ضربة مفل

[النخلاوي]

نجدد بهالموضوع تدوين امثال اجدادنا وابائنا المتداوله قديما
وما زلنا نتداولها في وقتنا الحاضر




المفل يقول

يدور محشه وهو في حزامه
الاعور علي العميان باشا
اقعد اعوج واتحجى عدل
الصخله تعيب على النعجه
عريان لايف على مفصخ
لين حجت البقره على قرونها
عادت حليمه لعادتها القديمه
خلي القرعه ترعى
يبرز الدواء قبل الفلعه
ماقدر على الحمار حطاه في العده
اللي مو على دينك ما يعينك
اللي يبغى السح ما يقول اح
اللي ما يرضى بجزه يرضى بجزه وخروف
كل يجر النار لقرصه
علمناهم على الطراره سبقونا على البيبان
اضرب الكلب يتادب الاسد
المناوش ولا العباط
كلب دوار ولا اسد رابض
شيل الخرى على الراس ولا الحاجه للناس
ماتت الحماره وانقطعت الزياره
شبعونا ضرب وشبعناهم سبيبه
لا برينا ولا غدى الشر
صخنا الماي وفر الديج

الاخت نور علي في مره قلت اليها كانش ضو في ليف
فسالت ويشو يعني ضو في ليف
قلت اليها سايلي حجي كليله او حجي قديحي بس الظاهر ماحد علمها
الضو في ليف يعني اتباعد 100متر لانها ماده سريعه الاشتعال

اللي ما يعرف المفل يقول
و كليله مايقصر يشرحه (طلعنا منها):p

[فاطمة محمد]

صبّحكم الله بالخير
قووه نخلاوي


اللي ما يعرف المفل يقول
و كليله مايقصر يشرحه (طلعنا منها)
لأنه يعرف يشرح مو زيّ بعضٍ من الناس ..... احم احممم



المهم ،


اقعد اعوج واتحجى عدل
ايلاويش قالوا كِده ..؟



اضرب الكلب يتادب الاسد
ياعلي .. ويلاويش كِده ؟؟

[السيد محمد الخضراوي]

موضوع حلو
بس ما نبي نخوض فيه بما ان الكبار موجودين هنا <<<<< ماتسوى علينا نألف :)


اضرب الكلب يتادب الاسد

انا الي اعرفه بضرب الاسد تتأدب الكلاب :)

المهم خذ هالمفل على الماشي
النار ما تحرق الا واطيها

تحياتي

[يسرى آل سنان]

ماشاء الله صفحه مميزه ورهيبه >> لأن اني احب الأمفال ...

يالله أخ كليله اتشطر واشرح لينا ( ضو في ليف ) >> بعض من الناس مايعرفوا يشرحوا ...

اخذوا كم هالمفل ..

- اللي مايعرف الصقر يشويه ..

- أكل ومرعى وقلة صنعى .. >> هالمفل الوالده الله يخليها فاضحتني به

- اللي يبغى السح لا يقول أح

لنا عوده مع أمفال جديده ..

[بنت علي]

امثال جميلــــــــــــــــــــــه

كح كح مغبــــــــــره مثلكــــ جدووو النخلاوووي امزح خخخخخخخخخ

عندي كم مثل بأضيفهم ،،،

اتكل اعويس على امويس وضاعت البقره

راح يدور الفايده لقى الخساره زايده

راح يدور الفايده راس ماله ماحصل له

ويش عرف لحمـار بأكل لنكــار

انطر ياحمار لين يجيكـ الربيــــــــع

بغى يكحلها عماها

الايد ماتحوش الا رمانــــــــــه

اتعنزو عنـــــي باخيط حصيــــــر

احنــــا في الشام وهو في عمـــــــــــان

الحق الجداب لعند البــــاب

اضـــــرب الحديــــد وهو حـــــــــــــامي

ادونـــ من طيــــن وادونــ من عجيــــــــــــن

النـــــــار ماتحرق الا رجول واطيها

ابن الاحــــلال عنــــــد طاريـــــــــه

طرينا القرد جــــــــــى ينط

هاذا الميـــــــدان ياحميدان

اربط صبعكـ والكل ينعت لكـ دوا

اقول تيس يقول حلبـــــــه

اللي يبنا عيت النفس تبغيــــــــــه واللي نبيه عيا البخــــت لايجيبــــه

عليك بالجار لو جـــــــــــار

جـــــــــــار السؤء ولا الوحــــده

ادب ولــــدك ولو زعلت امــــه

اللي يمشي دربــــ الزلق مـــا يامن من الطيحــــــــــه

يامن شرا لــــه من حلالــــه علــــــــه

ياغريب كن اديب

البيت بيت ابونا والاغراب يطرودونـــــــــا

عادت حليمه لعادتها القديمه

ابشري ياحليمه بجنة نعيمه

العيـــــن بصيـــــــــره واليد قصـــــــــــيره

مد ارجولكـ على قد الحافك

مايعرف كوعــــــــــه من بوعـــــه

مايعرف راسه من كرياســـــــــه

اتعلم التحسونـــــــــه على روس القرعان

اتعلم الصنعه وعلقها على الروزنــــه

احفظ مالكـ ولاتتهـــــــــــم جاركــــ

عمــــــره ماتبخر تبخـــــر واحترق

ماتت لحمــــــــــاره ونقطعت لزيـــــــــــاره

طول طول نخلـــــه والعقل عقل صخلـــــه

الطول طول شجـــره والعقل عقل بقــره

ليت لي اخــــــــــو ولو من ذيبـــــــه

سوالف النسوان اتخلي البياره بلا عشــــــا

الحقـــــران يقطع المصــــــران

بس هذولــــــــــه الا ادكرهم اللحين ,,

[النخلاوي]

قديحيه في هواها
اد جاء كليله يشرح لك المفل
قطرة مطر
هذا خطا مني
المعذره لذلك
وشكرا (قطره مطر ) على الملاحظه
وانت الحين تبيني ادوس على الجمر وانت اللي تحترق
نورُ علي
ضو في ليف هدا تشبيه
واليف النخيل بسريع يشب وبسرعه ينطفي
بنت علي
كان حطيتي في خشمش مشباص عن لغبار
شكرا اختنا على المشاركه
ان شاء الله دوم مو يوم

[فاطمة محمد]

قديحيه في هواها
اد جاء كليله يشرح لك المفل


ان شاالله
هدحنا قاعدين ويش ورانا .

[النخلاوي]

[center]الاخت قديحيه في هواها
الله يعين نشرح الامثال
لان حجي كليله موناوس يخش المنتدى
الله يعينه


(اكل ومرعى وقله صنعه)
يضرب لاانسان الخامل الكسول الذي لا شغل ولا مشغله

(الاعور علي العميان باشا)
من لديه عيب واحد يغطي على من لديه اعيوب كثيره

(اقعد اعوج واتحجى عدل)
كلام المرء افضل واهم من سلوكياته

(الصخله تعيب على النعجه)
واحد يعيب على شخص اخر وله نفس العيوب

(عريان لايف على مفصخ)
يضرب لمن يستنجد بمن هو اضعف منه

(لين حجت البقره على قرونها )
يضرب لاستحاله امر من الامور

(خلي القرعه ترعى)
دع الاشياء كما تحدث

(يبرز الدواء قبل الفلعه)
الاستعداد للشي قبل وقوعه

(اللي مو على دينك ما يعينك)
الذي لا يشترك معك في الفكر او عقيده لاتترجى منه خير

(اللي يبغى السح ما يقول اح)
من يريد شي يستعد له

(علمناهم على الطراره سبقونا على البيبان)
يضرب لمن يعلم انسان امرا ما فيقوم هذا الانسان بمنافسته

(شبعونا ضرب وشبعناهم سبيبه)
يضرب في الضعيف الذي لايرد الظلم الواقع عليه ويكتفي بالسباب

(صخنا الماي وفر الديج)
بعد ما جهزنا ما لدينا حدث طارىولم نستفد شي


وهذه شرح بعض الامثال من مشاركه الاخت بنت علي

(اتكل اعويس على امويس وضاعت البقره)
يضرب لمن يتكل على غيره والمتكل عليه ليس اهل اتكال

(راح يدور الفايده لقى الخساره زايده)
يضرب فيمن يريد تحصيل فائدة فيخسر

(راح يدور الفايده راس ماله ماحصل له)
نفس اللي فوقه

(بغى يكحلها عماها)
يضرب لمن يريد خير فياتي بما يضر

(الحق الجداب لعند البــــاب)
سرعة انكشاف امر الكذب

(اقول تيس يقول حلبـــــــه)
من يعطي راي غريب في امر واضح ويقال اذا كان الشخص ((منتهي)) حده

(اللي يبنا عيت النفس تبغيــــــــــه واللي نبيه عيا البخــــت لايجيبــــه)
ان الحظ ياتي بعكس ما نريد

(عليك بالجار لو جـــــــــــار )
اي تحمل اذى جارك حتى لو كان على غير حق

(يامن شرا لــــه من حلالــــه علــــــــه)
يقال للي اشترى شي وتوهق به

(ياغريب كن اديب)
يضرب كمثل للشخص الذي غريبا عن المكان فلابد وان يكون اديبا ويحترم اهله

(البيت بيت ابونا والاغراب يطرودونـــــــــا)
يضرب لمن يتعدى على الناس في حقوقهم ومكانهم

(عادت حليمه لعادتها القديمه)
يضرب لمن لا يستطيع التخلي عن طبعه القديم

(العيـــــن بصيـــــــــره واليد قصـــــــــــيره)
عدم القدره على صنع شي

(مد ارجولكـ على قد الحافك)
هذا المثل يطالبني بقطع رجولي لانها اطول من اللحاف بدلا ما ينصحني بصناعه كمبل طول

(اتعلم التحسونـــــــــه على روس القرعان)
يقال للعامل الردي و الغير ماهر من اجل التعلم

(اتعلم الصنعه وعلقها على الروزنــــه)
تعلم صنعه شي جيد وامان من الفقر والروزنه دريشه يستخدمواها لحفظ الاشياء

(عمــــــره ماتبخر تبخـــــر واحترق)
يضرب فيمن يقدم على امر لاول مره فيخطى فيه

(طول طول نخلـــــه والعقل عقل صخلـــــه)
هذا المثل غالبا يطلق على الشخص الذي يمتاز بطول القامه وقله التدبير

(الحقـــــران يقطع المصــــــران)
السكوت عن الشر اجدى ويجلب الاذى للمسكوت عنه


اما شرح كل الامثال صعب شوي
ويمكن تفسيرهم يكون مو صحيح ميه بالميه لانهم من راسي ولكن اللي اعتدت عليهم طبعا

[ملاذ]

جميلة هالامثال وحقيقة الامر عملية وتحكي واقع جميل خصوصا عند استخدامها على الوجه الامثل

دمتم بجمالكم

[كليله]

انا موناوس ادشّ يالنخلاوي
والاّ النّت واناقايل لك مصخنها ..
هذها انت ما قصّرت وشرحت
بعد ويش يبغوا فيني .
لي عوده .

[فاطمة محمد]

انزين رحم الله والديك يا نخلاوي، لكن يبقى شرح كليله طعمه غير اللي تفضلت علينا به ههههه.

[النخلاوي]

ملاذ
لو ادري هالموضوع بيدخله ملاذ المتغلي علينا ان كان من زمان حطينا هالموضوع

كليله
اشدعوه ابومحمد
بعد ويش يبغوا فيني
انت الخير والبركه

قديحيه في هواها
على قولتش هدحنا قاعدين ويش ورانى

[زهوري]

حلوه هالامثال .,.

ماخليتوا مفل الا حطيتوه .,.

مافي بالي ولا مفل احين .,.

[العريف]

عندي مفل دائما اسمعه من جدي
أبيكم اتعلموني ويش معناه

أتعلمني بالحمير وأحنا أولاد الحمير

[كليله]

اهلا بالعريف
برغم خشونة اللّفظ في المفل ولان المعتاد عليه ان تكون لفظة
حمار وانتم بكرامه تستخدم للذّم في اكثر الاحيان الاّ ان هناك
من يعرف قيمة هذا الحيوان وما له من فضل على الانسان في
كثير من الشّئون , والحمار اجلّكم الله حيوان مظلوم وسامح
الله من جعل منه مجرّد مثل سخريّه او ذم وماشابه ذلك والاّ فأنه
لولا ما دُرج عليه لكان مضرب الشرف والفخر للانسان ..
ورحم الله جدّك فقد انصف الحمار ايّما انصاف , هو لم يقصد السخريّة
بنفسه لاسمح الله انّما لمن يفهم المعنى فقد كان يريد بذلك وكأنه يقول
لشخص تعلّمنا بهذه الصنعه ونحن من بدأها او اخترعها او ماشابه ذلك ..

[قديحي]

على طاري الحمير
فيه مفل يقول

ما قدر على لحمار اتشطر على البردعه

وللعلم فيه قصة بعنوان الحمار والبردعه تجدوها في كتاب كليله ودمنه

[كليله]

غربل الله ابليسك يابوعبدالله
يوجد في كتاب كليله ودمنه بابان ذكر فيهما اسم الحمار
الاوّل (مثل الاسد وابن آوى واذنيّ الحمار) ويتحدّث عن ملك الغابة عندما
مرض وثقل حاله فقال له ابن آوى : ياسيّد السّباع قد ثقل حالك وقلّ صيدك
فما دواءك , قال : اذنيّ حمار ..
والثاني (مثل الحمار والاتان والابل )
وتتحدّث عن رجل كان له حمار يوسع له في العلف حتّ خصب وكلب وهاج
وذات يوم اخذه الى نهر ليشرب فأبصر في الضفّة الاخرى اتان (انثى الحمار)
فهاج ونهق وشغب الى آخرها لن اكمل ..
غربل الله ابليسك يابوعبدالله ..

[النخلاوي]

وهدي كم مفل

(القعدة بلا تتن كما العيش بلا دهن )

(سهم الحمسان احلو )

(الزين ما رادني والشين ما ردته اصبح منامي خلي من الزين واللاشي)

(وين رايح يالحظ قال رايح الى الشلقى والبلقى وشينه الملقى)

(اذا شفتها في جارك احسبها في اديارك)

(للي ما يزم القدح بيده ما يروى )

(اللي ما يصبر على روحه ما تصبر عليه الناس )

(الحي يحييك والميت يزيدك هم )

[يسرى آل سنان]

اخ نخلاوي

هادا المفل >> (وين رايح يالحظ قال رايح الى الشلقى والبلقى وشينه الملقى)

>> احنا مانقول البلقى >> نقول شوف الحظ وين رايح .. رايح إلى الشقلى وإلى الملقى ..

[كليله]

(اللّي مايزمّ القدح بيده مايروى)
هذا المثل له قيمة معنويّه كبيره في نفسي
احاول اغلب الاحيان ان اطبقه في شؤن حياتي
فالمتمعّن فيه يفهم جيدا ضرورة الاعتماد على النفس في
قضاء الغرض والحاجه اما ان يسلّم المرء امره للآخرين
فلن يجني من وراءهم غير التّعب .

[فاطمة محمد]

القعدة بلا تتن كما العيش بلا دهن
إيلاويش ...؟



وين رايح يالحظ قال رايح الى الشلقى والبلقى وشينه الملقى
منهيه الشلقى ....!
ومنهيه البلقى ..؟!

[النخلاوي]

القعدة بلا تتن كما العيش بلا دهن

إيلاويش ...؟

المجالس التي تخلو من وضع النارجيله او القدو لايحلى الجلوس بها


وين رايح يالحظ قال رايح الى الشلقى والبلقى وشينه الملقى

منهيه الشلقى ....!
ومنهيه البلقى ..؟!

يذكر الى الذي ياتيه الحظ او الخير وهو ما يستاهله

الاخت نور علي
ما فيه فرق بينا وبينكم كلنا اهل وكل الامثال اللي دكرت انتم تقولها
يمكن بعض الكلمات فيها اختلاف بسيط

[فاطمة محمد]

المجالس التي تخلو من وضع النارجيله او القدو لايحلى الجلوس بها
و أني أقوووووول ويلاويش النسوان يقعدوا على القدوو ..،
وكلما قلنا لأم الساده لاتسوي قدوو قالت مايصير بعد .
طلعت الجلسه ماتحلى إلا بالقدوو <<< وععععع على القدو وتوابعه .




يذكر الى الذي ياتيه الحظ او الخير وهو ما يستاهله
مافهمت ..؟

[كليله]

ليس بهذا المعنى الذي فهمتيه قديحيه او تعجّل النخلاوي في توضيحه
لأن توضيحه بهذا الشكل قد يعتبره البعض من اصحاب الحظّ تجنيِ
عليه أوحسد لا اقلّ او اكثر , وانّما ينبغي حجز معنى هذا المثل في
فئة معيّتة من النّاس يرون انّهم دائما قليلوا الحظّ واّن رزقهم والعياذ
بالله قليل او يخطئ فيصيب غيرهم , بل انّ البعض يفسّر اطلاقه من
باب الكسل والعجز وقلّة الحيلة والوهم لدى قائله الذي يتصوّر انّه
يكدح ويعمل بقوّة ولكن الحظ يذهب لغيره اللّين يعملون ببساطه ..

[فاطمة محمد]

كليله ، رحم الله والديك على التوضيح
شكراً لك و للنخلاوي بعد .

طيّب الله أنفاسكم الزكيّة
لاحرمنا الله من بركات هذه الزوايا الجميله .

شكراً لكم
http://www.al-amakn.net/up2/uploads/e47e7580f1.gif (http://www.al-amakn.net/up2)

[النخلاوي]

تشكر اخي العزيز كليله على التوضيح
الاخت قديحيه في هواها
اللي ماتعرفيه اسألي وان شاء الله مابنقصر معاكم

وهذه مجموعه اخرى من الامثال
(خبز خبزتيه يا الرفله اكليه )
(مقابل الجيش ولا مقابل العيش )
(وين اذنك ياحبشي)
(حلال عمك مايهمك)
(اتجمعها الغزاله وتاكلها السباله )
(اللي ما يسوقه مرضعه سوق العصا ما ينفعه )

[كليله]

تسلم ايدك يالنخلاوي على هالامفال الجميله
عجبني (مكدّة الغزاله تاكلها السباله )
ياما اكلنا من هالمقلب وشربنا وعصرنا حمض , ايه تعبنا وسوّينا تالي
جا غيرنا واكل ... سامح الله الجميع .
والحمد لله وّلا واخيرا على نعمة الصحة والعافيه والولاء لمحمد واهل بيته الطاهرين
صلوات الله وسلامه عليهم اجمعين ..

[زهير الجنبي]

ما شاء الله عليكم شباب وشابات حلوة هالصفحة
وأتشرف إني أشارك وياكم بكم مفل

هم العرس ولا وجع الضرس
أعطي الخبز لخبازه
طالع وجه العنز وأحلب لبن
خليلوه وش كده مكدته لكلبه
روح بعيد وتعال سالم
عمره ما تبخر تبخر واحترق
أربط صبعك والكل ينعت لك دواء

وأعطيكم مثل عربي حليو
حشفاً وسوء كيلاَ

[النخلاوي]

حياك الله معنا في قسم التراث
نحن يشرفنا ان تشاركنا في هذه العشه

ولي تعقيب على المفل
هم العرس ولا وجع الضرس
يقول الثاني
لاوجع الأوجع الضرس ولا هم الأهم العرس
فرد عليه الأمام علي عليه السلام
لاوجع الأوجع العين ولا هم الأهم الدين

مشكور اخي زهير وننتظر منك اكثر فلا تتأخر

[النخلاوي]

عدنا لكم بكم مفل

(من سبق لبق)

(يدخل عصه بشي ما يخصه)

(انا واخويه على ابن عمي وانا وابن عمي على الغريب )

(اعمى وقايدنه مجنون)

(الكلمه اللي تستحي منها بدها )

(ضربني وبكى وسبقني وشكى)

(لافات الفوت ماينفع الصوت)

(يمدح السوق من ربح فيه)

(الشايب يدلل والولد يعلل )

[دفء الاحساس]

امثال جميله جداً ,, سمعت بعضها من الوالده الله يحفظها
وربما اغلبها ,, مشكور اخوي زهير والنخلاوي على هذه الامثال
استمتعت هنا كثيراً ولنا عودة الى هذا المكان

[كليله]

ايو والله امفال جخّه يالنخلاوي
وانا كالعاده اوقف عند المفل اللّي يلفت انتباهي اكثر
(الكلمة اللّي تستحي منها بدها) صحيح كيف الواحد
يصير جرئ اذا ظل ضلّ طول عمره يستحي وقالوا بع
(الحيا قطّاع ارزاق)

[الدرة الهاشمية]

مشكوووووور خوي النخلاوي
ماخليت شئ من الامثال
ماشاء الله عليك
صدق نخلاوي
ههههه
هذوله كم مثل من الي سقطوا سهواً من عند النخلاوي

(امنت كيسها حسن املت حسن امين)
(الي مايعرف للصقر يشويه)
(ماحد يقول عن لبنة حامضه)
(القرد في عين امه غزال)
بس هذوله
تقبل مروري المتواضع

[النخلاوي]

دفء الاحساس

المفل يقول( العوض ولا القطيعه)
وننتظر عودتك الى هذا المكان

كليله
عجبني واجد المفل
(الحيا قطّاع ارزاق)
وخاصه لين صار واحد يبيع ويشتري
مسكين ماياكل عيش


الدرة الهاشمية
نورتي الموضوع بتواجدك
وننتظر المزيد من الامثال

[المقداد]

السلام عليكم


اقدم ليكم اربعة امفال


(لا تقولوا طاسه ترى في البيت اقرع)
(الباب الى يجي منه الريح سد وستريح)
(شيل الخرى على الراس ولا اطلبه من عند الناس)
(اقرع ياكل حلاوه قال بفلوسي)

تحياتي
المقداد

[النخلاوي]

(شيل الخرى على الراس ولا العازه الى الناس)
هدا المفل عجبني وعلى الانسان يشتغل ويكدح حتى ولوكانت الشغه شاقه اوغير دلك .......
افضل له من ان يحتاج اويمن عليه احد
شكرا اخي المقداد على المفال الحلوه

[ابوهادي]

أخي العزيز نخلاوي

اسمح لي ان اقول ما رواه لنا العم في كيفية وصول هذا المثل الينا
وهو
(شيل الخرى على الراس ولا العازه الى الناس)

باختصار
ان في رجال حالته حالة مسكين مرة وداقنه الفقر
وكل ما يروح في شغلة يفنشوه يوم يومين ويطردوه
يقولو ليه انت اصلا ما تصلح حق عمل يالله مع السلامة
وصاكة في وجهه الدنيا المهم في لأيام القديمة
كيف كانت دورات المياه اعزكم الله
كانت عبارة عن مبنى صغير له باب ويقضون حاجتهم فيه الى ان يمتلئ
ويأتي الرجل بحماره ويينضفه ويذهب به بعيدا عن الحياء السكنية
(زي سيارة المجاري احين يعني )ههههههه
المهم من منا يقدم على مثل هه الشغلة يدخل في الوسخ و وع وع وع
ويحمل ويشيل
المهم هذا رجالنا ماحصل شغل ابد قال مالي الا ها الشغلة ويش اسوي في عمري
المهم اول ما ابتداء توه بيفتح الباب حق الخلاء شم الريحة نفسه عيت تدخل المكان
فاخد يخاطب نفسه اسمعي ايتها النفس ان لم تدخلي الى هذه المحل ساوصلكي الى مكان
اردى من هذه لأوساخ والروائح الكريهه فسمعه الرجل صاحب المنزل المراد تنضيفه
فتعجب فناداه واجلسه بجانبه فقال يا رجل ايوجد مكان اردى واوسخ من هذه الشغلة
قال نعم مد اليد الى الناس والتسول اسواء واعظم من هذه

فقال(شيل الخرى على الراس ولا العازه الى الناس)

[المقداد]

السلام عليكم


تفضلوا


(الي ما فيه خير مع اهله ما فيه خير مع الناس)
(رقعت الفوب منه وفيه)
(ما يحك جلدك الا ظفرك)