتي بوجودكم لا حرمنا الله منكم ..

[سفير الغرام]

هههههههههههههههههههههههههههههههههههههههه ههههههههههههههههههههههههههههههههههههههه


محمد الفرج انا ادكر الموقف لان احترق مطبخكم و السقف صار اسود ههههههههههههههههه انت اصلان نحيس كل ما اتطقها عودجه بس في حاجه احسك ميا ميا 100%100

تعرف شني ؟؟؟؟؟؟؟؟؟؟؟؟







النت ادا فصل اتعدله بسرعه ههههههههههههههههه






امزح وياك مو تفصله اتعاقبنا عاد