سوالف (( أم عبدالعزيز )) التراثية

[ميثم توفيق]

بسم الله الرحمان الرحيم
اللهم صلِّ على محمد وآلِ محمد

هيَ حكايا أضعها بين أيديكم لتبعث السرور في نفوسكم وتسليكم
كانت تُحكى لنا في ذاك الزمان كي نلتهي بها قليلا عن الشطانة والعفرته ههه كنَّا نجتمع حلقة كبيرة حول الأم العزيزة وهيَ بدورها تحكي لنا هذه الحكايا ونحنُ نستغرقُ في أحداثها وتفاصيلها ونحفظها عن ظهر قلب
جميلة تلك الأيام
ليت هذا التراث يمتدُّ لهذا الجيل بدلا من تلك الألعاب المسمومة التي يبث من خلالها الغرب مايبث من سموم فكرية شيطانية
لن أطيل أكثر
أدعكم مع أولى هذه الحكايا وهيَ عبارة عن رجل شديد البخل قتله بخله وأرداه قتلا لسبب تافه جدا أجارنا الله وإياكم، الحكاية لاتخلو من المبالغات والطرافة التي لابد منها لغرض شد الأطفال للقاصَّة كي تلهيهم عن شطانتهم
هلموا جميعا










البخيل

مازينة الحشاوي والسوالف إلا بالصلاة اعلى محمد وآلِ محمد
ما تشيلوا وادي واتحطوا وادي حتى تصلوا على نبينا الهادي

كان فيه رجال ايجيب ابزار غداهم كل يوم ابيومه طازج ... داك اليوم جاب لزوجته أربع قرعونات وقال ليها سويها لينا غدا وعشا مرة وحدة. الظهر ثنتين والعصر ثنتين قالت له ان شاء الله ولد عمي وطلع عنها عاد وهيه تجهز فيهم جت جارتها الفقيرة وهيه تملش قراعين لعجل قالت ليها بعد مامسَّت ابها بالخير ..ويش اتسوي يوخيتي قالت ليها والله ولد عمي جايب لينا اليوم لبزار قراعين وقاعدة أشويهم قالت ليها الفقيرة المسكينة كيف اتسويهم جارتنا والله أني ماأعرف أسويهم لأني ولامرة أكلتهم في حياتي وقامت تصيح ديك الفقيرة قالت ليهل لاتصيحي يوخيتي وقامت تسليها وتهدِّيها وقامت تعلمها كيفه يسووا القارعين كيف ينظفهم ويطبخوهم عاد استوى لبزار قامت المرة عطتها وحدة وراحت ابها، جى عاد زوجها بعدين وفرشت المرة السفرة وحطت ثنتين من الأربع اللي جابهم وبقت في الصفرية وحدة إلاهوه يقول ليها وين الرابعة مابقت في الصفرية إلا وحدة قالت ليه أكلتها، قال ليها لا ما أكلتيها، قالت ليه أكلتها أني جعت الظهر وأكلتها، قال لا ألحين الظهر ثنتين والليل ثنتين كيف تاكليها ..؟؟! قالت أكلتها قال اطلعيها قالت ليه أقول لك أكلتها أني جعت وأكلتها ماصدقها
وقتل روحه ديك الحزة قتااال .. ضرب روحه نتف روحه وهوه يصارخ قومي اطلعي القرعونة الرابعااااة قالت ليه ماعندي قال ليها أقول ليش اطلعيهاااا قالت ليه أقول لك ماعندي شي والله ماعندي شي
سوى روحه بيموت وقتل روحه قتال على ديك الكرعونة الغبرا قامت تصرخ يعيال المضااااااااااااااااااار
يعيال المضاااااااااااااااااار عاد جارهم سمعها وجى ركيييييض ويش صاير ويش صاير قالت ليه داهوه رجلي بيموووووووت ياويلي عليييييييه قتل روحه علشان هالقرعونة الغبرااااا
عاد والرجال يتدحن على الأرض من لصياح - بيموت عن جد الحزشة نااااايبة تصقعه – أو سوى روحه مريض موعارف يقوم كأنه وياه الصَّرع خخخخخ وتلايموا ارجال الفريق عاد عليهم وشالوه على أكتافهم وطلعوه برا وهو يتعفرت ويصارخ عاد قامت مرته تصرخ وراه واتقول :
اوليد عمي والقراعين أربعااااااااااا**************** رد عليها من فوق أكتوف لرجال :
هيِّدوا بي يارجال واسمعوا حشي المراااااااا
عاد طرحوه على الأرض وجت مرته تقول ليه ثلاث ياولد عمي والله ثلاث قرعونات اللي موجودين والرابعة أكلتهاااا
قال ليها أبامووووت
أيييست منه هلغبر البخييييييل
قالت ليه بتموت موت
ماعندي إلا ثلاث
عاد شالوه وحطوه على اكتوف لرجال وقامت مرته تصرخ واتصيح .... اوليد عمي والقراعين أربعااااااااااا .... اوليد عمي والقراعين أربعاااااااااااوهوه يرد عليها : هيِّدوا بي يارجال واسمعوا حشي المراااااااا
عاد نزلوه مرة ثانية قالت ليه ثلاث ياولد عمي لاتقتلني وياك مامن إلا هم
قال أباموووووت
قالت ليه بالطقااااااااااااااق بتموت موووووت ألله يلعن داك اليوم اللي تزوجتك فيه
عاد ومات هالحزشة، شالوه اوودوه لمغيسل غسلوه، كفنوه، أوودوه المقبرة
هلغبر قتل روحه اومات على ديك القرعونة المصقوعة
عاد رجعت هيه وعزمت جارتها الفقيرة المسكينة هيه بأيتامها لصغار وحمدت الله يوم مات وافتكت منه
هيه استانست وأكلت الباقي وهوه راح فيها شهيد قرعونة
وخلصت سالفتنا يالله أشوف الردوود بالصلاة على محمد وعلى آآآآل محمد



سالفتنا الجاية ان شاء الله عن ....... نخليها مفاجئة أحسن

[فاطمة محمد]

كللللللللللللللللللللللللللللوش
:cheer:
مابغينا نشوفها .. هالسوالف

باروح وبرجع ...................................:z025 :

[سجايا الروح]

:qoah:

شنو البخل

ههههههه
بس مره عجبتني السالفة


احلى حاجه
هذي
اوليد عمي والقراعين أربعااااااااااا ....
.
.
هيِّدوا بي يارجال واسمعوا حشي المراااااااا
:a068::a068:

[دلوعه]

ههههههههههههههههه والله حلوه قصه ام عبد العزيز

واحلى شي الموضوع شيق <<<البخل

وحلو مرررررره اسلوبك في العرض اخوي ميثم

في انتظار حكاوي جديده ....يابو المفاجأت

[فاطمة محمد]

ألحين هوووووووه صحيح ماات ..؟؟؟ :excl1:

ويش هالبخل ...؟

يادافع البلا ........ بس حليوه هالسالفه

[يسرى آل سنان]

مرررررررررررررره حلوه .........
ننتظر الباقي .........

[أبوعبدالله]

السلام عليكم ورحمة الله وبركاته

بطلب من المشرف ميثم توفيق سيتم اغلاق الموضوع لحين الإنتهاء من فاتحة المرحوم السعيد سعيد الخويلدي ( أبو مهدي ) رحمة الله عليه
وسيتم افتتاح الموضوع وتكملة القصص بعد اربعة أيام من الآن ان شاء الله

تحياتي

[ميثم توفيق]

السالفة الثانية






صلوا على محمد وآل محمد
كان يا ما كان في قديم الزمان ما يحلى الكلام إلا بذكر النبي وآله عليهم الصلاة والسلام











-عَليَا-




كان فيه واحد عنده أخت، وهالخت عندها سبة اولاد ... داك اليوم قال إلى اخته أنا اليوم أبامر عليش أباخذ من عندش واحد من اولادش أباروح وياه البر نتقنَّص. قالت ليه حياك ياخويي اتفضل البيت بيتك والعيال اعيالك. عاد جى الرجال وأخذ داك الولد وطلع وياه البر ... مشوا مشوا لين وصلوا في الليل .. قال الخال إلى ولد اخته خلينا ننام ألحين. ويالله عاد ماأقعد بكرا إلى انت ساقي الخيل وبعد ماتسقيه تركب عليه وتعجه ليي سبعة أشواط لين يحمى ومرَّة وحدة بعد جهِّز لينا أغراض الغدا اوملي لينا لقرب ماي علشان مانتعب بعدين. قال ليه ان شاء الله ..اونام
عاد قعد داك الطفل وتحير من وين أنا أجيب الماي من أجيب الضَّو ... ماعنده شخَّاط ... من وين أجيب الماي .. ماعنده ماي ... قعد يفكر في هالورطة ........... عاد لما قعد خاله قام ايدور يبغى يشوف لبزار وينهوه ماااااميش، قرب الماي ماتعبوا، قال وينهوا اللي سويته ..؟؟! قال الولد من وينه خالي أجيب ليي ماي، من وين أجيب الغدا، من وين أجيب الضَّو. انقهر فيه .. انقهر فيه قوم خذ حجرة وافلخ راسه ابها وسيِّل دمَّانه ... قتله ورماه في البر !!
رجع
رجع إلى اخته وقالت ليه اخته وينهوه ود اختك ؟؟!
قال ليها أنا آمرت عليه يسويي ليي شغلات مهمة وضرورية وماسواها – وهوه حمقان عاد – وأنا قتلته ...
أخذتها الغبنة وسكتت اخته. مرَّت مدة – كم شهر- اورد رجع ليها، قال ليها أنا أبغى من عندش ولد أبغى أروح وياه البر بنتقنَّص. قالت ليه حياك الله البيت بيتك والعيال عيالك. جى وأخذ ليه واحد وطلع وياه. محنا مكفرينها عليكم، هم سبعة أخوة هذي شغلتهم هاللون .. داك اليوم أخذ الصغير منهم – عمره سبع سنوات- راح به البر وقال ليه دانا بانام وقبل لا أقعد تركب على الخيل وتعجها ليي سبعة أشواط لين تحمى. ومرة وحدة ملي لقرب ماي واتسوي الشاي والقهوة. قال ليه ان شاء الله.
قعد
قعد داك الجاهل وقام ركب على الخيل اوعجَّاها سبعة أشواط لين خلاها اتزبد من العرق. عاد ويش سوى العكروت ..هذا اللي شاخ عليه .. قام أخذ العرق اللي على جسمها وملى الصفاري و الغواري منه وجهَّز الشاي وعوَّد راح البر وجاب ليه صلابيخ وحط الصلبوخ على الصلبوخ، وقام يحكحك فيهم لين طار الشرار اوولَّع في الحطب اوشب الضَّو وسوى الغدا
عاد قعد الخال
قال ليه ها ولد اختي استوى الغدا ؟؟
قال ايه خالي استوى
قال عفففففية علييييك
انت ان شاء الله اللي بتوصِّلني إلى عَليَا
عاد جهزوا أغراضهم على الخيل ومشوا، قاموا يشيلوا وادي ويحطوا وادي في داك البر
وهم يمشوا ... شافوا مرة عجوز. قال ليها الرجال: السلام عليش ياعمَّتاه ياخت أباااه ياخليفة مامضى ...!!
قالت ليه لولا سلامك سبق كلامك ان كان أكلتك بلقمة حاااارَّة لاتدور ليي لافي بطن ولا في خاصرة
اش جيَّبك يالشقي ابن الشقي..؟؟ قال ليها والله اللي جابني عليا، قالت ليه إييييييه وينك اووووين على عليا، عليا عند أختي الساااابعة ..!!
قال ليها ماتنيمينا عندش الليلة ؟؟ قالت وين أنيمك وياي، عندي شلاب اوكواوي واصخال، قال نيميني وياش الليلة وأعيش كيس دراهم
وافقت
قالت ليه تعال امشي ورايي، ظلوا يمشوا وراه في داك البر يمين ..يسار ...يسار يمين لين وصلوا لمكان يخوووووووووووووف






















يتبع

[يسرى آل سنان]

يالله ننتظر باقي القصه ...

[*دمعة شوق*]

ننتظر باقي القصه ميثم....

[سحر رباني]

سلامٌ عليكم ..
جميلة هي تلك القصص المروية منذ زمن ..بها كثير من العبر والطرافة .. والحكمة

ميثم ..
شكراً لك .. وننتظر التكملة
مودتي؛
سحرٌ رباني

[ميثم توفيق]

يتبع



مناااا زريبة اصخال، ومناك زريبة بقر، وهنا حمير مهدودة، وكلاب- عزكم الله – بولادهم، وعواوي، سنانير، وفيه زي الصندقة بيناتهم. عاد وهيه تمشي وياهم طرَّدت ديك الحمير والبقر ووووووو....... وهيه تقول:
خصصصص، بصصصصص، تــــــــــتتتتت، حيييييييييه، هششششششششش
-والله كلام يخوَّف-
عاد طرَّدتهم لين وصلوا لديك الصندقة وقات ليهم ديك العجوز الليلة بتناموا فيها، دخلوا وحطوا أغراضهم ..... ربطوا الخيل ودار الرجال للمرة العجوز وقال ليها: أنا أسمع صوت همهمات من بعييييييد شى ويش فيه هالمكان ..؟؟!قالت ليه الليلة عرس عليا يا الشقي ابن الشقي. قال: عليااا ..؟؟! – شهق - قالت ليه أي عليا
قال ليها اسمعي ياعمَّة أنا بعطيش كيسين دراهم زيادة فوق الكيس الأولي وأبغى منش خدمة. قالت اش تبي يالشقي ابن الشقي..؟؟ قال أنا أبغاش تاخذي ولد أختي وتقنعيه بمشمر زري من فوقه لتحته أووديه محل العروس... زين؟؟ وأبغاش تجيبي ليي عليا.
قالت غااااالي والطلب رخييييص – وهيه تقولب في أكياس الدراهم بأياديها - ناموا الجميع وضحضحت الدنيا وجت ديك العصرية القشرا وطلعت العجوز بداك الولد المسكين.... وغبَّت غبَّت لييييييين وصلت لمحل العرس. وصلت والناس مجتمعين حول كرسي العروس –عليا قاعدة فوقه- اتباعدوا اتباعدوا أباراوي بتي العروس يالله منااك .... وطرَّدتهم لين وصلت ليها. قعدت جنب العروس وقامت ساسرتها وفهَّمتها وغاورت ابها ورى الكرسي وبدَّلت المشامر. مال العروس حطَّته على لصبي ومال لصبي على العروس - ولا كأنه صاير شي خخخخ – وقعَّدت لصبي على الكرسي وطلعت ابعليا
طوت ديك الأرض... ثواني بس وإلا هم واصلين للرجال. وصَّلت وسلَّمته عليا. افرح الرجال واتشقق - وقام يضحك ابخباثة- قال للعجوز عفففية عليش ياعمَّة عففففية عليييييش. وأخذ عليا وترك العجوز ومشى عنها
جى وقت الفجر وزفوا العروس على المعرس واستفردوا بروحهم بالغرفة – عاد اهنا الوهقة – قال ليها افتحي وجهش ياعليا –والولد ساكت- عاد عليها الكلام افتحي وجهش ياعليا والولد ساكت. اييييه ويش السالفة، عصَّب الرجال وشال المشمر من عليها. ماشال المشمر إلا العروس اصبي – ههههههههههههههههههههههههه – اختلع الرجل خخخ باقي اشوي ويموت من الخلعة قال ليه – وهوه حمقان – وين العروس اللي خطبتها ياولد
قال ليه لصبي: يامعرس الميشوم والله فضحتنااااا –وهوه يصيييييح- قال ليه وين عروسي اللي خسرت عليها الدراهم والنوق ويييييين هيييييييييييييييييي. عاد أخذ الولد وطاح فيه ضرررررب لين قال بس لا ماكتفا العكروت قص ليه خنصره بعد
وخلاه يحوم في البر. عاد داك لصبي المسكين قعد يمشي يمشي ليييييين وصل لديك الصندقة اللي فيها خاله وقعد يصيح على الباب خالييييييييييي آآآآآه ه ه خااالييييييييي ...... اوتعى خاله ويا عليا وشاف ولد اخته جالس يصيح على الباب. ومن شاف الولد خاله عطاه داك الموال السنع - وهوه يصيح - ......
( يانايمين اثنييييين شوفوها حالييييي ..... قص خنصري العفريت درحمني يخاليييييي )
قال ليه خاله:
(قعدنا يبن اختي والنوم غاشي اعيوناااا .... سكرنا وتمردغنا واتعفَّست اشعورنااااا)

عاد يوم شافت عليا حال الولد قامت اتصيح وانحاشت لرجلها وظل الولد عند خاله في البر وامرض من صبعه لييييين مات داك الولد المسكين. مات اودفنه في البر – علا عمري – رجع الرجال لأخته سلم عليها ماردَّت عليه وأول كلامها وينهوه ولد أختك وكأنها حاسسسة بيصير شي لداك الولد لصغيرون، قال ليها – وهوه متغطرس- الولد مات
... مااات ..؟؟! قال ايه، كيف مااات..؟؟!
قال أمر الله ويش أسوي أنا بعد. لكن أقول ليش دخدي هالثوب ودوري به على ابيوت الديرة وقولي ليهم من اللي يقدر يطوله ليي من نفس القطعة مايزيد عليه من قطعة ثانية وتعالي قولي ليي ويش يقولوا ليش.
قامت ديك المرة اتحوم وتدخل لبيوت وهيه كئيبة حزينة على أولادها اللي ماتوا تدخل بيت وتطلع من بيت والكل يقول ليها مانقدر ليييين باخت اوتعبت ديك المرة المسكينة ورجعت لأخوها قالت ليه خلت ابيوت الديرة كلها وكلهم يقولوا مايقدروا يزيدوا الثوب من نفس القطعة.
قال ليها شفتي – وهوه معصَّب عليها – كيف تبغيني أرجع أولادش وهم ماتوا ..؟؟ هذا عمرهم. ماحد يقدر يطول عمره إذا جى ليه الموت. كلنا مخلوقين علشان نموت. ربش مايخلق مخلوق في هالدنيا إلا ليه يوم ياخذه فيه
وربش قادر ومستقدر انه يفني العالم كلها بعد كيف أنا أقدر أجيب ليش اولادش هذاولا كلهم مضوا في إيد الباري
ديالله سكتي بلاصيااااح...
ولعب عليها أخوها وقتَّل اولادها عشان العليا ألله يعلها هيه ويَّاه ان شاء الله ويهوو في نار اجهنم قولوا آآآمييين
وقعدت ديك المرة في بيتها تصيح اتصيح شهور مسكينة لييييين ماتت







شكرا لمتابعتكم NOOR 3LE، دمعة شوق، سحر رباني
وانتظرونا مع سالفتنا الجاية

[يسرى آل سنان]

علي مسكين الياهل ... والله اهي بعد افتكت وراحت الى اولادها لما ماتت ... مشكور قصه حلوه وممتعه وحزينه بعد ...
يالله ننتظر أكثر منك يا اخ ميثم ...

[فاطمة محمد]

قص ليه خنصره بعد << ماتتصدق يادافع البلا
حشى إلاااااا :dribble:


ألله يعلها هيه ويَّاه ان شاء الله ويهوو في نار اجهنم قولوا آآآمييين

مايستحي على وجهه .. كليل هالحيــا
وهيه من هبالتها بعد تتبرع ليه بأولادها
والمشكله صغيرهم بعد
الله يعينها

[بحر الورود]

مايستحي على وجهه دا يلعب بالجهال
والام مخترشه المفروض ماتتبرع بولادهااا لو عطته واحد ماتعطيه ثاني بعديادافه البلاء

[بحر الورود]

**القصه الولى **
يادين الحساشه الي فيه
اشوه مرته افتكت منه

[ناصرة المهدي]

ياعلي ياعلي ....!


ويش هذا ..!

سويت لينا رعب قاعده هدوء وصخه وصوت بقر في زريبة ..

وذيك الحُرمَة قاعدة تهشهش وتصوصو
خصصصص، بصصصصص، تــــــــــتتتتت، حيييييييييه، هششششششششش


يالله نتابع احنا ..

<< جميل جِدَاً هذِهِ القُصَصْ ..!

[ملاذ]

يا قصص ..
أم عبدالعزيز
قصة اولى
بخيل وجميلة
قصة ثانية
العليا
واطفال ماتت وخنصر مقطوع
والانسان كل انسان له يومه وساعته
والملتقى باعمالنا يوم القيامة

دمتم متابعين واياكم
واصل ابو المياثم

[ميثم توفيق]

سنتابع بعد يومين من الآن أي يوم الإثنين
لدي التزامات طارئة
نسألكم الدعاء

[فاطمة محمد]

موفقين ان شاالله
حيّاك الله في أي وقت يميثم

[ناصرة المهدي]

سَنَبْقَى نَنْتَظِرْ رُغْمَ كُلْ شَيْ ..

والله يوفقك إنْ شَاء الله ..

[عِشْقٌ وَلَائِي]

قصص أم عبد العزيز تراثية تراثيه

عجبتني قصة البخيل .... ما سكنت من الضحك وأني أقراها

الله يحفظ أم عبد العزيز ويخليها لك ولينا

واصل يا ميثم ... ونحن لأم عبد العزيز متابعون :)

[ميثم توفيق]

السالفة الثالثة






-الغيرة-


مازينة الحشاوي والسوالف إلا بالصلاة اعلى محمد وآلِ محمد
ما تشيلوا وادي وحطوا وادي حتى اتصلوا على نبينا الهادي



كان يامكان في قديم الزمان مايحلى الكلام إلا بذكر النبي وآله عليهم الصلاة والسلام
كان فيه وحدة عندها بنت. وديك البنت ماشاء الله تبارك الرحمان ... جمال، حلاوة عليها. كل ليلة إذا ناصف الشهر واكتمل القمر تطلع ابها في حوش البيت اوتقعد اتكلم القمر. تقول ليه:
قمر يقمَّااااار يابو سبعة أنواااار ....وين الأحلى أني لو بتي..؟؟
يرد عليها القمر : انتين حليوة وبتش أحلى وأحلى
كل شهر هذي سالفتها تطلع ابديك البنت في الحوش وتنادي ... قمر يقمَّاآآآر يابوسبعة أنواآآآر .... وين الأحلى أني لوبتي؟
ويرد عليها القمر: انتين حليوة وبتش أحلى وأحلى

داك اليوم انقهرت في بتها. قالت ليها يابتي قوم انروح بيت خالتش عندهم عرس. وأخذت ليها زبيل اثياب اوزبيل طفو. لمَّت اثياب بتها كللللهم في داك الزبيل. والزبيل الثاني حطت فيه الطفوا اللي تحت اقدر بيتهم. وعطت بتها زبيل لثياب والأم حملت زبيل الطفوا. حطوه على الروس وقاموا يمشوا – عاد لبنية ماتدري ويش في الزبيل الثاني مسكينة- يمشوا .. يمشوا .. ألحين ايوصلوا اشوي يوصلوا ... مافيه .. تعبت لبنية لمسيكينة قالت لأمها عاد امااااه متى بنوصل تعبت. قالت أمها لاه يابتي قومي داهوه بيت خالتش غير قريييييييب ..!! – شلاخه – عاد ويش تسوي الأم ألله يغربل حيالتها تقوم تخلي بتها تطلع من جهة الشرق وهيه تشيل طفوا واتفلته في الجو من جهة الغرب هههههه واتقول لبتها دشوف شوفش يابتي داكهم يطبخوا شفتي الدخان داكوه يبان له قلت ليش أني قريب بيت خالتش ديالله قومي ياغناتي قومي – والله مسكينة هلبنية- عاد قاموا يشيلوا وادي ويحطوا وادي ديالله صلوا على نبيتنا الهادي
لين وصلوا شجرة في داك البر لغبر قالت لبنية: أمااااااه أني إلا اتعبت ....أبقعد عدال هالشجرة...... لااااااه يابتي قومي دشوفي شوفي دخان الطبخ داكوه يبان من بعيد شوفي – وهيه تنفر من داك الطفو ألله يغربلها – عاد اوقامت هالأم الغيورة تسوي هالشكل لبتها إذا قالت أبقعد تعبت لو أبغى أنام ليييييييين خلص داك الطفوا من الزبيل اللي فوق راسها
عاد لين باخت ديك لبنية الجميلة ونامت لاشعوريا. أخذت زبيل اثيابها واتوسدت به او غفا اعيونها. خلتها تنام اوراحت عنها الأم. خلتها في داك البر لاايلاااااااه إلا الله لاحنيس لاونيس في داك البر ماليها غير رحمة الله. عاد قعدت لبنية من غبشة اوشافت ارجال اثنين جايين من بعيييييييد. هالفنين قاموا يتعايو مو عارفين ويشه السواد اللي يشوفوه. واحد يقول هذي مرة والثاني يقول هذا صندوق أسود. قال واحد منهم اسمع ياخوك ... أن كان هالسواد مال فهوه ليي وإن كانت جارية فهي إلك.... اتفقنا ..؟؟ قال ليه اتفقنا


يالله نكمل بكرا

[عِشْقٌ وَلَائِي]

الله حليوه القصة

كاني سمعت قصة تشبهها من جدتي

بس هذي شكلها غير

الله يغربلها من أم.. كذا تسوي في بتها

نستنى بكرى .. ونشوف ويش بصير في البنية ...

ويش يصبرنا... نستنى :)

[يسرى آل سنان]

يالله اتجنن .. ننتظر الباقي على أحر من الجمر

[فاطمة محمد]

ويعني احنا كلما بدينا في سالفه ودخلنا فيها ..... نكتشف انها مو مكمله ...!

[قديحي]

طيب والنهاية
لبنية طلعت جارية
لو طلعت صندوق اسود ؟

كمل يا ابو المياثم وترى اسلوب التشويق هذا مهو زين
كمل بسرعه لا امردك بسبيل الطفو الا عند الحجية

[كليله]

ويش اقول لك يا ميثم غير انّي مدين لك بهالعشّه
طول حياتي صراحة ماقصّرت وبدّعت وكأنّك
حاب تسوّي لي مفاجأة في غيابي ..
اشكرك من قلبي وانا من المصغين المتابعين لسوالف
امّ الجميع ام عبدالعزيز حفظها الله .

[ضوءُ شمعة]

ماشاء الله

قصص ام عبد العزيز جميييله جداً

ننتظر ماستسرده لنا

[عِشْقٌ وَلَائِي]

وين باقي القصة يا ميثم :)

ما يمدي ننتظر أكثر :)

[ميثم توفيق]

تكملة السالفة



عاد مشو مشو لييييين وصلوا لديك السوادة. شافوا البنت وانبهروا بجمالها بسم الله ماشاء الله ... إلا واحد منهم يقول ليها: انتين جنية لو أنسية..؟؟!
قالت ليه وهيه خايفة... أني إنسية من أهل الإنس. قال ليها ويش امقعدنش اهنا..؟؟! .... قالت ليه أني أمي قالت ليي دهمشي نروح معاريس بيت خالتش. طلعنا وقعدنا نمشي لين وصلنا لهالمكان. أني تعبت ونمت عدال هالشجرة وماقعدت إلا أمي مو هنا ..!! ... ماأدري عنها وين راحت ؟؟!... عاد أخذها أبو الجارية ووداها بيتهم .. لمن وصل بيتهم قام يكلم أمه من قبل مايوصل الباب وهوه فرحاااان ... أماااه .. أماااااااه طلَّت عليه من دريشة المطبخ قالت ليه ويش بغى ..؟؟!
قال ليها هذي جارية جيبنها ليش .. شفتها في البر..!! .. أخذت الأم الجارية وجهزت ليها غرفة وظلت وياهم ثلاثة أيام.
عاد داك اليوم جى الولد إلى أمه وقال ليها ..أماه أنا صار ليي ألحين ثلاثة أيام أدخل على الجارية ... أنا ماليي إلا أتزوجها. قالت ليها تتزوجها ومانعرف حسبها، مانعرف نسبها ولا ..... قاطعها قال أنا أبتزوجها أماه خلاص – انعجب ابها العكروت – عاد عقد عليها واتزوجها ومرت الأيام ولشهور وأنجبت اولاد وكبرت ديك لبنية وصارت خوش مرة
داك اليوم سمعت صوت واحد في الفريق عطار يبيع عطر. قعدت تقول في خاطرها أني هالصوت مو غريب عليي
كأني سامعتنه من قبل ..!! ليييييين اتذكرت انه جارهم البيت البيت في ديرتها الأولية.
لبست مشمرها او وقفت على الباب تبغى تتأكد هوه وإلا موه هوه .. عاد شافته وعرفته عدل ...... داك الرجال وهوه يمشي يعيط .. يالخنَّة يالخنَّة يلخنَّة يالخنَّة ..... قومي يلبنية عيطي عليه من ورا طبقة الباب وهيه اتأشر عليه بإيدها .. يعطااااار هلي ... يعطااااار هلي ... سلم على أمَّيييي وأبي
قال ليها منهي انتين ..؟؟! قالت ليه أني فلانة بنت افلان. ..... هممممم انتين فلانة ؟؟! قالت إيه
عاد رجع لبلده وراح أمها وقال ليها فلانة بتش اتسلم عليش سلام كثير.... بتِّييييي ؟؟!! أي بت من صاقعة أني ماعندي بناااات كانت عندي وحدة ومن زمااان ماتت وأكلتها اسباع البر. قال ليها بتش داكيه حيَّة وموجودة وتسلم عليش.
رجع ديك الديرة وقام يعيَّط ... يالخنَّة يالخنَّة يلخنَّة يالخنَّة ... طلعت ليه البنت وقالت ليه يعطااااار هلي ... يعطااااار هلي ... سلم على أمَّيييي وأبي .... قال ليها اتسلم عليش أمش، وراح عنها. يوم يومين أسبوع قامت أمها وعطت العطار هدية لبتها يوصلها إليها إذا راح ديك الديرة. قالت ليه انت بتروح البلد اللي فيها بتي له .. دخد هالثوب وعطها وياه. قال ان شاء الله، وراح ديك الديرة وأول ماوصل راح بيت البنت .. طرطق الباب طلعت ليه. قال ليها تسلم عليش أمش او وصتني أعطيش هالهدية. أخذت الهدية ورحمت والديه ودخلت البيت. لييييين جى رجلها البيت عطته دك الثوب – رجلها الأول كان ساحر – أول مامسكه قال ليها هالثوب يبت عمي لاتلبسيه. هذا مسوَّى فيه عمل. دروحي غسليه إذا منتين مصدقة.. قامت البنت مسكينة وهيه مو مصدقة وغسلته. ماغسلته إلا هوه يطلع منه لون أخضرررر- ألله يدفع البلا- قامت تصيح البنت. جى ليها رجلها قال ليها خلاص هذا قطيه في لدرام ولا تلبسيه. مرَّت الأيام وسمعت صوت العطار يعيَّط ...
يالخنَّة يالخنَّة يلخنَّة يالخنَّة
ردت عليه : يعطااااار هلي ... يعطااااار هلي ... جى ليها .. وعطاها كيس ملفوف على بعضه بعض قال ليها تلم عليش أمش وتقول ليش هذا أكل اكليه علشان تنشطي. أخذته ديك البنت مسكينة وهيه فرحانة وراحت عطته زوجها. أخذها من عندها وقام يطالع فيه. قال ليها لاتاكليه ... هذا مسموم ..!! استغربت لبنية وقامت تصيح. قال ليها لاتصيحي يابت عمي وقومي ارميه. مرَّت الأيام وسمعت داك الصوت في الفريق ...
يالخنَّة يالخنَّة يلخنَّة يالخنَّة
قامت وعيَّطت عليه ... يعطااااار هلي ... يعطااااار هلي ... سلم على أمَّيييي وأبي
ودخلت بيتهم. رجع العطار وراح لأمها. قال ليها اتسلم عليش بتش ... قامت تقول في خاطرها..- يوه أني مسوية ليها أكل وأكلته ولا ماتت ..!! ... لكن ألحين نسوي ليها حل ثاني- إن كيدهنَّ عظيم- قامت وعطته ابريق فيه ماي وقالت ليه إذا مضيت للبلد اللي فيها بتي عطها وياه وقول ليها إذا جت بتصلي تتطهر من هذا الماي هذا مقري عليه – ماكذبت الملعونة - أخذ لبريق اووداه لبتها .. قال ليها هذا ابريق من عند أمش إليش تقول ليش هذا الماي مقري عليه إذا بغيتي تصلي اتطهري منه. وراح الرجال... أخذت لبنية لبريق أو ودته لزوجها قال ليها هذا الماي يبت عمي مسوَّي فيه عمل لا تتطهري منه. قومي كتِّيه. وجيبي ليي لبريق. قامت كتته وجابت ليه لبريق وملاَّه ماي من عنده وقال ليها قومي اعطيه العار وقولي ليه يوديه لأمش وخليها تتطهر منه. عطت العطار لبريق وقالت ليه سلم عليها وقول ليها هذا هدية من عندي. قول ليها تتطهر منه. رجع العطار وسلم الأمانة. عاد ما مر أسبوع إلا شافوا شجرة كنار ثامرة من بيت أمها ههههههه ويش صاير ويش صاير قالوا هدي أم افلانة قايمة يها شجرة في إيدها خخخخخ ايقولك قاموا صبيان الفريق يقبعوا منها اكنار ههههههه مرَّت أيام وأيام وديك الشجرة تكبر وتكبر .. وصارت أمها ماتقدر اتقوم كله نايمة على لفراش من فقالتها
وصارت حديث الفريق عاد ديك الشجرة. واشتهرت في البلادين ان أم افلانة داكيه قايمة ليها شجرة في إيدها. جابوا ليها دخاترة مافاد. جو ناس يبغوا يقصوا ديك الشجرة مافاد. جابوا ناس يسووا أعمال ماقدروا يفكوا هالشجرة من إيدها. إيه والحل ...؟؟ قالوا ليهم هالعمل مايفكه إلا اللي سواه بس احنا مانقدر نفكه. مرت الأيام والأسابيع وصمعت البنت صوت العطار وطلعت ليه. عيَّطت عليه وجى ليها قالت ليه ها ويش أحوال أمي ..؟؟ قال ليها داكيه أمش مريضة. قايمة ليها شجرة كبيرة في إيدها. ومخلتنها لا تقوم ولا تقعد..!! راحت لبنية وأخبرت زوجها.... قالت ليها داكيه أمي طالعة ليها شجرة كبيرة في إيدها ووو........ قال ليها زين، دخدي محبسي – خاتمه اللي في خنصره – والبسيه والبسي اثيابي واتلثمي بالغترة وروحي ليها. من توصلي ليها اخذي خنصرش اليمين اللي فيه الخاتم ولوفيه على منبت الشجرة وقبعيها بتقبع ان شاء الله. ها ولانسي تغيري صوتش.. خليه مثل صوتي ولاتخلي أحد يعرفش. راحت لبنية ويوم وصلت لبيتهم دقت الباب. قاللوا ليها من قال أنا رجال سمعت بخبر الشجرة اللي عندكم وجاي أعالجها. فتحوا ليها الباب ودخلت .. قاللوا ليها يعني تقدر تعالجها ..؟؟ ترى هالمرة ماخلينا أحد ماجبناه إليها ماقدروا يعالجوها ..!! قالت إذا ألله مقدر عليها تتعافى وتفتك من هالشجرة أقلعها ان شاء الله. راحت لأمها ومدت إيدها اليمين والمحبس عليها ولافته على منبت الشجرو وقبعتهاااا .... إلا هيه تقول لبتها – ماعرفتها الملعونة - رحم الله والديك عطاك الله العافية، ماقصرت .. جزاك الله خير الجزااا.. شكروها وطلعت ديك لبنية من ديرتهم وراحت لرجلها وقعدت ويا أولادها وزوجها وعاشت حياة حليوة مرررة
ديك العصرية كانت قاعدة وياهم في الحوي تجيب ليهم سوالف أه لوَّل... يوم خلصت سالفتها وياهم قالوا ليها اولادها أمااااه انتين ماعندش أم ؟؟ مانشوفش تسولفي لينا عنها ..!! قالت ليهم يولادي أني عندي أم وعندي أبو ...قالوا لويش مانروح ليهم ..؟؟ بعيدين يولادي مانقدر نروح ليهم. وعاشت حياتها ويا زوجها وأولادها بأحسن مايكون وأمها ماناها إلا عذابها
والشر ليهم والخير لينا بالصلاة على محمد وآلِ محمد







انتظروا السالفة الجاية ... حماس








______________
معذرةً للتأخير
هيَ كثرة الإلتزامات
ليس إلا

[عِشْقٌ وَلَائِي]

شكراا ياميثم

والله يخلي أم عبد العزيز وسوالفها الجميلة

بس مرة ثانية كبر الخط ...
مو ناقصين نعمى .. بعدين نخليك تكتب لينا القصة بمسطرة برايل .. خخخخخخخ

[sweet moon]

السلام عليكم اي والله قصص (( أم عبد العزيز )) مررررره حليووه
شكراً أخ ميثم على الطرح
ننتظر كل ماهوجديد منك


تحياتي ................

بقايا روح

[يسرى آل سنان]

شكررررررررررررررا لك قصه حليييييييييوه
يالله ننتظر الجديد

[ناصرة المهدي]

ويش أحوال أم عبد العزيز ..
أن شاء الله زينه ..

ترا اني لما جيت متأخرة قامت ام عبد العزيز وقرأت ليي القصة كاملة ..
وأحياناً هذي فيدة التاخير - لكن مو بزيادة - يعني ما تحرق أعصَابكْ ..

بس صراحة سالفة حليوة ..!

لكن كيف هالأم قلبها بطاوعها وتسوي كذا ..!
صراحة مو قلب هذا الي يخليها تصير قاسية لهذي الدرجة ....


يالله ..


نستنى سالفة جديدة من أم عبد العزيز ..

[فاطمة محمد]

حيّاكم الله جميع
كل الشكر لك ياميثم ولأم عبد العزيز

سوالف حليوه
بس شجرة في ايدهااا مره وحده ......!
خيااااااااااااااال عندهم

[كليله]

احتجت لدوربين عشان اقراها
مصختها كبّر خطّك
واخيرا شكرا وبانتظار الباقي .

[هاشمية الاصل]

اللهم صلي على محمد وآل محمد
السوالف مرة حليوة, الله يحفظكم ويسلمكم ويوفقكم.
يالله ننتظر السالفة مو تتاخروا .

[الورد كله]

كل الشكر لك ياميثم ولأم عبد العزيز


نتتظر سالفه اخره من سوالف أم عبد العزيز المشوقه

موتتأخر ياميثم

[.....]

عساك على القوة ميثم وسأحاول عندما تسنح لي الفرصة طباعة هذه السوالف وقراءتها في وقت الفراغ ، هذا بعد إذنك طبعا

[فاطمة محمد]

زااااااااااااارتنا البركة

[ميثم توفيق]

حياك حبيبي (مشفر) السوالف واللي يكتب السوالف تحت أمرك غناتي

يالله انتظرونا بس كم يوم ونجيكم بالسالفة الطويييييييييلة - الله يعيني على كتابتها -

[فاطمة محمد]

ماخلصت الكم يوم لـــه ...؟!

[شموع ذائبه]

هههههههههههههههههههههههههههههههه
جعبوني السوالف
بانتظار سوالف جديده


سلم على ام عبد العزيز :)
وقول اليها مشكوره على السوالف ورحم الله والديها و والديك

[الورد كله]

نحنُ بالانتظار


ياميثم
زادنا الشوق

[هاشمية الاصل]

اللهم صلي على محمد وآل محمد


نحنُ بالانتظار


مع تحياتي
هاشمية الاصل

[ميثم توفيق]

انتظروا مثل ما انتظرتمونا وستجدونا إن شاء الله من المسولفين :)

[يسرى آل سنان]

ونحن في الإنتظار ايها المنشد ميثم توفيق ..

[ملاذ]

لا زلنا نتابع!
لا زلنا ننتظر!

أم عبدالعزيز شكلها اتسوي حلا وقيمات وسحور
الله يعينا على انتظار الطبخات الحلوووووة!

[سجايا الروح]

احنا بعد ننتظر
وسوي الخط خمسه
زين
مو تعمي عواينا

[ملاذ]

ههههههههههههه
عوايده يا خط باهت ضاربتنه الشمس
او خط يالله تشوفه

اخخخخخخخخخخخ

[سجايا الروح]

ههههههههههههه
عوايده يا خط باهت ضاربتنه الشمس
او خط يالله تشوفه

اخخخخخخخخخخخ


شكله هالمره بسوي الخط اصفر
ههههههااااااي

[حديث الآهـ]

اللهم صل على محمد وآل محمد الطيبين الطاهرين

لم يكن لنا نصيب من التراث غير سوالف الوالدة التي تحكيها عن جدي السيد حفظه الله

كانت هنا .. متعة .. وذكريات قديمة

دمتم موفقين

[ناصرة المهدي]

وكَأنَهُ نُسِيَ هَذَا الموضُوعْ ..!
فَأيْنَ سَوَالِفْ عَمَتَنَا أمْ عَبْد العَزِيْز ؟؟!

فَـ ...

اتحفنَا اخي ميثم بِها ..

[ميثم توفيق]

ياااالقبح عملي
أطلتُ عليكم معذرةً
كثرة الإلتزامات تحول بيني وبين هذا الموضوع
خلال هذا الأسبوع إن شاء الله تعالى سأكمل ماتبقى من هذه الحكايا

شكرا لكم جميعا للمتابعة والصبر الطويييييل



نسألكم الدعاء

[ابو مهدي]

مشكور عزيزي ابو تقي على هالسوالف الحلوة

والشكر واصل الى والدتك ( الله يحفظها ويخليها الك تشوف عيالك وعيال عيالك )


بس عزيزي طال انتظارنا على قولة بني قداح ( جا ويش تراك مصختها استملنا واحنا نستنه )


سولف لينا جعلك الله من المسولفين في الجنة

عاد قول الى ام عبد العزيز نبغى سوالف حماس ( من نوع ابو العدل )

مشكور عزيزي وعساك هالقوة

[فاطمة محمد]

عاد قول الى ام عبد العزيز نبغى سوالف حماس ( من نوع ابو العدل )
هههههههههههههه
ولازلنا بالإنتظار .......!

[هاشمية الاصل]

نحنُ في الانتظار


والله يوفقكم ويحفظكم جميعاً .


تحياتي هاشمية الاصل

[ميثم توفيق]

ونحنُ لازلنا متمرمطين متفشلين
ترى ياجماعة والله غصبا عني
ويش أسوي
جهازي في لسبيتااااار ألله يقومه بالسلامة
ومن غيره السوالف ماتجي

[ابو مهدي]

يا جماعة خبر عاجل

جائنا البيان التالي

تعرض جهاز الاخ العزيز ابو تقي الى نوبة عقلية وهو الآن في العناية المركزة

وابو تقي يسالكم ان تدعوا لجاهزه بالسلامة ( والا ترا بيدفعكم قيمة جهاز جديد بحجة انه بجيب ليكم سوالف )

ابو تقي جهازك فنقش قطه بحر
الشباب بيسوا الك قطية

[كليله]

ميثم
لاتطوّل على الاوادم اللّي ينتظروك
صلّح جهازك هالمخروب وجيب الفاتوره لقديحي وما بيقصّر
ويّاك , مو بعشانك , عشان جدّتك .. يالله لا تتأخر لا يروح
الحماس .

[فاطمة محمد]

يقوم بالسلامه ان شاالله
ويرزقه ربي الصحه والعافيه

[خجل الغروب]

السلامـ عليكمـ ورحمة الله

ما أعذب الماضي... وأروعه أشمـ رائحته بين النخيل رغمـ قلته

كنت أدور موضوع كذا لأني دائماً أروح للوالده الله يحفظها وأقول ليها
قولي لينا تقول ما اذكر...
بموضوعك يا أخي العزيز جمعت الأهل وقمت أقراء ليهمـ طلعت الوالده تعرفهمـ
ماضي رائع لا ينسى ... فكره لطيفه وفي غاية الروعه
تابع فقد أمضيت بنا نحو ضحكات تعالت في الأجواء
في إنتظارك فلا تطيل <<< الوالدة الا قالت :hehe:

وإذا ممكن أن أحتفظ بهمـ بعد إذن شخصكمـ الكريمـ
تحياتي لك وفقت يا أخي
في الإنتظار

أختكمـ خجل الغروب

[ناصرة المهدي]

جاءات خجل الغروب ياميثم لتُطَالِب بتحريك الموضوع ..

ولـ نَرفَعْ رايات الإعتراض ..


مــــــــــــــــــــيثم ..
أين سوالف جدتنا ام عبد العزيز ..


ننتظرها بشوق مرة أخرى .
ومرات أخرى ..