معجم يتحنتش ويتحرطم والكثير الكثير

[نعناع]

بسم الله الرحمن الرحيم
اللهم صل على محمد وآل محمد

أحنا لهجتنا الريفية حلوة ومتعددة والكثير من الاشخاص لهم رغبة
في الاطلاع على بعض الكلمات التي هي تسلك طريق النسيان من
الذكرة إلى الكثير من أبناء البلد

وهنا سوف يكون تذكار بعض الكلمات القديمة
وهنا سوف يكون التحدي مع بعضنا البعض
في معرفة الكلمات

دعونا نبدأ وعلى قولة المثل عيب الشغل يوقف

[نعناع]

سوف نبدأ مع كلمات ( زعلان )
وهي تملك الكثير من الكلمات الثراثية

زعلان = متحرطم + متحنتش + متورور + أمبووز + متغنفر + أمطنقر

إذا عجبكم الموضوع أبغى اعرف منكم كلمة ( حنطة )

[قديحي]

ابوعبدالله

الحنطة هذي مهو الا نعطيها الفقراء لما نسوي كفارة ونطعم ستين مسكين؟
كيلوين حنطة وكيلو شعير :D

هلايام الفقراء لو تعطيهم حنطة كان يتحنطبوا ويطردوك من عند الباب

يتحنطب = يزعل :p

[نعناع]

قديحي قوة :confused:

زين حطيت يتحنطب
والله واجد هذا كله متفرع من كلمة يزعل


هلايام الفقراء لو تعطيهم حنطة كان يتحنطبوا ويطردوك من عند الباب
والله مادري ياخوك قبل يومين واحد كح قدامي واحد قاله ( أو حنطة تقضي عليك )
فهمت أنا أن حنطة دعوة

[قديحي]

يعني جوابي صح يا ابوعبدالله

قصده ان شاء الله تاكل حنطه وتغص بها وتقعد تفاهق :p

ابو عبدالله ترى انت هالايام صاير جحلوطي في المشاركات
ما نشوفك الا كل اسبوع مرة

جحلوطي = ؟؟؟؟

[عجايب دنيا]

جحلوطي .. بخيل .. شحيح ..
للمثقفين .. ما تشارك واجد ..
صححوا لي المعنى لو كان غلط ..

على فكره قديحي ... تذكر سالفة التمبه الي صارت ايام الطفوله ؟

تحياتي ..
عجايب دنيا

[قديحي]

معلوماتك صحيحة يا استاذ عجائب دنيا
جحلوطي معناها بخيل

وإذا كان على التمبة ياما لعبنا وياما حطينا اهداف;)
تمبة = كورة

شكرا لك

صمايل ما حطيت كلمة جديده:confused:

شنهو معنى صمايل

[نجمة ليل]

مرحبا
صمايل معناها على فكره

الوقت متأخر قوموا انطبنوا!!!!!!

ما معني كلمة انطبن؟؟؟

[نعناع]

سلام شباب
مو شكله الوقت متأخر

ما علينا نحط لكم جملة حلو وبسيطة
ليش سهرانين يا حساحيس

حساحيس = ؟؟؟؟؟؟؟؟

رأجعين
:)

[دفء الاحساس]

أنطبن = انخمد , نام ... بس هذا اللي اعرفه
حساحيس = يمكن اللي ينبشو او يعفسو طول الليل ولا ينامو ههههههه :p
او عفر ياملاعين والله ماعرفتها ..

[نعناع]

أختي دفء الاحساس أنت تقريباً صح
حساحيس أو الحسحوس هو شخص من تحت إلى تحت
والحسحوس هو العكروت





:o الكبر شين

[الزينبية]

يعني أني من الحساحيس ! :confused:

[نعناع]

البارحة جوكم في العزاء

احد منكم يعرف كلمة جوكم

[عجايب دنيا]

البارحة جوكم العزا

يعني جو اليكم ..
وبالفصحى جاؤوا لكم:confused:
ما ادري هذا الي تقصده يا ابو عبدالله لو شي ثاني:o

تحياتي
عجايب دنيا..

[زوزو الحلوه]

جدتي (الله يرحمها)كانت تقول وحنضل أحنضلش ويشو معناها؟؟؟
حنضل أحضلش=؟؟؟؟؟؟؟؟؟؟؟:D ساعوني......

[اوليفر]

حنضل يحنضلش يا زوزو الحلوة
يعني ان شاء الله تاككلي شي مر زي الحنضل ويقطع مصرانش :p

الحنضل : نبات يشبه الليمون شديد الحموضة وشديد المرورة
وكنا يستخدم دواء قديما الى بعض الامراض

[ضوءُ شمعة]

مرحباه00000
اليوم جايني صمرقع

شنو معنى كلمة صمرقع؟؟؟؟؟؟

[نعناع]

جوكم يعني زحمة

أصمرقع والله انا بجيني أصمرقع لين اعرفه

صحيح يبغى لنا نعرفه هذا !!

[عجايب دنيا]

أممم
لحظة لحظة ابو عبدالله ..
كلمة جوكم ...
انا قرأتها بطريقتي بهالشكل ..

جَوْكُمْ

أنت شلون تقرأها .. :confused:

تحياتي .. عجايب دنيا ..

[زوزو الحلوه]

:D جبت لكم اليوم كلمه ويشوا معناها
كنكم أضبور مسنده=؟؟؟؟؟؟؟؟؟؟؟؟؟؟؟؟؟؟؟؟؟؟:confused:
قاعد يتحرطم بروحه =؟؟؟؟؟؟؟؟؟؟؟؟؟؟؟؟؟؟؟؟:confused:

[نعناع]

كنكم أضبور مسنده=؟؟؟؟؟؟؟؟؟؟؟؟؟؟؟؟؟؟؟؟؟؟
الطبور تعني الشي المرصوص أو المطبوق والمرصوص بعضه بعض

يمكن هذا

قاعد يتحرطم بروحه =؟؟؟؟؟؟؟؟؟؟؟؟؟؟؟؟؟؟؟؟
يعني زعلان ويهدر مع نفسه من شدة الزعل الي هو فيه

أن شاء الله صح

[كليله]

على طاري هالكلمات ...
مرّه واحد راح الى اخوه من الصّبح
وسأل مرته , وين اخويي (بيروحوا الشّغل)
قالت له والظّاهر كانوا ... متزاعلين ...
(داكو يتسورك) ... ويش معنى
( يتسورك ) ...بكسر الياء , وتسكين التّاء
وفتح السين وتسكين الواو وفتح الراء ..
..........
بعد اخذوا هاذي علي ( طريقكم)
اذا واحد قال للثاني (يالخمقه)
ويش يعني ..

[نعناع]

هلا فيك كليه
إذا ماخاب ضني متسورك تعني دايخ
الخمقه حسب علمنا أنه أستهزاء أو أنقاص من قدر الشخص
مثل ماباقي الا أنت يا الخمقه

[كليله]

قديحي .. معاك اخوك جورج قرداحي
من برنامج ( من سيمشق الكرتون)
معانا اخوك ابوعبدالله يبي يسألك عن
معنى كلمة (يتسورك) (والخمقه)
هو قرّب من الاجابه بس محتاج الى مساعدتكم
بعطيكم ثلاثين يوم , اقصد ثلاثين ثانيه عشان
الاجابه ... اذا سمعت حجره ضاربه دريشتكم
ابدأ بالجواب ,,,, شكرا

[نعناع]

يعني خطأ !
لعب علينا ابو الشباب
كليله بغطس يمكن ساعة ويمكن يوم أو يمكن سبوع وبنرجع لك

[قديحي]

كليله
ترى ابوعبدالله هذا مفشلنا ولا عمره عطانا جواب صحيح
الحين يتسورك يعني دايخ ؟
ويش جاب لجاب يا ابوعبدالله

يتسورك يعني يتسبح ؟ ;)
يا ويلنا من لسان ابوعبدالله اذا الجواب خطأ :(

الله يسورككم بالخير :p

[كليله]

ههههههههههههههههههههههه
اعذرني ياقديحي ماقدرت امسك نفسي من الضّحك
تبغى تسوّي نفسك طالع فيها على هالمسكين ابو
عبدالله ...بس
(يتسورك) يعني (يتخورط) يا....

[قديحي]

مرحبا كليلة

معي واحد شيبة في العمل سالته عن معنى يتسورك
فلأن نظره ضعيف قال هذا مندي لقديح ؟ :p
بدل منتدى لقديح :p

المهم عطاني الجواب وقال يتسورك يعني يتخشش

يتصوّخ
يعني يسمعك بس ما يبغى يرد ;)

[اوليفر]

والله انكم يا شباب فلة
ما ادري هالعشة كيف بتكون من دونكم
انتبهوا بس لا تمطر عليكم وتخرس عشتكم :p
ترى من بيهات ما جانا مطر

[كليله]

عزيزي قديحي ...
يتسورك ويتخورط كلمتان مترادفتان تحملان نفس المعنى
بمعنى ياكل , ولكن يتسورك وقتها في الصّباح , امّا يتخورط
فتقال كناية عن الغذاء , من تخورط البطن او المصارين من شدّة
الجوع ... والله يخلف على شايبك الظّاهر انّه مو شايب بس
مشيّب قبل اوانه , او هي حركه منك عشان تعرف المعنى ...
بس مقبوله ...
اوليفر ...
بوجودك انت والبقيه ان شاء الله هالعشّه متينه وما بتخر ولا بتتخرّس
خللّيكم معانا في عشّتنا وبرغم البرد والمطر بندفّيكم بأحلى السّوالف ..

[قديحي]

والله يا كليله طاح من عيني هالشايب
وانا الا شاد به الظهر وطلع خرطي عالآخر

الحين من صدقك ان يتسورك للفطور ؟
ويتخورط للغذاء ؟
والله طلعت يا كليلة بتتكلم لغات :a37:

[كليله]

موانا اللّي اقول ياقديحي
الوالده رحمها الله , كانت تقول لينا اذا سوّت غوري الحليب من الصبح
اللهم صللي على محمد وآل محمد , قوموا تسوركوا , وقت الغدا ...
قوموا تخورطوا ..
بس مومشكله , شقلب هاذي مكان دي .. خهخهخهخهخهخهخهخه

[نعناع]

ما شاء الله

زين كليله ممكن تحط كلمة ( يلبي ويحطم ) معاك يمكن قريبة من المعنى

حمدوه جالس في المعاريس يلبي ويحطم في العشا

[كليله]

موغلط يابوعبدالله ... نحطها ليش لا
يلبي يعني يواسي بطنه ويلهم ويستسل ويطوي في الاكل
ويحطم يعني تسمع حتّى حسّ كفّه وهو يضرب في
الصّحن من شدّة الشّره ...
امّا حمدوه ده مالك ملهوف لحدّه ..

[نعناع]

كليله أنا تعبت أبغى أعرف معنى حاجة
وأن شاء الله تعرفها أنت لاني سألت أكثر من مرة ولكن مافي جواب

أنا أبغى أعرف ويشهو ( طنبور طين)
لاني مرة من المرات سمعت واحد يقول كأنك طنبور طين

[ملاذ]

الضبر الظاهر معناها الكبير العجوز الشايب امضبع
يتحرطم بروحة الظاهر بعد معنا يكلم روحة على سي مو عاجبه او يسولف مع نفسه بصوت عالي على شي مو راضي عنه فهو جالس يتحرطم ويمكن نستخدمها اعتقد يتحمق على الشي

[كليله]

يابوعبدالله ... احيانا المعنى ليس له اهمّيه ..
الاهم ان هذه الكلمات مثل ماقلت (طنبور طين) وغيرها تستخدم كمصطلحات كنائيّه
عن معنى من المعاني ...
وكلمة طنبور طين مثلها مثل كلمة (الخمقه , الباير ) وغيرها اي انّها تقال للشخص
اللّي دائما فاش ودفش ومايتحرك ...
اخ ملاذ ...
حسب معلوماتي القاصره ان ضبر تطلق على الشخص اللّي اطراف يديه او رجليه عريضه
الى ان يضبّع وهو على هذه الحاله ....