العاب لول

[يحيى البشراوي]

في الحقيقة كنت اتكلم مع الاخ حرف عن لعبة معينة كنه نلعب فيها الاول وكنا نستخدم كلمات بسذاجة المهم ما علينا .
بس حبيت اعرج على العاب الاول لان اظن انه الشباب نسوها او نسو قوانينها
وانخلي كل واحد يذكر لعبة ويعطي نبذة عنها وانا باقول اول لعبة .
الكيلو كيلو
وهي عبارة عن مجموعة من الاولاد يتجمعون وينصبون احدهم لطرح لغز ما ومن يستطيع حله يعطى قطعة من القماش في غالب الاحيان تكون مربوطة عدة ربطات حتى تصبح متينة وبعدها يقوم بملاحقة الاولاد وضربهم بها حتى يصدر صاحب اللغز كلمة العفو وبعدها يصبح هو اي من حل اللغز هو من يصدر اللغز الجديد وهكذا



ما ادري اذا تبون نكتبها بالعامية لو بالفصحى الخيار لكم

[ضوءُ شمعة]

السلام أختي فرات
الفكرة مشجعه وتذكرنا بلعب لول المستمر00:rolleyes:

لعبتنا اليوم00
المُخطه:D
هذي اللعبه هي عباره عن خطوط مرسومه على الارض بشكل مربعات او مستطيلات
تكتب داخل كل مربع رقم معين بالتسلسل00
نقوم بالعاده برسمها بالفحم في الشارع او فوق السطوح
يقوم الشخص بالرمي الحجر او الإسوار او اي شيء اخر حتى ولو الله يكرمكم
<طبقة إنعال>:o يرميها بشكل عشوائي تقريباً على اي رقم معين
يلعب وإذا اصبحت رجله على أحدى الخطوط
يخسر ويلعب الذي يليه
وهكذا هي الحاله
كل يوم على نفس السالفه
بس متعه ووناسه 00شيء من ذكريات الطفوله

رسمت لكم مخطه ببرنامج الرسام
بس ياخسارة الملفات المرفقة مي راضيه تشتغل عندي:(

[اوليفر]

خاست عروسه

الا يعرفها له من عندي جائزة :p

[نعناع]

خاست عروسه

ليش ماعرفتوها
تحركو حتى نعرف منك ( من حرق حرق فييه)

[اوليفر]

هاه ويش اخبار عروستكم خاست لو بعدها تحت لخياش
معقول ما تعرفوا لعبة خاست عروسه
لا انا بديت اشك انكم مو قديحيين اصليين

ما علينا
من حرق حرق فية الا اعرفه انها يلعبوها في الشمس
واذا دست على في الا وياك تكون غلبته
يعني يوم المطر انسوا اللعبة خير شر
والعبوا صبيح صبيح في ايد من يطيح ;)

[موت]

مثل ما شرح لينا احم احم
يقولون "خاست عروسه" تتكون من فريقين طبعاً يتقاسموا بالضبط . زي ما تذكر ينام واحد على الارض ويغطوه بكراتين واخياش
اذا ماعرفوا منهو الا مغطي يقولوا خاست العروسة"

هذا الا اعرفه

نسيت الباقي "الكبر شين"

[نعناع]

نبغى نعرف ونعلم الي مايعرف
لعبة الطناقير وبما انا لدينا شخص معروف بالعبة وهو أشهر شخص
مزاغي في الطناقير نبغى منه يشرح لنا ماهي لعبة الطناقير

الشخص هو : لاعب المنتخب القديحي المزاغي المشهور ( قديحي)
نتمنى منك عدم التقصير في الشرح

وحرك روحك وراك شرح إلى لعبة المكاسر

[قديحي]

يا ابوعبدالله

شكلي باروح اعقّص ليي طنقور ملواح وبارزه في راسك على مسخرتك هذي

الحين مشغول شوي
خلني اخلص كم شغلة وارجع

[يحيى البشراوي]

صار ليي كم يوم قاعد افكر في اسم لعبة بس مانا مذكرنها ابي اشوف منهو اللي يعرفها
اللعبة :

دائرة ترسم من السنون واحد يضرب عصاة وبعدين ايمترو بالعصاة المضروبة من المكان اللي وصلت اليه لين الدائرة واللي ايوصل ابعد هوه الكسبان

[كليله]

اهلا شياب ....
لعبة الخوصه اشمحلاها ...
احد يتذكرها .. كنّا نجيب خوصه ويمسكها الليّ
بيبدأ اللعبه بيده ويحط عليها من فوق خوصه صغيرونه
آه لو اعرف ارسم كان راويتكم ايّاها , زيّ حرف الالف
فوقها خوصه مكسوره شكلات المظلّه ...
يمرّرها على المجموعه اللي جالسه وهو يقول :
من فسى فسندّوا
حيّةً وعقربوا
شيخنا ابو الفسو
فسوته الحامضه
اللاّمضه
احمض من الخلّ
المعتّقوا
يبغى ليها مهاره وعدم رتباك , لانّه اذا
طاحت ياويله ,,,
شباب اذا انا غلطان في شي ساعدوني
وصحّخوا لي , لاني على ما اظن اللي ذكرته صحيح ..

فرات ... اللي يقول اللغز كان يقول ... مثلا
هاو هاو هاو ... طويل ومشقوق بطنه
ويشهوه ...

[أميرة الجنة]

لعبة الغباية
هي ان يتم أختباء كل الفتيات , بعد أن تقوم أحداهن بالأستدارة حتى لا تعرف أين إختبأت الفتيات ,ومن ثم تقوم بالبحث عنهن حيث يتم استبدالها باول فتاة يتم إصطيادها ...
لعبة الدحاريج..
هي عبارة عن خمس حصيات يتم قذف إحدى تلك الحصيات وحمل البقية واحدة ثم إثنتين ثم ثلاث وهكذا دون أن تسقط أيا من تللك الأحجار .. :rolleyes:

[نعناع]

يعطيكم العافية

كليله مادري سمعت عن لعبة قلة أخلاص لولا

قلة أخلاص .. هي أن يجلس شخص يمثل القلة في وسط دايرة من الشباب
والذي يجلس في الوسط يقوم شخص بحراسته لان الاشخاص الموجودين
يضربون الشخص الجالس على شكل رفس بالارجل بقوة
وإذا قام الحارس بضرب أو لمس أحد الاشخاص يقوم بلجلوس مكان الجالس

موت تذكر العبة لو نسيت

[كليله]

لانّي:o اتادّيت منها واجد ما ابغى اتذكرها
بس مافي على لعبة الطناكير والمخشعه
اللّي اذا نشفت رطّبناها بالشّخ ...:(

[قديحي]

هاو هاو هاو ... طويل ومشقوق بطنه [/size]
ويشهوه ...

كليلة
هذا الضلع صح ؟

ذكرتني بألغازنا القديمه
كلها خمسة ألغاز والكل يعرف جوابهم ولا نسالهم الا هم

- طاح من فوق ولا انكسر -- كسرته بيدي وانكسر
- طاح من فوق ولا تلايم
- طاح من فوق ولا سمعنا له طقة
- اسود سويدان واقف على الباب يترزق الله

وآخر لغز

أخضر في السوق احمر في امك :p
كأننا مصخناها انا وانت يا كليله
الظاهر اليوم بنحصل لينا طراقات من ابوعبدالله :o

[قديحي]

[SIZE=4]بس مافي على لعبة الطناكير والمخشعه
اللّي اذا نشفت رطّبناها بالشّخ ...:(

حلوة الحركة يا كليله
ولهذا السبب الوالدة ما كانت ترضى اجيب طناقير داخل البيت
على بالها ان النجاسة في الطناقير
ما تدري لمسيكينه ان النجاسه لازقه في لفياب من تطفير الطناقير

لكن كليله اعترف ان انت دائما طناقيرك مفنشلين

[.....]

من العاب الأول التيلة وجايب اليكم صور من لعبنا في البحرين

http://karrana.net/uploads/khudair/IMG_1115.jpg

لعبة غير الي تلعبوها تعلموا
http://karrana.net/uploads/khudair/IMG_1116.jpg

هذا حسين راشد
http://karrana.net/uploads/khudair/IMG_1117.jpg

وهذا أخوه ابراهيم راشد

http://karrana.net/uploads/khudair/IMG_1118.jpg

هذا عباس راشد أكبر مزاغي في البحرين

كملوا باقي الصور

[.....]

الحين أخليكم تشوفوني وعشان ما تعرفوني أوريكم بس التيل في أيدي

http://karrana.net/uploads/khudair/IMG_1121.jpg

حريف لعب تيل
http://karrana.net/uploads/khudair/IMG_1126.jpg

هذا بعد ما كسبتهم صلوا على النبي وبلاش حسد
http://karrana.net/uploads/khudair/IMG_1142.jpg

هذي تيلتي المول

http://karrana.net/uploads/khudair/IMG_1146.jpg

هذا مكسب اليوم بس

http://karrana.net/uploads/khudair/IMG_1158.jpg

اللي يبغي يلعب أنا أنتظره

وخاردة الحل بالتيلة

[قديحي]

ما شالله عليك حجي نقاط

كأنكم في البحرين ما تستخدموا التيلة الجبخ
تعرف التيلة الجبخ ؟

عموما بداية قوية ونتمنى تكون معنا هنا في العشة
وتاكل من تمر ابوعبدالله الزين وتتقهوه من هالقهوة الحلوة
بس بتكون حبيبنا لو عرفنا اسمك

[نعناع]

حياك أخونا نقاط
نتمنى تعجبك العشة
وشكراً لك على الصورة الحلوة

أمس أنا لعبت مع قديحي و(خرخمته تخرخم)

هاه قديحي لا تقول موصحيح

[قديحي]

والله انك مزاغي يا ابوعبدالله
وبينك وبينك انا رافت بحالك
والا كان حِلّك محطوط على زقال :p

[كليله]

عدال ياقديحي ...
اظن اللّي طناقيره مفنشلين
اللّي ماعندهم نخل , امّا احنا
فالطناقير على كيفنا من نخلنا
لا ويمكن تشتريهم بعد ...:d
واللّا اشرايك يابوعبدالله

[نعناع]

كليله أنت تعرفه هو متى فلح في شي
أنت ماتذكر الكابريس الاحمر الي أستلمه
الي يشغله في أيام البرد بدون تسخين ولا ديانة
وأخرتها وقف في وسط فريقهم بسبب أن المكينة راحت فيها

المهم مرة من المرات لعبت مع قديحي أعكوس
والرجال معروف في (تكبيس ) لعكوس ومزاغي محترف
ومرة من المرات هزمته وحاول انه يلعب بخرجيته وفلسناه وخليناه بدون ولا قرش

قديحي تذكر كيف كانو لصبيان يطلبو بفلوس

لعبة مكاسر البيض أحد يعرفها

[قديحي]

انا اصلا يا ابوعبدالله انت بالذات ما العب وياك لأن طنقورك خلو
ومنت في مستوانا

وحتى في لعكوس ما تفهم شي
وأتحداك تكتب نبذه عن عكوس بلانزا
ونبذه عن عكوس ستيف
منهو اوسكار
ومنهو زنجي يا حشيشه

أبوعبدالله حرام عليك
انت تسميها فلوس ؟
ربع ريال ونص ريال هذي فلوس
يوم الا تقوم بها يكون ارباحك ريالين
واذا ربحت لعكوس الف واحد يتانيك عطنا شوي وعطنا شوي
ما كأنك ربحان فيها بعرق جبينك :p

مكاسر البيض لعبة جميلة كانت بس احلى ما فيها انك تلعب راس براس
وتاه بتاه
كليله على ما اذكر كان اكبر مزاغي بيض في الفريق لأنه كان يفضي البيضة من الداخل
ويحط محله جبس :confused:
طبعا وقت البيض احنا نتفنن في اشكال اليض
نفوحه مع قضور بصل حق يصير لونه بني
او نفوحه مع حبر حق يصير لون البيض بنفسجي
وساعات نحط الوان مائية خضراء وتطلع البيضة لونها اخضر

الغريب اننا ناكل البيض وهو ملون ببنفسجي واخضر ولا يصير فينا شي

[كليله]

افا يابوعبدالله ماتعرف البلانزا , انا اكفيك قديحي وارد عليه
البلانزا هم عصابة من الكوبوي , ورحم الله ايّان زمان يوم ما
كانت تطلع في التلفزيون الاّ الظهران , كنّا نشاهد هالافلام...
اوسكار هذا يعتبر السكرتير الخاص لستيف او زي مدير اعماله..
كانت للعكوس مواسم نلعبها , كلّ موسم او بين فتره واخرى
نلعب عكوس شكل , فما ان نتشبّع من لعبة عكوس على ما اذكر
الممثلين المصريين , اذكر منهم احمد عماره ومحمود المليجي ..
تأتي لعبة عكوس البلانزا او ستيف , وجيمي لاتنساه ياقديحي
والزنجي هذا من شلّة عكوس ستيف , ولاتزال صورته محفورة في
ذاكرتي , ولو كنت رسّاماً لرسمته اليكم , هو كما يسمّونه زنجي حقل
كأنّه يقف بجانب عربه في حقل مليئ بالاعشاب .....
لعبة مكاسر البيض ياقديحي ,, والله كدّاها ابوحسين حج عبدالله الغزوي
القرطاسه ماتاخذ شي عنده ...
ابوعبدالله , انا باعترف صحيح لكم بحاجه ولكن مو عيب الاعتراف بالخطأ فضيله
صحيح انا كنت مزاغي كبير خصوصا في العكوس , واذكر مرّه لعبت ويّا قديحي
وكبّست عكوسي مزبوط , وكسّبته , كل ماطلب اكسبه , ماشفته ولكن بعد ويش
يوم طارت لطيور بارزاقها , الاّ هو يابوعبدالله نافض ثوبه في وجهي وقايم حمقان
وهو يقول ( مزاغي تزاغي عليّي ) ومنها مالعب ويّايي ابد ..
قديحي على طاري ان ناكل لبيض وهو ملوّن ولايصيبنا شي , سبحان الحافظ ..
انا اذكر دائما اسوّي للوالد القهوة في النخيل من ماي لضلوع , اغرف الماي بالغوري من
تحت الشّبا , واغليه ونشربها ولايصيبنا شي .... حتّى ماي لضلوع شربناه
ولم نصب بأذى ... وآسف على الاطاله

[كليله]

لعبة الشّير ياجماعه , ماذكرتوها ...
(خط لو صنم) ...
من يبدأ اوّل ...

[نعناع]

خط لو صنم على حسب علمي معروفه
والشير هذا مالحقت عليه

كليله لاجيب طاري لعبة ( الحاكم والجلاد )

حكمنا عليك خمصطعشر ضربة من البارد الصقيع
لا وضرب بهوز أصفر مال تسليك الكهرباء

حصلنا ضرب :a27:

[كليله]

اكيد بتحصّل ضرب .. لوتدري , خلاص لاتعيدها زين ..
ابوعبدالله ,الشّير هي لعبة الخط والصنم , وان كان الخط والصنم
يستخدم لاغراض اخرى, ولكنه هو نفسه لعبة الشير ....
واشهر فريق كان يتجمّع فيه الناس لوّل وبشكل رهيب وبمختلف
الاعمار وغالبيتهم ما بتصدّق من الكبار كان فريق المقيسم من جهة الطريق
اللي يودّي عين المحارق , ماتسمع الاّ اصوات كل واحد يقول للثاني , ويش كم بتحط
ريال والاّ ريالين , ومن يحط فلوسه قال له خط لو صنم ..
الغريب يابوعبدالله اني سألت هالايام عن اذا فيه اشكال في هاللعبه .. وكان الجواب لا ..

[نعناع]

الالعاب الي في العين لها طعم خاص
وأكثر شي عجبني هو لعبة المرامح
ومع أني شفت العبة فقط
أتمنى من قديحي أو الباحث أو كليله
يشرحو لنا كيف كانت موجودة

[كليله]

افا يابوعبدالله , ماحد رمحك للحين , اقصد ماحد تكلم لك عن لعبة
المرامح للحين , الظاهر الباحث وقديحي يبغوا يعلموك ايّاها على
الطبيعه , بس ياحسره وين , مافيه عيون زي لوّل , الاّ اذا كانوا
بيـتأجّروا عين علىحسابهم ...
لعبة لمرامح عزيزي احسن مكان تؤدّى فيه في العيون الوسيعه
في الجصّة ماتصلح , وهي لاتخلو من العنف , تؤدّى امّا بالاتفاق
بين الاشخاص او على غفله , ولكن بين اشخاص مايزعلوا وعندهم
تحمّل , وهي طريقتها كما اتذكر يتظاهر الواحد انّه يعوم على صدره
ويمرّ بخويّه اللّي جالس على النجف او طافي على الماي مايدري
ويشقلب عليه بحركه فنّيه ويرمحه وين ماتجيه الرمحه في الوجه او
الصدر , وطبعا الشاطر يعرف كيف يتفاداها ..

[نعناع]

كليله أنا شفت كيف يلعبو بها وأنا أعرفها ولكن ومو سريع زي أهل لول
قديحي يبغى له واحد يرمحه حتى يترك النوم

[قديحي]

:a50:

أصبحنا وأصبح الملك يالله
يالله على بابك يا كريم

:a39:
والآن بعد الكشخة نرجع الى العاب العين
فبعد ما جاد به الأخوان الكرام ابوعبدالله وكليله بلعبة لمرامح ... رمحهم خروف في خشمهم :014:

نقول ان ابوعبدالله كان بطل الرواسية في لعبة قريريص الماي
اما كليله فهو بطل اللبانية في لعبة حمارة العرجه
وما موضوع ورثاءه عين اللبانية الا دليل على صحة كلامي فهو لا يفتقد العين
مثلما يفتقد صولاته وجولاته وحمارته العرجه وعصايته وضربه ابوعبدالله على رأسه

يالله يا ابوعبود سولف لنا عن قريريص الماي
وانت يا كلية :a71: ( على قولة ابوعابد ) لا تبخل علينا بشرح حمارة العرجة


ابوعبدالله هذي لك
الا فوق يدعي في لستايل يشبه واحد من أعضاء المنتدى
اتحداك تعرف يشبه من :a28:

[غربة]

بسم الله الرحمن الرحيم
فيه العاب وايد في بالي بشرح وحده وبذكر الباقي
لعبة بر و بحر
وهي عبارة عن رسم خط بطبشور في النص بعدين واحد ما يلعب بس يقول بر او بحر
لما يقول بر تتقدم قدام الخط ولما يقول بحر تصير خلف الخط وهو يلخبطهم حتى يطلعهم كلهم بس اخر واحد هو الفايز
كيف الواحد يطلع
بس المعلق يلخبطهم ويقول كلمات غير بر وبحر علشان بس يلخبطهم والي يتاخر في التقدم او التاخر او يدوس على الخظ يطلع بره على طول ...
وفيه لعبت الي يصيد يصيد وياه ولعبه الطير ولعبت حللت وايد العاب

[نعناع]

قريريص الماي هذا على موت المختفي


ابوعبدالله هذي لك
الا فوق يدعي في لستايل يشبه واحد من أعضاء المنتدى
اتحداك تعرف يشبه من

أنا ماقلت شي ولاشي ولاتحط بلاك عليي