موت ...والإسماء

[موت]

.
.
الاسماء ومشكلتي
.ومن يجد الحل له جائزة بشرط ان يعطيني حل دائما غير مؤقت.

قصتي اليوم .
ذهبت الى مكان عملي بعد اجازة شهر تقريباً ودخلت المبنى المقصود
اول واحد ..هلا موت

هلا فيك حياك ..كيف حالك وش مسوي وين رحت وسوالف ربع ساعة ..وانا كل شوي اطرح ايدي على راسي وش اسمه ياربي ..خلصت المحادثة معة ومشيت ولا عرفت اسمة .

مشينا اشوي واشوف واحد فاني شفته من بعيد ..وانا اقول ان شاءالله ما يشوفني ..المصيبة مشيت شوي الا يقول فلان هلا ,,,قلت له هلا فيك وسوالف وضحك ..ونفس السالفة ماذكرت اسمة . مشيت عنه الا يقول وش ايميلك :confused: عطيته اياه .

المصيبة الكبيرة
العود الكبير ...عنده كل اموري .وهو يسوالف الا يقول وش اسمك فرحت :D شفت واحد يسألني عن اسمي ..ابتسمت الا يقول لي اسف ترى انسى الاسماء بسرع بسبب تغير البيئة ..قلت اييييييي جيت وجابك الله وطرحت عليه مشكلتي مع الاسماء ...وعطيته السالفة وضحك :D


وطلعتي من مكتب العود ..شافوني چم واحد وقفت عندهم ولا واحد اعرف اسمه وقفت شويات ومشيت عنهم وقلت ليهم نراكم وقت فاني .


منهو الا يعطيني الحل ؟
بالتفصيل ؟ المسلتزمات . الوقت. المكان . الخ
وله جائزة من "موت"

[ورقة التوت]

اني الاسماء والوجوه لا انساها ولو بعد سنين
اعتقد اني ما اقدر افيدك
وخسرت الجائزة
:(

[محمد الفرج]

سلام عمي موت

شوف تراني اعاني من نفس المشكلة ..

و دورت على حل لين اتعبت ..

الحل الوحيد إلا لقيته بكتاب جربته و لا حسيته مجدي ..!

السالفة و مافيها طبقا لصحاب الكتاب إنك تركز على اول لقاء من الشخص ..!
تخلي تركيزك في ملامح وجهه عدل أولا و بعدين فيه بشكل عام ..!
بعدين تسأله عن اسمه أو يتم تعريفك به ..

هنا يجي الحل إنك تحاول توجد قرآئن بين شكل الوجه أو الجسم و الإسم ..!
إن لقيت هالقرينة تثبتها في مخك و لما تفترق تسجلها في ورقة و تراجعها بعد يوم و يومين و اسبوع و شهر بنظرة بس " يعني تسوي لك ورقة للقرآئن و تطل على كل قرينة ثلاث اربع مرات مرتين ورا بعض بيوم و مرة بعد فترة و مرة بعد فترة اطول .. "
بكذا ما راح تنساه حسب ما يقول الحجي

المشكلة لما ما تلاقي قرينة ..!
هنا الكاتب يوضع لك الخيال كأداة لاستحضار قرينة

كمثال واحد اسمه ضياء .. تتخيل رأسه كأنه لمبة http://www.qudaih.com/music/new2/pics/smile/06.gif
واحد اسمه يوسف تتخيله أحلى خلق الله و بحيث من تشوفه تذكر النبي يوسف عليه السلام
واحد اسمه مدحت تتخيله بلباس الشعرا لول و كأنه قاعد يمدح في نذل

وهيك إنت بخيالك تقدر ..

بس المشكلة لما تتشابك القرآئن
وتشوف ضيا و تقول له هلا انور ..!

عموما الشغلة عادية جدا .. و مو بذاك الصعوبة الواحد يتغلب عليها ..!

اكو شي قريته في كتاب بس كانت مشكلة للنسيان بشي ثاني و هي أني احط حاجة في مكان و بعد فترة انسى وين حطيتها و اخرب الدنيا عليها ..
هذي حلها المجرب و الأكيد بالنسبة لي هي إنك لما تحط الشي في مكان تذكر البسملة بس ..
من استخدمته ماكو شي انسيت مكانه إلا لما اكون ما بسملت ..!

دمتم بخير

[فاطمة]

... وتر حساس و انضرب ..

المشكلة مشتركة .. و يبدو أن العلاج معيي !

الأمر الذي يجعلني أراها عويصة جداً موقف جعلني أتمنى أن تبتلعني الأرض ..
في ليلة من ليالي القدر سلمت علي إحداهن و قبلتني و كانت تحادثني بحفاوة ، و تتحدث ، و أنا بعالم محاولتي تذكر إسمهاا .. ( يا ربي وش اسم هالآدمية ، و من بيت من ...) ..
:o السالفة طولت .. و صارت فشيلة من أتذكرها :rolleyes: !

المشكلة تتواجد لدى الأشخاص الذين يلتقون بكم كبير من الوجوه كالمدرسين ..
ساعدهم الله و هم يحفظون قوائم الوجوه و الأسماء !

حرف أعطاكَ يا موت مفتاحاً للعلاج ..
لكن العلاج بيدك أنت .. لا ضيرَ أن تسأل و تقول .. عفواً .. ذكرني باسمك ..
( ربماا هناك بعض الضير ) ..

لي حضور آخر .. إن أسعفتني ذاكرتي .. و أسعفني الوقت ..

:) ابتسامة وجه هذا الموضوع ..

[موت]

اسمع يالحبيب .
قبل كنا نستخدم طريقة ركب الاسماء على الاشكال .
مثلاً .نطق اسمه. جنة قلت خلاص كل مااذكره اتذكر الجنة ..بس لو تشوف شكلة يلوع چدك ومايركب عليه جنة ..

والشي الثاني ياحظي ..
يعني الا فيني كافي تريدني ابقق اعيوني اكثر من كذا مافيه فيدة . تريد تبهدلني اكثر من كذا؟؟
أنا قلت ليهم يطرحوا ليهم باتش وخلاص :D
شكراً عيوني حرف.

ورقة التوت
ما نستفيد منكم شي
ولهذا حامض على بوزچ اي جائزة :p

فاطمة
اهي السالفة على كل واحد نقول ليه وش اسمك مرة فانية كان تبهدلنا كل يوم اقول ليهم وش اسمك. مرة من المرات كنت جالس واريد اتذكر اسم شخص جنبي اريد منه شي سئلت الا جنبي جلس يضحك .انتبه الشخص قلت له وش اسمك جلس يطالع فييي ويضحك وقلت له انسى الاسماء بسرعة ..

[نعناع]

غربلك الله ياحرفوه
الحين انت ماتعرفنا أحنا شعب ملول ونستمل حتى من شرب الماي
تبغى الرجال يدور بدفتر ورقة هذا اسمه ..نور يعني سيكيكو وين جالسين
غلط الرجال وقال عداد أو طبلون وكله عساس اسمه ذاك نور :confused:

أسمع موت أنا صحيح أنسى بس موقت
يعني لو أشوف واحد كنت اعرفه ونسيت أسمه ولا اقد اتذكر اسمه يمكن أموت
قبل فترة كانو الشباب عند نا في البيت عازمين شباب على العشا وأنا أنتبهت إلى شخص
أعرفه والله ياخوك عزلت الناس الي في المجلس كلهم وحصرت تفكيري بس أنا وين شفته
جلسن وتعشينا وضحكنا وبينما الرجال يشرب الشاي كان أخلعه بدون تفيكر وبصوت شبه
عالي .. بس ؟ تذكرتك ؟ أنت الي شفتك في المكان الفلاني !! أشوي أنتبهت لنفسي والي في
المجلس يطلع فيني مستغرب !

تدري يا موت أنا لو ماعرفته أموت من الزهق
الشباب يقولو لي ليش كذا أحرجت الرجال
قلت والله لو ماعرفته أمرض

خلك افري وقوله ويش أسمك ويش بصير يعني
أنت أنسان تنسى الاسماء بسرعة

أوعليك أن تخبر الي تتعرف عليهم أنك تنسى بسرعة حتى لا يزعلو منك

[اوليفر]

حرام عليك يا ابوعبدالله خلعت الرجال
وما عرفت اسمه يعني ويش صار؟
طاحت السماء على راسنا يعني
كله اسم
انا عندي الاهم اننا نتذكر الشخص نفسه ونتذكر الموقف ونحاول نبتعد قدر الأمكان عن
الاسم والامور بتصير ماشية تمام التمام
لان الشخص الثاني ما يفكر اساسا انك ما تعرف اسمه ولا يعتقد انك نسيته طالما انت واقف وتتكلم معه
يعني هذا مجرد شعور نفسي في داخلك انت والآخر ما يشعر به
ومحاولة التذكر بتجعلك في موقف غير حلو لأنك بتكون مشوش التفكير وقت الكلام
وتحاول تتذكر الاسم في الوقت الا هو يوجه لك كلام او شي ثاني
فما بيكون عندك الرد المناسب لكلامه
وهذا احتمال يؤدي الى شعور الشخص انك مو مرتاح لمقابلته
وهذا شي اعظم من انك نسيت الاسم

نصيحه لك يا موت
انسى الاسماء
وتذكر الوجوه
ولا تهتم لأن الاسم بيجيك من تلقاء نفسه وبتشوف انك رجعت وذكرت الاسم بدون تعب ولا شي

[الزينبية]

مشكلتي عكسية ..
مافي اسم أنساه ...
وموقفي الأخير .. تعرفت على إحداهن مع اني لم أرها منذ أن كانت الشرائط الحمراء تزين شعرنا ..
وهي طبعا مستحيل تتذكرني ..