الغاز ماركة قديحي

[قديحي]

مرحبا بالشباب

خلونا نشوف شطارتكم في حل الالغاز

اللغز الاول
يقول لك فيه ملك عنده ولد وكلب , واثنينهم يموت فيهم هالملك وعنده الكلب مثل ولده
الكلب يوم من الايام عض الولد فراح الملك للوزير وقال له ابغاك تقتل الكلب بطريقة انا ما اقدر اقتلك مثلها

فيالله من يعرف الطريقة ويحل اللغز وله مني جائزة

[محمد الفرج]

.
.
.

قواك الله خوك ..

أنا اقول إنه يكلف أحد يقتله .. فإذا طلب إنه يقتل فحكمه من حكم الملك بعد لأنه أمره إنه يقتله ..!

و الله العالم

[قديحي]

الله يقويك حجي محمد
لا الجواب غلط مثل ما الوزير وكّل واحد يقتل الكلب
فالملك يقدر يوكل واحد يقتل الوزير فبيكون قتله بنفس الطريقة
السالفة ما فيه عقاب وحساب

حاول مرة اخرى وشوفوا طريقة ثانية

[ورقة التوت]

زين لازم يقتلوه

يقدروا يغووه
(يضيعوه يعني )


هذا جواب سريع
بكره نفكر لين مانعصر المخ عدل

[قديحي]

كمبدأ فكلامك عدل
هو ممكن يربطوه في خيشة ويغووه زي ما نغوي السنانير لول
لكن مقابل هذا
الملك يقدر يحط الوزير في خيشة ويغويه بعد
انا اقول اعصري مخك وحاولي مرة ثانية

[معاليـ الوزير]

يذبحـ الكلبـ و يطبخه .. وتاليـ يعشي الملكـ منهـ

وبعد فراغـ الملكـ من الوليمة يُخبره .. كذا ما راح الملكـ يقدر يأكلـ الوزير


مُجرد تخمينـ ..

[قديحي]

انت شكلك يا معالي الوزير واقف في صف الوزير
اثنينكم في وظيفة وحده :)
لا بغلبك حسين بن عاقول لما اكل العالم لحم شلاب
الحين
قبل ما نتكلم عن الطبخ خلنا نتكلم عن الدبح وهو طريقة القتل
والملك يقدر يدبح الوزير
سواء أكله لحم الجلب والله لحم حمار
حاول مرة ثانيه طال عمرك

[ورقة التوت]

زين



يقص لسان الكلب
عشان لايسيل اللعاب


والملك اذا قص لسان الوزير ما بيموت

[ميثم توفيق]

سلام ياغناتي



بسييييييييييط
يقص دنبة الكلب ويخليه ينزف حتى الموت
والوزير مافيه دنبة ياغناتي علشان يقصها الملك إليه وخليه ينزف حتى الموت عدل له
يالله وين الجائزة

[قديحي]

زين



يقص لسان الكلب
عشان لايسيل اللعاب


والملك اذا قص لسان الوزير ما بيموت



ورقة التوت
من قال لك ان الكلب اذا قصوا لسانه يموت
واحنا ويش علينا من اللعب سال لو ما سال
اجابة غلط للاسف

[قديحي]

سلام ياغناتي



بسييييييييييط
يقص دنبة الكلب ويخليه ينزف حتى الموت
والوزير مافيه دنبة ياغناتي علشان يقصها الملك إليه وخليه ينزف حتى الموت عدل له
يالله وين الجائزة

ميثم يا خلف طوايفي
انت كذا اجابتك صح
طيب لو قص ذنبه وطلع هالكلب عنده التخثر عالي وما نزف اكيد ما بيكون
لكن الحل الصحيح انه يمسك ذنبة الكلب ويقعد يشيل ويشدخ في الكلب على الارض الى من يموت
وبكذا الملك ما بيقدر يقتل الوزير بهالطريقة لأنه بكل بساطه ما له ذنب

[قديحي]

نجي الى لغز حسابي وخلونا نشوف شاطرتكم في الحساب

عندنا حفرة صعيرونه
عرضها بس عشرين متر ( 20 م )
طولها سبعة متر ونص ( 7.5 )
عمقها مترين ( 2 م )
فكم يصير فيها من لتراب تقديراً بالميزان المليان
نبغى وزن التراب يكون تقديري
ويفضل انه يكون مئة بالمئة
ياله تشطروا ويانا

[قديحي]

الحين انتون ما شفتوا السؤال
لو ضعيفين في الحساب

اعطونا وجه يا جماعه

[ملاذ]

300

اذا صح قول
واذا غلط
على الاقل عطيناك وجه!...

هههههه

دمت جميلا

[ورقة التوت]

وبعدين وياك قديحي
حط اسئلة عدلة



الحفرة فارغة

لا واخينا في الله يبغاه بالمئة بعد


يالله اذا الجواب صح

عليكم بحل هذا اللغز حتى لو خطأ بعد حلوه نشوف شطارتكم






عندك 2500ريال وعطيت صديقك 1000 الباقي 1500وعطيته 750الباقي 750وعطيته 450الباقي 300عطيته 300الباقي صفر

وعند جمعك للبواقي يكون 2550
من وين صار عندنا 50 زيادة

[حروف مبعثرة]

تعبت وما وصلت الى حل
يبد ان السؤال موجه للأذكياء
وانا لست منهم للاسف

[قديحي]

حروف مبعثرة
اسم الله عليك من الغباء

طيب اخذوا الجواب

الحل هو أن جمع الباقي طريقة غلط من الأساس لأن الباقي تراكمي ويعطي أكثر من المبلغ الأصلي . فخذوا عندكم هذا المثال وقارنوا اذا كان كلامي صح او خطأ :
عندي 1000 ريال
عطيت ميثم توفيق 200 الباقي عندي 800
قمت وعطيت نعناع مرة أخرى 200الباقي 600
في المرة الثالثة عطيت حروف مبعثرة 200 الباقي 400
عطيت محمد الفرج 200 الباقي 200
وعلشان لا يزعلا ملاذوع عطيناه آخر 200 الباقي 0
السؤال اذا جمعنا الباقي يصير عندنا 2000 ( 1000 ريال زياده )
اما لو جمعت كل الا وزعته على الشباب كان المجموع 1000

فسروا كيف جت الـ: (1000 ريال) كزيادة!؟

طبعا هذا مهو معقول .والطريقة خاطئة والا نجمعه هو الا نصرفه بس ولا نجمع المتبقي

على فكرة ورقة التوت
جوابك صح
الحفرة فارغة ولهذا ما فيها شيء للوزن

[قديحي]

طيب اخذوا هاللغز الحلو

وحده جاء زارها رجال
فقالت له
حيالله الا زرانا ... ياخويي من امي ... ياللي ابوك اخو ولدي

منهو هذا ؟
وويش يصير ليها

[حنين الروح]

اقول قديحي

تراك شيبت راسي


ماني حالتنه

خخخخخخخخخخخخخخخخخخخخ

بس بافكر فيه

لي رجعه يعني

[قديحي]

مو مشكلة لو شيبتي
كلها علبة صبغ وينتهي الأمر
الأهم العقل ما شيب ولهذا انتي محتاجة تفكير اكثر

للتسهيل بس
الموضوع له علاقة بالنسب

[سجايا الروح]

ياعـــــــــــلــــــــي

صعب مره
دار راسي حتى امي ما عرفته

يمكن اخوها !!

[قديحي]

هو صحيح اخوها من امها

لكن كيف بعد صار ابوه اخو ولدها

حتى انا دار راسي
عند روحي بسطتها يعني

طيب نبسط ليكم شوي
فيه واحد وولده
وفيه بنت وامها
ويش سووا هالاربعه علشان يصير نسبهم بالشكل الا في اللغز

[ورقة التوت]

عندك 2500ريال وعطيت صديقك 1000 الباقي 1500وعطيته 750الباقي 750وعطيته 450الباقي 300عطيته 300الباقي صفر

وعند جمعك للبواقي يكون 2550
من وين صار عندنا 50 زيادة

يصير تعرف كيف
عند جمعك للفروق البواقي من النهاية الى البداية

كالتالي
0+300=300
300+750= 1050
1050+1500=2550

[ملاذ]

وينك يا امخولنا

تراك جننتنا
بس جنووون حلووو

اتابع....

[قديحي]

ملاذ شغل مخك شوي
رجال وولده
وحرمة وبنتها

الحرمة تزوجت الولد ( جالوا ولد )
والبنت تزوجت الرجال ( جابوا بنت )

شوفوا علاقة المولود الولد
بالمولوده البنت
يطلع ليكم الجواب
ولا تقولوا قرب اكثر بعد ترى عطيتكم الحل

[ميثم توفيق]

أنا كفاية عليي جنون الدراسة أجي إلى اجنون اقديحي
فريت مخي فرررررر الله يهديك
ولا أبغى أتعب مخي بعد

[ملاذ]

يعني اخوة

جننتنييييييييي

[قديحي]

الله يحفظكم من جنون قديحي

اقول شغلوا مخكم وفكروا شوي وبلا خرابيط

[سجايا الروح]

رجال وولده
وحرمة وبنتها

الحرمة تزوجت الولد ( جالوا ولد )
والبنت تزوجت الرجال ( جابوا بنت )

شوفوا علاقة المولود الولد
بالمولوده البنت
يطلع ليكم الجواب
ولا تقولوا قرب اكثر بعد ترى عطيتكم الحل

يصير اخوها

امي حلت اللغز بس للاسف انت سبقتني

[ضوءُ شمعة]

علاقة المولد الولد بالمولود البنت انه يصير اخوها

لانه
الحرمة تزوجت الولد ( جالوا ولد )
والبنت-هي نفسها الحرمه- تزوجت الرجال ( جابوا بنت )

والله اعلم

[ضوءُ شمعة]

هههههه سجايا الروح وضوءُ شمعة
حطينا الحل في نفس الوقت هههههه

[سجايا الروح]

ضوء شمعة الفرق دقيقتين ههههه

[قديحي]

صحيح ما لها الا نسوانها
لو على ميثم وملاذ كان قعدنا الى الصبح ولا لقينا جواب

مبروك ضوء شمعه - سجايا الروح
ثنتينكم اجابتكم صح


الولد تزوج الام................ الابو تزوج البنت........ (شفتو الظلم)

الولد الي تزوج الام = جابوا ولد.........بيكون اخو للبنت
الابو الي تزوج البنت= جابوا ولد........بيكون اخو للولد...زوج الام

هنا البنت رحبت بأخوها وقالت :

حيالله الا زرانا ... ياخويي من امي ... ياللي ابوك اخو ولدي

[قديحي]

ما ادري ليش انا استانس لما اعور راس الجماعه
لهذا بطرح لغز مشابه للأول وله علاقة بالنسب

في اثنين تشابقوا
جاء شخص يصلح بينهم
قال واحد منهم للشخص : انت ويش دخلك بيننا هو عمي وانا خاله .....

كيف تصير هالسالفة

[ضوءُ شمعة]

السالفه والحل اكيد كلها موجوده بالسؤال ..


إن شاء الله بكره نشغل هالمخ وندور على هالحل

[سجايا الروح]

السؤال صعب مره ويدور الراس
بس سألت ام علي
قالت ليي الحل بسرعه وبكل بساطه !!

الرجال عنده ولد من اول اخذ وحده ثانيه جابت ولد
تطلقت منه اخذت ثاني جابت بت البت اخذت ولد الرجال إللي هو بناوها
بناوها رجل بتها يصير اخو ولدها مرت البناو جابت ولد ولدها يصير عم ولد بتها
وخاله ولدها
يعني اخويي ماخذ اختي

صح ؟؟؟

[قديحي]

http://www.roro44.com/smilies/psmilie/052.gif

هو صح شكله
بس انتين الله يهديش شرحش صاير اصعب من السؤال
سلمي على مرت البناو :)

[سجايا الروح]

ويش اسوي مافهمت شي قلت لك زي ماقالت امي بالضبط هههههه
الحمد لله انه دار راسك زي ما دورت راسنا نيهههههااا

[فاطمة محمد]

ههههههههههههههههه
وصف حليو يا سجايا
يبرررد لـــ فاد

[قديحي]

السالفه إن أم العم تصير أخت الخال من الأم ومتزوجه جده ( جد الخال ) علشان كذا ولد أخته يصير عمه.

هو تقريبا نفس السؤال الاول
لكن هناك البنت تتكلم
هنا الولد هو يتكلم

لكن من جهة ثانيه لو قرانا هذا الجواب بجواب سجايا الروح بنلاقيهم واحد
لكن مشروحين بطريقة مختلفة
هناك بناو وهنا ما عندنا بنت ولا ولد بناو :)

[قديحي]

اللغز الجديد

يا ما تــــحملت همـــوم وأحــــزان
و يا ما مشـــيت الليل و أنا جوعـــان
و في النهارشو كنت عطشــــان
سافرت كثير يوم بالصحراء و يوم نزلت الوديــــان
انا مو طائرة بس يمكن سفينه.ويمكن حيـــوان
يمكن عرفتونيو آه منك يا الانســـــان

عرفتوه ؟

[مخفوقة بالزبدة]

لان يسيط با جاوب أكيد الجمل.
...

[قديحي]

اوه اوه
ما دام حضروا الشطار بنبتعد عن هالأسئلة البسيطة
خلوني اروح امخمخ ليكم على لغز اصعب وارجع

[قديحي]

نجي الحين الى الجد
يقول لك في أمير للبلاد قرر انه يزوج ابنته الى واحد من عامة الشعب
ولأنها أميرة فجاء الغني والفقير , الجميل والقبيح لخطبة الأميرة
سوى اختبارات ذكاء لكل من تقدم لخطبتها
في الأخير صفى على اثنين بس وعطى كل واحد منهم فرس
وقال تتسابقوا من طرف البلدة الى القصر
ولكن هنا المحك
قال ان من يصل فرسه الثاني فهو الفائز وهو الدي سيتزوج البنت
واذا ما وصل واحد منهم خلال اليوم بيقتل الاثنين
يعني لازم يتسابقوا ولازم واحد يوصل فرسه الأول ( الخاسر ) وواحد الثاني ( الفائز ) والا بتكون رقابهم معرضه
لأنها تطير اذا تأخروا عن السباق
بماذا فكر الفرسان الاثنين حتى يأتوا في الوقت المحدد
وحتى يفوز واحد منهم بالزواج من الأميرة

[ملاذ]

صحيح ما لها الا نسوانها
لو على ميثم وملاذ كان قعدنا الى الصبح ولا لقينا جواب

مبروك ضوء شمعه - سجايا الروح
ثنتينكم اجابتكم صح


الولد تزوج الام................ الابو تزوج البنت........ (شفتو الظلم)

الولد الي تزوج الام = جابوا ولد.........بيكون اخو للبنت
الابو الي تزوج البنت= جابوا ولد........بيكون اخو للولد...زوج الام

هنا البنت رحبت بأخوها وقالت :

حيالله الا زرانا ... ياخويي من امي ... ياللي ابوك اخو ولدي


قديحيوووووه
اعقل ارجع للمشاركة 27
وشف قلنا لك اخوة
قبل
سجايا
زقبل شمعة

قم بس قم

اشوفك اعميت

رح لدكتور العيون واكشف نظر

اخخخخخخخخ

[سجايا الروح]

عجزت عفر ...:confused: :confused:

[قديحي]

قديحيوووووه


رح لدكتور العيون واكشف نظر

اخخخخخخخخ



ايه والله يا خوك
العتب على النظر
عيوننا راحت والسبب المنتدى
وانا عندي لك اقتراح
هالايام قايمة حملة تبرعات في المنتدى
جوال الى محمد
ولابتوب الى انيقة
وشنطة الى سجايا الروح
انا اقول كملوا جميلكم واتبرعوا الى اخوكم بنظارة
لكن ابغاها شمسية ماركة ريبان
واذا من كاريرا ما عندي مانع

اقول بدل هالهدرة الا مسونها على جواب قوم اتشطر وحل السؤال الجديد

[*دمعة شوق*]

السؤال يشيب الراس ياقديحي...

عجزت....

[قديحي]

طيب نقرب لك الجواب يا دمعة شوق

الجواب موجود في نفس اللغز
ركزوا على كلمة الفرس والحل موجود فيها

[ورقة التوت]

زين يمكن يخلو الفرس بدون راكب لها

ولما يوصل الفرس يتم تنفيذ الحكم على الفرس لا على الفارس


ويتم الزواج لصاحب الفرس الفائز



مجرد تحليل

؟؟؟؟؟؟؟؟

[حنين الروح]

يمكن يركبو عل نفس الفرس

وبعدين يوصلو جميع

[قديحي]

الحين وحده تقول بدون فارس
والثانية تقول اثنينهم على فرس واحد

نصدق من احنا ؟
عموما

حنين الروح تقريبا اعطت نص الجواب
فكرة مرة ثانيه وانا متأكد بتعرفوا الحل

[*دمعة شوق*]

احس ان تحليل ورقة التوت صحيح

[روُّح!]

السلام قبل الكلام
.
اسمحو افدم لكم نفسي في هذا المنتدى الرائع
وردة المحبة

وكم اتمنى ان تقبلوني عضوة جديدة

الحل
يوصلو للنهية سوا والملك بيحتار فكل من الفارسين بكذب وبيقول ان الفارس التاني هو الي وصل بعدو وبكدا بيتعادلو

[قديحي]

احس ان تحليل ورقة التوت صحيح

ترة احنا ما ضيعنا الا تحليل ورقة التوت
يعني يا دمعة شوق تتوقعي ان الملك بيحط مصير بنته بالفرس هذا
وثانيا من قال لك ان الفرس اذا خلوه بحاله بيروح الى مكان القصر ؟
يمكن يروح من هنا او هنا
او يمكن يروح ديرة ثانيه ونهايتها لا حصلوا الفرس ولا عرس هالملك بنته

هالرد ذكرني بحمارة عند احد الجيران
كان صاحبها يهدها من النخل وترجع الى البيت وتدخل المربط بروحها
اذا صار عند الملك مثل هالحمار قولي جواب ورقة التوت صح

للاسف جوابها وجوابك غلط
وتحليلك وتحليها غلط

فكري مرة ثانيه ولا تخسري روحك الجائزة

[قديحي]

السلام قبل الكلام
.
اسمحو افدم لكم نفسي في هذا المنتدى الرائع
وردة المحبة

وكم اتمنى ان تقبلوني عضوة جديدة

الحل
يوصلو للنهية سوا والملك بيحتار فكل من الفارسين بكذب وبيقول ان الفارس التاني هو الي وصل بعدو وبكدا بيتعادلو


أهلا وسهلا بك يا وردة المحبة في قديحيات
وان شاء الله يطيب لك المقام
وان شاء اله بيكون أروع بتواجدكم ومشاركاتم الجميلة

انا سمعت يا وردة المحبه ان هالملك ما يحب الكذب
وما يزوج بنته الأميرة الى واحد كذاب
غير كذا الملك ما يبغا تعادل واحتمال يسوي ليهم ضربات جزاء ولكن هالضربات بتجي على روسهم
واحتمال تطير ارقابهم اثنينهم
حاولي مرة ثانية يا اختنا الكريمة
واهلا وسهلا بك من جديد

[سجايا الروح]

يركبوا على نفس الفرس
واحد منهم بيركب ورا
وبصير هو الثاني

صح ؟؟؟

[قديحي]

طيب والفرس الثاني وين يودوه
وثانيا من بيركب قدام وبيخسر روحه الزواج من الأميره
هذي اميره يعني مهو اي كلام
فيها كرسي حكم وملك ومو من السهل الواحد يتنازل عن هالشي بسهوله


فيه قوانين للفوز لازم تتطبق
1 - لازم يكون فيه سباق
2 - كل فارس يكون على فرس
3 - دكاء وحسن تصرف وفطنه

وركزوا على النقطة الاخيرة

[*دمعة شوق*]

يتنازلو عن الزواج بالأميره ويفكو حالهم
يخسرو الأميره ولا يخسرو عمرهم

[قديحي]

حرام عليك يا دمعة شوق
بعد كل هالتصفيات وهالشغلات تبغيهم يخلوها
وثانيا من قال ان الملك بيرضى انهم يتنازلوا
ما تشوفي انها اهانة الى الاميرة لما يهونوا عن الزواج منها ؟

تعرفوا
نفسي اعلمكم الجواب بس تعليقاتكم واجوبتكم مرحة الى ابعد الحدود لهذا نعطيكم فرصة يومين قبل طرح الجواب

[ورقة التوت]

زين يتفقوا انهم كل واحد يركب فرسه
ويهاجروا من البلد اصلاَ
لان مافيه واااحد عاقل بيضحي بعمره عشان اميرة
موفلوس هذي الايمكن تصير ويمكن تخيب
والله لو اني مكانهم
بلااميرة بلابطيخ
ادور لي عروس احلى منها
ولا انقتل



اني استمليت من هاللغز :confused:

احس ان الحل مرة باااااااايخ :mad:
والمشكلة ان مافيه الا الاناث تحاول تفكر


والذكور ملانين حدهم
حتى يفكروا

حتى لو اجوبتنا عادية وبسيطة يمكن
بس احسن منهم
مافكروا
:)

[قديحي]

الحل بسيط الى درجة ما تتوقعوها

وان كان على الذكور فالظاهر انهم يفكروا في الأميرة
ونسيوا الفرسان واللغز ونسيونا وياهم

[سجايا الروح]

زين ياقديحي
قول لنا الجواب :)

وان كان على الذكور فالظاهر انهم يفكروا في الأميرة
ونسيوا الفرسان واللغز ونسيونا وياهم

والاناث يفكرو في الفرسان
والله حاله

[ملاذ]

نجي الحين الى الجد
يقول لك في أمير للبلاد قرر انه يزوج ابنته الى واحد من عامة الشعب
ولأنها أميرة فجاء الغني والفقير , الجميل والقبيح لخطبة الأميرة
سوى اختبارات ذكاء لكل من تقدم لخطبتها
في الأخير صفى على اثنين بس وعطى كل واحد منهم فرس
وقال تتسابقوا من طرف البلدة الى القصر
ولكن هنا المحك
قال ان من يصل فرسه الثاني فهو الفائز وهو الدي سيتزوج البنت
واذا ما وصل واحد منهم خلال اليوم بيقتل الاثنين
يعني لازم يتسابقوا ولازم واحد يوصل فرسه الأول ( الخاسر ) وواحد الثاني ( الفائز ) والا بتكون رقابهم معرضه
لأنها تطير اذا تأخروا عن السباق
بماذا فكر الفرسان الاثنين حتى يأتوا في الوقت المحدد
وحتى يفوز واحد منهم بالزواج من الأميرة

الفرس الاول
الفرس الثاني
؟؟؟؟
وواحد الثاني؟؟
وش قصدك؟
اخخخخخ

ذكاء بنفس السؤال!
حلوووو

[ملاذ]

فرسه + فرس الملك "الهديه"
فرس اول وفرس ثاني

والباقي عليك يا قديحي
مخولت الجماعة
الله يمخولك بالخير

[*دمعة شوق*]

شكلي كنت فاهمه السؤال غلط
يعني كل واحد عنده فرسين
والا كيف يعني

[*دمعة شوق*]

؟؟؟؟؟؟؟؟؟؟؟؟؟؟؟؟؟؟
!!!!!!!!!!!!!!!!!!!!!!!1

[قديحي]

لا

كل واحد عنده فرس واحد بس

[قديحي]

اليكم الجواب

بكل بساطة
السر في الجملة : قال ان من يصل فرسه الثاني فهو الفائز وهو الدي سيتزوج البنت

والحل
يتبادل كل فارس مع الآخر
بحيث الفارس الأول يعطي فرسه للثاني
والفارس الثاني يعطي فرسه للأول
ويتم السباق بشكل عادي
الفائز بالطبع هو الذي يصل اولا ولكن لأن فرسه مع المتسابق الاخر فيصبح فرسه الثاني
ويتزوج الأميرة ويعيشوا في سبات ونبات ويخلقوا صبيان واميرات

هنا توفرت عدة شروط
الذكاء في ايجاد طريقة للخلاص من شرط الملك في الوقت المحدد
القوة المتمثلة في الفرسان
والسباق بشكله الواضح

عرفتوا الحين ليش قلنا الا يوصل فرسه الثاني هو الفائز ؟
لأن المهم هنا هو الفارس وهو الا يفوز يغض النظر عن نوعية الفرس وقوته

انتظرونا وسؤال آخر
ولكن بعد تعليقكم على الاجابة

[فاطمة محمد]

هبـَــــاله

[*دمعة شوق*]

صحيح!!!!!!

بس ماجى على بالي هذا الجواب...

بس والله دوخت راسنا ياقديحي
انشالله يكون اللغز الثاني اسهل